അഞ്ചാംപനി; പ്രതിരോധ പ്രവർത്തനങ്ങൾ വിലയിരുത്താൻ കേന്ദ്ര സംഘം ഇന്നെത്തും

മലപ്പുറം: മലപ്പുറം ജില്ലയിൽ അഞ്ചാം പനി പടരുന്നതിനെ തുടർന്ന് പ്രതിരോധ പ്രവർത്തനങ്ങൾ വിലയിരുത്താൻ കേന്ദ്ര സംഘം ഇന്നെത്തും. പ്രതിരോധ പ്രവർത്തനങ്ങൾ ഊർജിതമാക്കാൻ ആരോ​ഗ്യവകുപ്പ് നിർദേശം നൽകിയിട്ടുണ്ട്. കൽപകഞ്ചേരി, പൂക്കോട്ടൂർ പഞ്ചായത്തുകളിലും മലപ്പുറം നഗരസഭ പരിധിയിലുമാണ് അഞ്ചാം പനി വ്യാപകമായി സ്ഥിരീകരിച്ചത്.

മലപ്പുറം ജില്ലയിലെ അഞ്ചാംപനി കൂടുതലുളള സ്ഥലങ്ങളിൽ കേന്ദ്ര സംഘം പരിശോധന നടത്തും. ജില്ലയിലെ ആരോ​ഗ്യവകുപ്പ് ഉദ്യോ​ഗസ്ഥരുമായി കൂടിക്കാഴ്ച നടത്തും. പ്രതിരോധ പ്രവർത്തനങ്ങളുടെ ഭാ​ഗമായി ആരോ​ഗ്യവകുപ്പ് പ്രത്യേക ക്യാമ്പയിൻ ആരംഭിക്കും.

ഇതുവരെ 140 കേസുകളാണ് കേരളത്തിൽ റിപ്പോർട്ട് ചെയ്തത്. ഇതിൽ 130ഉം മലപ്പുറം ജില്ലയിലാണ്. ആറു മാസം മുതൽ മൂന്ന് വയസു വരെ പ്രായമുളള കുട്ടികളിലാണ് രോ​ഗം കൂടുതലായും കണ്ടുവരുന്നത്.

വായുവിലൂടെ പകരുന്ന രോ​ഗമാണ് അഞ്ചാംപനി. പനി, ചുമ, കണ്ണ് ചുവക്കൽ, ജലദോഷം ,ദേഹമാസകലം ചുവന്ന തടിപ്പുകൾ എന്നിവയാണ് രോഗലക്ഷണങ്ങള്‍. രണ്ടു ഡോസ് മീസൽസ് കുത്തിവെപ്പ് എടുക്കുന്നതാണ് പനിയെ പ്രതിരോധിക്കാനുളള ഫലപ്രദമായ മാർ​ഗം. കുട്ടികൾക്ക് ആദ്യ കുത്തിവെപ്പ് ഒൻപതാം മാസത്തിലും രണ്ടാം ഡോസ് പതിനാറാം മാസത്തിലും എടുക്കണം. കൃത്യസമയത്ത് ചികിത്സ തേടിയില്ലെങ്കിൽ മരണം സംഭവിക്കാമെന്നും ആരോ​ഗ്യ വിദ​ഗ്ധർ പറയുന്നു.

STORY HIGHLIGHTS: Measles in Kerala central team will arrive today