ക്വലാലംപൂർ: മലേഷ്യൻ ഓപ്പണിൽ പൊരുതി വീണ് സ്വാതിക് സായിരാജ് റങ്കിറെഡ്ഡി - ചിരാഗ് ഷെട്ടി സഖ്യത്തിന് തോൽവി. ഒന്നിനെതിരെ രണ്ട് ഗെയിമുകൾക്ക് ചൈനയുടെ വാങ് ചാങ് - ലിയാങ് വെയ് കെങ് സഖ്യം വിജയിച്ചു. ആദ്യ ഗെയിം നേടിയ ശേഷമാണ് ഇന്ത്യൻ സംഘം പരാജയപ്പെട്ടത്. സ്കോർ 21-9, 18-21, 17-21.
ആദ്യ ഗെയിമിൽ ഇന്ത്യൻ സംഘം അനായാസം മുന്നേറി. ഇന്ത്യൻ സഖ്യത്തിന് ഒരു വെല്ലുവിളി ഉയർത്താൻ പോലും എതിരാളികൾക്ക് കഴിഞ്ഞില്ല. ആദ്യ ഗെയിം 21-9 എന്ന സ്കോറിന് സ്വാതികും ചിരാഗും സ്വന്തമാക്കി. എന്നാൽ നിർണായകമായ രണ്ടാം ഗെയിമിൽ ചൈനീസ് സംഘം ഇന്ത്യയ്ക്ക് വെല്ലുവിളി ഉയർത്തി. ആദ്യം 6-11ന് വാങ് ചാങും ലിയാങ് വെയ് കെങും മുന്നിലെത്തി. ഇന്ത്യൻ സംഘം ശക്തമായി പോരാടിയത് ചൈനയുടെ അനായാസ ജയം ഒഴിവാക്കി. എങ്കിലും 18-21ന് ചൈനീസ് സംഘം ഗെയിം പിടിച്ചെടുത്തു.
ഇരുസംഘങ്ങളും ഓരോ ഗെയിം വിജയിച്ചതോടെ മത്സരം കടുത്തു. അവസാന ഗെയിമിൽ വിജയിക്കുന്നവർ മലേഷ്യൻ ഓപ്പൺ സ്വന്തമാക്കും. മൂന്നാം ഗെയിമിന്റെ തുടക്കത്തിൽ ഇന്ത്യൻ സംഘം മുന്നേറി. ഒരു ഘട്ടത്തിൽ 10-3 എന്ന നിലയില്‍ ഇന്ത്യൻ സഖ്യം മുന്നിലായിരുന്നു. എന്നാൽ ചൈനീസ് പോരാട്ടം ശക്തിപ്പെട്ടതോടെ കളിമാറി. സ്കോർ നില 12-12ലേക്ക് എത്തി. പിന്നീട് ചൈനീസ് സംഘം മെല്ലെ മുന്നേറി. ഒടുവിൽ 17-21ന് ഗെയിം പിടിച്ചെടുത്തു. ഒപ്പം വിജയവും.
