Get the latest news at
your fingertips!
Download our app now
LIVE TV
Search
2026 ടി20 ലോകകപ്പിൽ പാകിസ്താനെ തോൽപ്പിച്ച് സൂപ്പർ എട്ട് ഘട്ടത്തിലേക്ക് പ്രവേശനം നേടിയിരിക്കുകയാണ് ഇന്ത്യ. ഇത്തവണയും കപ്പിൽ കുറഞ്ഞതൊന്നും ഇന്ത്യ പ്രതീക്ഷിക്കുന്നില്ല. ഇതിനിടെ ഇന്ത്യൻ പരിശീലകൻ ഗൗതം ഗംഭീറിന്റെ കരാർ തുടർന്നേക്കുമെന്ന് സൂചനകൾ ഇപ്പോൾ പുറത്തുവരികയാണ്.
2028ലെ ലോസ് ആഞ്ചലസ് ഒളിമ്പിക്സ് വരെ ഇന്ത്യൻ ക്രിക്കറ്റ് ടീമിന്റെ മുഖ്യ പരിശീലകനായി ഗൗതം ഗംഭീർ തുടർന്നേക്കുമെന്ന് റിപ്പോർട്ട്. 2027ൽ ദക്ഷിണാഫ്രിക്കയിൽ നടക്കാനിരിക്കുന്ന ഏകദിന ലോകകപ്പ് വരെയാണ് ബിസിസിഐയ്ക്ക് നിലവിൽ ഗംഭീറുമായി കരാറുള്ളത്. എന്നാൽ ദൈനിക് ജാഗരൺ റിപ്പോർട്ട് ചെയ്യുന്നതനുസരിച്ച് 2027 ലോകകപ്പ് വരെയുള്ള ഗംഭീറിന്റെ കരാർ 2028 ഒളിമ്പിക്സ് വരെ നീളുമെന്നാണ് സൂചനകൾ. 128 വർഷത്തിന് ശേഷം ക്രിക്കറ്റ് ഒളിംപിക്സിലേക്ക് മടങ്ങിവരുന്നത് 2028ലാകും. തീരുമാനം പൂർണമായും ഗംഭീറിന്റെ ഇഷ്ടമനുസരിച്ചാകും.
ഇതിനിടെ ഐപിഎൽ ഫ്രാഞ്ചൈസിയായ രാജസ്ഥാൻ റോയൽസ് അവരുടെ സിഇഒയും മെന്ററും പങ്കാളിയുമായി ഗംഭീറിനെ ഒപ്പം ചേർക്കാൻ ശ്രമം നടത്തുന്നുണ്ട്. രാജസ്ഥാന് ഇത്തവണ ഉടമസ്ഥാവകാശത്തിൽ മാറ്റങ്ങൾ വരുത്താനിടയുണ്ടെന്ന് മുൻപ് റിപ്പോർട്ടുകളുണ്ടായിരുന്നു. ഫ്രാഞ്ചൈസി ഉടമകളിലൊരാൾ രണ്ട് മുതൽ മൂന്ന് ശതമാനം ഓഹരി ഗംഭീറിന് വിൽക്കാൻ തയ്യാറായി.
ഐപിഎല്ലിൽ കൊൽക്കത്ത നൈറ്റ്റൈഡേഴ്സിനെ മൂന്ന് തവണ ചാമ്പ്യന്മാരാക്കിയതിൽ മുഖ്യപങ്കുള്ളയാളാണ് ഗംഭീർ. കളിക്കാരനായും മെന്ററായും ഫ്രാഞ്ചൈസിക്കൊപ്പം ഗംഭീർ ഉണ്ടായിരുന്നു. നിലവിൽ ഇന്ത്യൻ ടീം കോച്ചായതിനാൽ രാജസ്ഥാന്റെ ഓഫർ ഗംഭീർ സ്വീകരിക്കാനിടയില്ല എന്നാണ് വിവരം. ലോഥാ കമ്മിറ്റി ശുപാർശകൾ അംഗീകരിച്ച സുപ്രീം കോടതി വിധിപ്രകാരം ഒരാൾ ദേശീയ ടീം പദവി വഹിക്കുമ്പോൾ ഐപിഎൽ ഫ്രാഞ്ചൈസിയുടെ ഭാഗമാകാൻ കഴിയില്ല. ഈ ഓഫർ ഗംഭീർ സ്വീകരിച്ചാൽ ഇന്ത്യൻ പരിശീലക പദവി ഒഴിയേണ്ടിവരും.
Content Highlight:BCCI's Plans For Gautam Gambhir, could continue as India head coach till 2028 LA Olympics
