LIVE TV
അന്താരാഷ്ട്ര വിപണിയിൽ ക്രൂഡ് ഓയിൽ വില വർദ്ധിച്ചതോടെ അടുത്ത മാസം യുഎഇയിൽ ഇന്ധനവില ഉയരാൻ സാധ്യത. ആഗോള വിപണിയിൽ ക്രൂഡ് ഓയിൽ വില ബാരലിന് 110 ഡോളർ കടന്ന പശ്ചാത്തലത്തിലാണ് രാജ്യത്ത് അടുത്ത മാസത്തെ പെട്രോൾ, ഡീസൽ നിരക്കുകളിൽ വർദ്ധനവുണ്ടായേക്കുമെന്ന സൂചനകൾ പുറത്തുവരുന്നത്.
പശ്ചിമേഷ്യൻ മേഖലയിലുണ്ടായ വർദ്ധിച്ച സംഘർഷാവസ്ഥയും ഇതേത്തുടർന്ന് എണ്ണ വിതരണത്തിലുണ്ടായ ആശങ്കകളുമാണ് ആഗോള വിപണിയിൽ പെട്ടെന്ന് വില കുതിച്ചുയരാൻ പ്രധാന കാരണം. ആഗോളതലത്തിൽ ക്രൂഡ് ഓയിൽ ഉത്പാദനത്തിലും വിതരണത്തിലുമുണ്ടായ പ്രതിസന്ധി തുടരുന്ന സാഹചര്യത്തിൽ വരും ദിവസങ്ങളിലും വിപണിയിൽ ചാഞ്ചാട്ടം തുടർന്നേക്കും.
നിലവിൽ യുഎഇയിൽ സൂപ്പർ 98 പെട്രോളിന് ലിറ്ററിന് 4.40 ദിർഹവും സ്പെഷ്യൽ 95-ന് 4.28 ദിർഹവുമാണ് ഈടാക്കുന്നത്. ഇ-പ്ലസ് 91 പെട്രോളിന് ലിറ്ററിന് 4.21 ദിർഹവുമാണ് ഇപ്പോഴത്തെ നിരക്ക്. അന്താരാഷ്ട്ര വിപണിയിലെ വിലനിലവാരം വിലയിരുത്തി മന്ത്രാലയത്തിന്റെ ഇന്ധനവില നിർണ്ണയ സമിതിയാകും വരാനിരിക്കുന്ന മാസത്തെ പുതിയ നിരക്കുകൾ ഔദ്യോഗികമായി പ്രഖ്യാപിക്കുക.
Content Highlights: Crude oil prices have climbed above $110 a barrel amid Middle East supply concerns, raising the possibility of higher petrol and diesel prices in the UAE in November. Official rates are expected at the end of October.
