സംസ്ഥാനത്തേക്കുള്ള ലഹരി കടത്തിലെ പ്രധാനികള്‍ 1681 പേര്‍; പട്ടിക തയ്യാറാക്കി പൊലീസ്‌

തിരുവനന്തപുരം: കേരളത്തിലേക്കുളള ലഹരി കടത്തിലെ മുഖ്യ പങ്കാളികളായ 1681 പേരുടെ പട്ടിക തയ്യാറാക്കി പൊലീസ്. ക്രിമിനൽ സംഘത്തിൻെറ പട്ടിക തയ്യാറാക്കുന്ന മാതൃകയിലാണ് എഡിജിപിയുടെ നേതൃത്വത്തിൽ ലഹരി കടത്തുകാരുടെ പട്ടികയും തയ്യാറാക്കിയത്. സംസ്ഥാനത്തേക്കുള്ള ലഹരി ഒഴുക്ക് തടയുന്നതിൻെറ ഭാഗമായാണ് വിൽപ്പനക്കാർ, സ്ഥിരം കേസിൽ അകപ്പെടുന്നവർ, രാജ്യാന്തര ബന്ധമുള്ളവർ എന്നിവരെ ഉൾപ്പെടുത്തി പ്രത്യേക പട്ടിക തയ്യാറാക്കിയത്. ഇവരിൽ നിന്നും 162 പേരെ കരുതൽ തടങ്കലിൽ വയ്ക്കാനുള്ള ശുപാർശയും പൊലീസ് സർക്കാരിന് നൽകി.

ലഹരി ഉപയോഗത്തിനെതിരെയും വിൽപ്പനക്കെതിരെയും സംസ്ഥാനത്ത് വലിയ പ്രചാരണ പ്രവർത്തനങ്ങളും അന്വേഷണവും തുടങ്ങിയ പശ്ചാത്തത്തിലാണ് പട്ടിക തയ്യാറാക്കിയത്. 2022 ഒക്ടോബർ വരെയുളള കണക്കനുസരിച്ച് 24,779 പേരെയാണ് പൊലീസ് മാത്രം ലഹരി കേസിൽ അറസ്റ്റ് ചെയ്തത്. പ്രധാന ഇടപാടുകാരും ചില്ലറ വിൽപ്പനക്കാരും ഇതിൽ ഉൾപ്പെടും. ഇൻറലിജൻസിന്റെ സഹായത്തോടെ ജില്ലാ പൊലീസ് മേധാവിമാരുടെ നേതൃത്വത്തിലാണ് ഓരോ ജില്ലയിലും പട്ടിക തയ്യാറാക്കി കൈമാറിയത്. പട്ടിക പ്രകാരം 465 പേരുളള കണ്ണൂരിലാണ് ഏറ്റവും കൂടുതൽ ലഹരികടത്തുകാരുളളത്. വയനാടും കാസർഗോഡും 210 പേരും കൊല്ലം സിറ്റിയിൽ 189 പേരും കോഴിക്കോട് റൂറലിൽ 184 കുറ്റവാളികളും പട്ടികയിലുണ്ട്.

പട്ടികയിലുള്ള 162 പേരെ നാ‍ർക്കോട്ടിക് നിയമ പ്രകാരം കരുതൽ തടങ്കിൽ പാർപ്പിക്കാനുള്ള നടപടി ആരംഭിച്ചു. ആഭ്യന്തര സെക്രട്ടറിയാണ് പൊലീസിന്റെ ശുപാ‍ർശയിൽ ഉത്തരവ് നൽകേണ്ടത്. ലഹരി വിൽപ്പനയിൽ നിന്നും സ്വത്ത് സമ്പാദിച്ച 114 പേരുടെ സ്വത്തു കണ്ടെത്താനുള്ള നടപടികളും പുരോഗമിക്കുകയാണ്. എറണാകുളത്ത് 65 പേരാണ് ലഹരി കടത്തിലൂടെ സ്വത്തു സമ്പാദനം നടത്തിയതായി കണ്ടെത്തിയത്.

STORY HIGHLIGHTS: police preparing list of 1681 people who are the main links in narcotic cases