Top

ഡല്‍ഹിയിലും മങ്കിപോക്‌സ്; സ്ഥിരീകരിച്ചയാള്‍ക്ക് വിദേശയാത്രാ പശ്ചാത്തലമില്ല

ലക്ഷണങ്ങളെ തുടര്‍ന്ന് യുവാവ് കഴിഞ്ഞ മൂന്നു ദിവസമായി നിരീക്ഷണത്തിലായിരുന്നു

24 July 2022 6:20 AM GMT
റിപ്പോർട്ടർ നെറ്റ്‌വർക്ക്

ഡല്‍ഹിയിലും മങ്കിപോക്‌സ്; സ്ഥിരീകരിച്ചയാള്‍ക്ക് വിദേശയാത്രാ പശ്ചാത്തലമില്ല
X

ന്യൂഡല്‍ഹി: രാജ്യത്തെ നാലാമത്തെ മങ്കിപോക്‌സ് കേസ് ഡല്‍ഹിയില്‍ സ്ഥിരീകരിച്ചു. ഡല്‍ഹി സ്വദേശിയായ 34കാരനാണ് രോഗം സ്ഥിരീകരിച്ചത്. ഇയാള്‍ക്ക് വിദേശയാത്രാ പശ്ചാത്തലമില്ലെന്ന് അധികൃതര്‍ അറിയിച്ചു. അടുത്തിടെ മണാലിയില്‍ നടന്ന ഒരു പരിപാടിയില്‍ രോഗം സ്ഥിരീകരിച്ചയാള്‍ പങ്കെടുത്തിരുന്നുവെന്നാണ് റിപ്പോര്‍ട്ട്.

മങ്കിപോക്‌സ് ലക്ഷണങ്ങളെ തുടര്‍ന്ന് യുവാവ് കഴിഞ്ഞ മൂന്നു ദിവസമായി നിരീക്ഷണത്തിലായിരുന്നു. തുടര്‍ന്ന് പൂനൈ വൈറോളജി ഇന്‍സ്റ്റിറ്റ്യൂട്ടില്‍ അയച്ച് സാമ്പിള്‍ പരിശോധിക്കുകയായിരുന്നു. മൗലാന ആസാദ് മെഡിക്കല്‍ കോളേജിലാണ് യുവാവിനെ പ്രവേശിപ്പിച്ചിരിക്കുന്നത്. ഇയാളുമായി സമ്പര്‍ക്കമുണ്ടായവരെ കണ്ടെത്താന്‍ നടപടികള്‍ ആരംഭിച്ചിട്ടുണ്ട്. രാജ്യത്ത് നേരത്തെ സ്ഥിരീകരിച്ച മൂന്ന് മങ്കിപോക്‌സ് കേസുകളും കേരളത്തിലായിരുന്നു. വിദേശത്തുനിന്നെത്തിയവര്‍ക്കായിരുന്നു രോഗം സ്ഥിരീകരിച്ചത്.

ഇതിനിടെ മങ്കിപോക്‌സ് കേസുകള്‍ വര്‍ധിച്ചുവരുന്ന സാഹചര്യത്തില്‍ ലോകാരോഗ്യ സംഘടന ആഗോള അടിയന്തരാവസ്ഥ പ്രഖ്യാപിച്ചിരിക്കുകയാണ്. പല രാജ്യങ്ങളിലും അതിവേഗം രോഗം പടരുന്ന സാഹചര്യത്തിലാണ് തീരുമാനം. ഇതിനകം 71 രാജ്യങ്ങളില്‍ 16,000ത്തോളം മങ്കിപോക്‌സ് കേസുകളാണ് സ്ഥിരീകരിച്ചിരിക്കുന്നത്.

Story Highlights: Delhi reports India's fourth monkeypox case in man with no history of foreign travel

Next Story