പിഎസ്‌സി അംഗത്വത്തിന് കോഴ: മറ്റ് നേതാക്കള്‍ക്കും പങ്കെന്ന് സ്ഥിരീകരിച്ച് സിപിഐഎം ജില്ലാ നേതൃത്വം

പിഎസ്‌സി അംഗത്വത്തിന് കോഴ: മറ്റ് നേതാക്കള്‍ക്കും പങ്കെന്ന് സ്ഥിരീകരിച്ച് സിപിഐഎം ജില്ലാ നേതൃത്വം

ഏരിയാ തലത്തില്‍ പ്രവര്‍ത്തിക്കുന്ന രണ്ട് പേര്‍ക്ക് ഇടപാടില്‍ പങ്കുണ്ടെന്നാണ് സിപിഐഎം ജില്ലാ നേതൃത്വം സ്ഥിരീകരിച്ചത്

കോഴിക്കോട്: പിഎസ്‌സി അംഗത്വം വാഗ്ദാനം ചെയ്ത് സിപിഐഎം നേതാവ് കോഴ വാങ്ങിയ സംഭവത്തില്‍ കൂടുതല്‍ നേതാക്കള്‍ക്ക് പങ്ക്. ഏരിയാ തലത്തില്‍ പ്രവര്‍ത്തിക്കുന്ന രണ്ട് പേര്‍ക്ക് ഇടപാടില്‍ പങ്കുണ്ടെന്നാണ് സിപിഐഎം ജില്ലാ നേതൃത്വം സ്ഥിരീകരിച്ചത്. ഇവര്‍ക്കെതിരെയും നടപടിയുണ്ടാകും.

സിപിഐഎം ഏരിയാ തലത്തില്‍ പ്രവര്‍ത്തിക്കുന്ന യുവ നേതാവിനെതിരെയാണ് പരാതി ഉയര്‍ന്നത്. പിഎസ്‌സി അംഗത്വം വാഗ്ദാനം ചെയ്ത് സിപിഐഎം നേതാവ് പാര്‍ട്ടിയുമായി ബന്ധമുള്ള ഒരു ഡോക്ടറില്‍ നിന്നാണ് കോഴവാങ്ങിയത്. കോഴിക്കോട് നഗരത്തിലെ യുവജന നേതാവും ഏരിയാ സെന്റര്‍ അംഗവുമായ നേതാവിനെതിരെയാണ് പരാതി. 60 ലക്ഷം രൂപയാണ് ഇയാള്‍ ആവശ്യപ്പെട്ടതെന്നും ആദ്യഘഡുവായി 22 ലക്ഷം രൂപ കൈപ്പറ്റിയെന്നും പരാതിയില്‍ പറയുന്നു.

മന്ത്രി മുഹമ്മദ് റിയാസ് വഴി പിഎസ്‌സി അംഗത്വം ശരിയാക്കാമെന്നായിരുന്നു വാഗ്ദാനം. സിപിഐഎം പിഎസ്‌സി അംഗങ്ങളെ തീരുമാനിച്ചപ്പോള്‍ പണം നല്‍കിയ ആളുടെ പേര് ഉണ്ടായിരുന്നില്ല. ഇതോടെ ആയുഷ് വകുപ്പില്‍ സ്ഥാനം വാഗ്ദാനം ചെയ്ത് ഇദ്ദേഹത്തെ അനുനയിപ്പിച്ച് നിര്‍ത്തി. എന്നാല്‍ ഇതും നടക്കാതെ വന്നതോടെയാണ് തട്ടിപ്പിനിരയായ ആള്‍ പാര്‍ട്ടിക്ക് പരാതി നല്‍കിയത്. സാമ്പത്തിക ഇടപാട് വ്യക്തമാക്കുന്ന ശബ്ദസന്ദേശങ്ങളും ഇയാള്‍ പാര്‍ട്ടിക്ക് കൈമാറിയതായാണ് സൂചന.

പരാതിയില്‍ സിപിഐഎം സംസ്ഥാന നേതൃത്വം പ്രാഥമിക അന്വേഷണം നടത്തിയിരുന്നു. സംഭവത്തില്‍ വിശദമായ അന്വേഷണം വേണമെന്ന് മന്ത്രി മുഹമ്മദ് റിയാസും ആവശ്യപ്പെട്ടിട്ടുണ്ട്. പരാതിയില്‍ വിശദമായ അന്വേഷണം നടത്താനാണ് പാര്‍ട്ടി നേതൃത്വത്തിന്റെ തീരുമാനം.

പിഎസ്‌സി അംഗത്വത്തിന് കോഴ: മറ്റ് നേതാക്കള്‍ക്കും പങ്കെന്ന് സ്ഥിരീകരിച്ച് സിപിഐഎം ജില്ലാ നേതൃത്വം
റിയാസിന്റെ പേരില്‍ തട്ടിപ്പ്; പിഎസ്‌സി അംഗത്വം വാഗ്ദാനം ചെയ്ത് സിപിഐഎം നേതാവ് പണം വാങ്ങിയെന്ന് പരാതി
logo
Reporter Live
www.reporterlive.com