ക്വാലലമ്പുർ: മലേഷ്യൻ ഓപ്പൺ ബാഡ്മിന്റണിൽ ഇന്ത്യയുടെ കിഡംബി ശ്രീകാന്തിന് തോൽവി. ഹോങ്കോങ്ങിന്റെ ആന്‍ഗസ് എന്‍ കെ ലോങ്ങിനോടാണ് ശ്രീകാന്ത് പരാജയപ്പെട്ടത്. നേരിട്ടുള്ള ഗെയിമുകൾക്കാണ് ഹോങ്കോങ്ക് താരത്തിന്റെ വിജയം. സ്കോർ 13-21, 17-21.
മത്സരത്തിന്റെ തുടക്കത്തിൽ താളം കണ്ടെത്തിയത് ശ്രീകാന്ത് ആണ്. ഒരു ഘട്ടത്തിൽ 6-1ന് ശ്രീകാന്ത് മുന്നിട്ട് നിന്നു. എന്നാൽ ആൻഗസ് ലോങ്ങ് ശക്തമായി തിരിച്ചുവന്നു. 13-21ന് ആദ്യ ഗെയിം ഹോങ്കോങ്ങ് താരം സ്വന്തമാക്കി. വെറും 15 മിനിറ്റ് മാത്രമാണ് ആദ്യം ഗെയിം നീണ്ടുനിന്നത്.
നിർണായകമായ രണ്ടാം ഗെയിമിൽ കടുത്ത പോരാട്ടമാണ് ഇരുതാരങ്ങളും കാഴ്ചവെച്ചത്. സ്കോർനില പലപ്പോഴും ഒപ്പത്തിനൊപ്പമായിരുന്നു. പക്ഷേ അവസാന നിമിഷം ഗെയിം ശ്രീകാന്തിന് കൈവിട്ടുപോയി. രണ്ടാം ഗെയിം 17-21ന് ആൻഗസ് ലോങ്ങ് വിജയിച്ചു.
