LIVE TV
അബുദാബിയിൽ 2026-ലെ ഒട്ടക മേച്ചിൽ സീസണിന് സമാപനമായതായി എൻവയോൺമെന്റ് ഏജൻസി അബുദാബി അറിയിച്ചു. വ്യാഴാഴ്ച, ഒക്ടോബർ 16 മുതൽ എമിറേറ്റിലുടനീളം വാർഷിക മേച്ചിൽ വിലക്ക് നിലവിൽ വരും. 2027 മേയ് 14 വരെയായിരിക്കും ഈ വിലക്ക് തുടരുക.
അൽ ദഫ്ര മേഖലയിലെ ഭരണാധികാരിയുടെ പ്രതിനിധിയും ഇഎഡി ബോർഡ് ചെയർമാനുമായ ഷെയ്ഖ് ഹംദാൻ ബിൻ സായിദ് അൽ നഹ്‌യാന്റെ നിർദ്ദേശപ്രകാരം ഇത്തവണത്തെ മേച്ചിൽ സീസൺ നേരത്തെ തന്നെയാണ് ആരംഭിച്ചിരുന്നത്. മുൻ വർഷങ്ങളിൽ മേയ് 15-ന് ആരംഭിച്ചിരുന്ന സീസൺ, മുൻ മാസങ്ങളിൽ ലഭിച്ച കനത്ത മഴയെത്തുടർന്ന് സസ്യലതാദികൾ സമൃദ്ധമായി വളർന്നത് കണക്കിലെടുത്ത് ഏപ്രിൽ 22-ന് തന്നെ തുറന്നുകൊടുക്കുകയായിരുന്നു.
പ്രകൃതിദത്തമായ മേച്ചിൽപ്പുറങ്ങൾക്ക് വീണ്ടെടുപ്പിനും മരുഭൂമിയിലെ തദ്ദേശീയ സസ്യങ്ങളുടെ വളർച്ചയ്ക്കും അവസരമൊരുക്കാനാണ് മേച്ചിൽ വിലക്ക് ഏർപ്പെടുത്തുന്നത്. ഇത് അബുദാബിയിലെ ജൈവവൈവിധ്യവും മരുഭൂമിയിലെ പരിസ്ഥിതി വ്യവസ്ഥയും സംരക്ഷിക്കാൻ സഹായിക്കും. വിലക്ക് പൂർണ്ണമായും പാലിക്കാൻ ഒട്ടക ഉടമകൾ ബാധ്യസ്ഥരാണെന്നും പ്രകൃതിദത്ത പാതകളുടെ ദീർഘകാല നിലനിൽപ്പിന് ഇത് അത്യന്താപേക്ഷിതമാണെന്നും ഇഎഡി വ്യക്തമാക്കി. സീസണിലുടനീളം മികച്ച സഹകരണം നൽകിയ ഒട്ടക ഉടമകൾക്കും വളർത്തുകാരോടും ഏജൻസി നന്ദി അറിയിച്ചു.
അബുദാബിയിലെ ഒട്ടക മേച്ചിൽ 2020-ലെ 11-ാം നമ്പർ നിയമപ്രകാരമാണ് നിയന്ത്രിക്കപ്പെടുന്നത്. 21 വയസ്സും അതിൽ കൂടുതലുമുള്ള യുഎഇ പൗരന്മാർക്കാണ് മേച്ചിൽ ലൈസൻസ് നൽകുന്നത്. അടുത്ത സീസണിന് മുന്നോടിയായി തം (TAMM) പ്ലാറ്റ്‌ഫോം വഴി ലൈസൻസുകൾ ഉടനടി നേടാനോ പുതുക്കാനോ സാധിക്കും. പുതിയ ലൈസൻസിന് 250 ദിർഹവും പുതുക്കുന്നതിന് 150 ദിർഹവുമാണ് ഫീസ്.
Content Highlights: Abu Dhabi has banned camel grazing from October 16, 2026, to May 14, 2027, to allow native plants to regenerate, restore natural pastures and protect desert biodiversity.
