'എട്ട് പേരെയാണ് ഇല്ലാതാക്കിയത്'; കേരളത്തിലെ ഏറ്റുമുട്ടല്‍ കൊലകളിലും സുപ്രീം കോടതി അന്വേഷണം വേണമെന്ന് വി ടി ബല്‍റാം

തൃശൂർ: കേരളത്തിലെ ഏറ്റുമുട്ടൽ കൊലകളെക്കുറിച്ച് സമഗ്ര അന്വേഷണം വേണമെന്ന് വിടി ബൽറാം. കേരളത്തിലും മാവോയിസ്റ്റുകളെന്ന പേരിൽ എട്ട് കമ്മ്യൂണിസ്റ്റ് രാഷ്ട്രീയപ്രവർത്തകരെയാണ് ഇക്കഴിഞ്ഞ ആറ് വർഷത്തിനിടയിൽ "ഏറ്റുമുട്ടൽ" കൊലപാതകങ്ങളിലൂടെ പൊലീസ് ഇല്ലാതാക്കിയത്. ഇവയിൽ രണ്ട് പേർ സ്ത്രീകളായിരുന്നു. ഇവയെക്കുറിച്ച് നിയമാനുസരണം നടക്കേണ്ട മജിസ്റ്റീരിയൽ തല അന്വേഷണങ്ങളുടെ റിപ്പോർട്ടുകളൊന്നും ഇതുവരെ വെളിച്ചം കണ്ടിട്ടില്ലെന്നും വി.ടി. ബൽറാം ഫേസ്ബുക്കിലെഴുതിയ കുറിപ്പിലൂടെ ചൂണ്ടികാട്ടി.

ഹൈദരാബാദ് കൂട്ട ബലാത്സംഗ കേസിലെ പ്രതികളെ പൊലീസ് വധിച്ചത് വ്യാജ ഏറ്റുമുട്ടലിലൂടെയാണെന്ന് സുപ്രീം കോടതി നിയോഗിച്ച സമിതി കണ്ടെത്തിയ പശ്ചാത്തലത്തിലാണ് വിടി ബൽറാമീന്റെ ഫേസ്ബുക്ക് കുറിപ്പ്. ഹൈദരാബാദ് ഏറ്റുമുട്ടൽ വ്യാജമാണെന്ന സംശയം പ്രകടിപ്പിക്കുന്ന 2019 ഡിസംബർ ആറിലെ ഫേസ്ബുക്ക് കുറിപ്പും ഇതിനൊപ്പം അദ്ദേഹം പങ്കുവെച്ചിട്ടുണ്ട്.

വി.ടി. ബൽറാം പങ്കുവെച്ച ഫേയ്സ്ബുക്ക് പോസ്റ്റ്.

'ഹൈദരാബാദിലെ "ഏറ്റുമുട്ടൽ മരണ"ങ്ങൾ പൊലീസ് ഒരുക്കിയ വ്യാജ ഏറ്റുമുട്ടലുകളാണ് എന്ന് സുപ്രീം കോടതി നിയോഗിച്ച അന്വേഷണ കമ്മീഷൻ കണ്ടെത്തിയിരിക്കുന്നു. പ്രതികളെന്ന് പറഞ്ഞ് കസ്റ്റഡിയിലെടുത്ത നാല് മനുഷ്യരെയാണ് പോലീസ് വെടിവെച്ച് കൊന്നുതള്ളിയത്. മനുഷ്യാവകാശ പക്ഷത്തു നിന്നുകൊണ്ട് അന്നതിനെ എതിർത്തവരും പൊലീസ് ഭാഷ്യത്തിൽ സംശയം പ്രകടിപ്പിച്ചവരുമൊക്കെ രൂക്ഷമായ സൈബറാക്രമണവും തെറിവിളിയുമൊക്കെയാണ് നേരിടേണ്ടി വന്നത്. അത്രത്തോളം വികലവും അരാഷ്ട്രീയപരവുമാണ് നമ്മുടെയിടയിലെ പൊതുബോധം. ഈയിടെയിറങ്ങിയ 'ജനഗണമന' സിനിമയൊക്കെ ഇങ്ങനെയുള്ള 'ഇൻസ്റ്റൻറ്റ് ജസ്റ്റീസി'ന്റെ അപകടങ്ങളെക്കുറിച്ച് സാമാന്യമായ ഒരവബോധം സൃഷ്ടിക്കുന്നതിൽ ഉപകരിച്ചിട്ടുണ്ടെന്ന് തോന്നുന്നു. കൊലപാതകികളായ പൊലീസുകാരെ മാതൃകാപരമായി ശിക്ഷിക്കാൻ ഭരണകൂടത്തിന് ആർജ്ജവമുണ്ടാകുമോ എന്നതാണ് ഇനിയറിയേണ്ടത്.

കേരളത്തിലും മാവോയിസ്റ്റുകളെന്ന പേരിൽ എട്ട് കമ്മ്യൂണിസ്റ്റ് രാഷ്ട്രീയപ്രവർത്തകരെയാണ് ഇക്കഴിഞ്ഞ ആറ് വർഷത്തിനിടയിൽ "ഏറ്റുമുട്ടൽ" കൊലപാതകങ്ങളിലൂടെ പോലീസ് ഇല്ലാതാക്കിയത്. ഇവയിൽ രണ്ട് പേർ സ്ത്രീകളായിരുന്നു. ഇവയെക്കുറിച്ച് നിയമാനുസരണം നടക്കേണ്ട മജിസ്റ്റീരിയൽ തല അന്വേഷണങ്ങളുടെ റിപ്പോർട്ടുകളൊന്നും ഇതുവരെ വെളിച്ചം കണ്ടിട്ടില്ല. അതുകൊണ്ടു തന്നെ ഹൈദരാബാദിലേത് പോലെ ഇവിടെയും സർക്കാർ ഭാഷ്യങ്ങൾക്കപ്പുറം സത്യം ഇന്നും ജനങ്ങൾക്ക് മുമ്പിൽ വന്നിട്ടില്ല. കേരളത്തിലെ പിണറായി വിജയൻ സർക്കാരിന്റെ കാലത്തെ ഏറ്റുമുട്ടൽ കൊലപാതകങ്ങളേക്കുറിച്ചും സുപ്രീം കോടതിയുടെ മേൽനോട്ടത്തിൽ സമഗ്രമായ ഉന്നതതല അന്വേഷണം നടക്കേണ്ടതുണ്ട്.ജനാധിപത്യത്തിന്റെ വഴി അൽപ്പം ദുഷ്ക്കരമാണ്. എന്നാൽ അതല്ലാതെ ഒരാധുനിക സമൂഹത്തിന് മറ്റ് വഴിയില്ല എന്നതാണ് യാഥാർത്ഥ്യം'.