

ആരോഗ്യകരമായ ഭക്ഷണശീലങ്ങള് ആഗ്രഹിക്കുന്നവര്ക്ക് ഭക്ഷണക്രമത്തില് ഉള്പ്പെടുത്താവുന്ന ഒന്നാണ് വാല്നട്ട് അഥവാ അക്രോട്ടി. തലച്ചോറിന്റെ ആകൃതിയോട് സാമ്യമുള്ള ഈ നട്സ് ഒമേഗ-3 ഫാറ്റി ആസിഡുകള്, നാരുകള്, പ്രോട്ടീന്, ആന്റിഓക്സിഡന്റുകള് എന്നിവയുടെ ഉറവിടമാണ്. ദിവസവും മൂന്നോ നാലോ വാല്നട്ട് കഴിക്കുന്നത് ദീര്ഘകാലാടിസ്ഥാനത്തില് ആരോഗ്യത്തിന് ഗുണകരമാകുമെന്നാണ് വിദഗ്ധര് ചൂണ്ടിക്കാട്ടുന്നത്.

വാല്നട്ടില് അടങ്ങിയിരിക്കുന്ന ഒമേഗ-3 ഫാറ്റി ആസിഡുകള് ഹൃദയാരോഗ്യത്തെ സഹായിക്കുന്നു. സമീകൃതമായ ഭക്ഷണത്തിന്റെ ഭാഗമാക്കുമ്പോള് കൊളസ്ട്രോള് നിയന്ത്രണത്തിനും ഹൃദയത്തിന്റെ ആരോഗ്യകരമായ പ്രവര്ത്തനത്തിനും ഇത് ഗുണം ചെയ്തേക്കാം. എന്നാല് വാല്നട്ട് മാത്രം കഴിച്ചതുകൊണ്ട് രക്തസമ്മര്ദമോ കൊളസ്ട്രോളോ നിയന്ത്രിക്കാനാകുമെന്ന് കരുതരുത്.
വാല്നട്ടിലെ ഒമേഗ-3 ഫാറ്റി ആസിഡുകളും പോളിഫിനോളുകളും തലച്ചോറിന്റെ ആരോഗ്യവുമായി ബന്ധപ്പെട്ട പോഷകങ്ങളാണ്. ഇവ കോശങ്ങളുടെ സംരക്ഷണത്തിന് സഹായിക്കുന്നു.

വാല്നട്ടിലെ നാരുകള് ദഹനപ്രക്രിയയെ സഹായിക്കുകയും മലവിസര്ജനം ക്രമമായി നടക്കാന് സഹായിക്കുകയും ചെയ്യുന്നു. അതിനാല് നാരുകള് അടങ്ങിയ മറ്റു ഭക്ഷണങ്ങള്ക്കൊപ്പം വാല്നട്ട് ഉള്പ്പെടുത്തുന്നത് കുടലിന്റെ ആരോഗ്യത്തിന് ഗുണകരമായേക്കാം.
വാല്നട്ടില് ആരോഗ്യകരമായ കൊഴുപ്പിനൊപ്പം പ്രോട്ടീനും നാരുകളും അടങ്ങിയിട്ടുണ്ട്. ഇവ കൂടുതല് നേരം വയര് നിറഞ്ഞതായി തോന്നാന് സഹായിച്ചേക്കാം. അതുവഴി ഇടയ്ക്കിടെയുള്ള അനാവശ്യ ഭക്ഷണം കഴിക്കല് കുറയ്ക്കാനും സാധിക്കും. എന്നാല് വാല്നട്ടില് കലോറി കൂടുതലായതിനാല് അമിതമായി കഴിക്കുന്നത് ശരീരത്തിലെത്തുന്ന ആകെ കലോറി വര്ധിപ്പിക്കും. ശരീരഭാരം കുറയ്ക്കാന് ആഗ്രഹിക്കുന്നവര് അളവ് ശ്രദ്ധിക്കണം.

ദിവസവും മൂന്നോ നാലോ വാല്നട്ട് ഭക്ഷണത്തില് ഉള്പ്പെടുത്താമെന്നാണ് ഡയറ്റീഷ്യന്മാര് നിര്ദേശിക്കുന്നത്. രാത്രി വെള്ളത്തില് കുതിര്ത്ത് രാവിലെ കഴിക്കാം. ഓട്സ്, സാലഡ്, സ്മൂത്തി എന്നിവയിലും ചേര്ക്കാം. കുതിര്ത്ത് തന്നെ കഴിക്കണമെന്ന് നിര്ബന്ധമല്ല. വാല്നട്ട് അലര്ജിയുള്ളവര് ഇത് ഒഴിവാക്കണം. ചിലരില് അമിതമായി കഴിക്കുന്നത് വയറിന് അസ്വസ്ഥതയുണ്ടാക്കാനും ഇടയുണ്ട്.
( ഈ ലേഖനം വിവരങ്ങള് നല്കുന്നതിന് വേണ്ടി മാത്രമുള്ളതാണ്. ആരോഗ്യ സംബന്ധമായ പ്രശ്നങ്ങള്ക്കും ഭക്ഷണക്രമത്തില് മാറ്റങ്ങള് വരുത്തുമ്പോളും ഒരു ഡോക്ടറുടെയോ ഡയറ്റീഷ്യന്റെയോ സവനം തേടേണ്ടതാണ്)
Content Highlights :Experts point out that consuming three or four walnuts daily can be beneficial for health in the long run