Get the latest news at
your fingertips!
Download our app now
LIVE TV
Search
ധ്രുവ് സർജയെ നായകനാക്കി പ്രേം കന്നഡയിൽ ഒരുക്കുന്ന ചിത്രമാണ് 'കെഡി' ദ ഡെവിൾ'. സഞ്ജയ് ദത്ത്, ശിൽപ ഷെട്ടി എന്നിവരും പ്രധാനവേഷത്തിലെത്തുന്ന ചിത്രത്തിലെ ഒരു ഗാനം കഴിഞ്ഞദിവസം പുറത്തുവന്നിരുന്നു. നോറാ ഫത്തേഹി ആണ് ഈ ഗാനരംഗത്തിൽ പ്രത്യക്ഷപ്പെടുന്നത്. എന്നാൽ ഈ ഗാനത്തിന്റെ റിലീസിന് പിന്നാലെ വലിയ വിമർശനങ്ങളാണ് പുറത്തുവരുന്നത്.
അർജുൻ ജന്യ സംഗീതം നൽകിയ, റക്വീബ് ആലം വരികളെഴുതിയ ഗാനത്തിന്റെ വരികളെ ചൂണ്ടിക്കാണിച്ചാണ് വിമർശനങ്ങൾ ഉയരുന്നത്. അശ്ലീലം നിറഞ്ഞതും സ്ത്രീകളെ മോശമായി ചിത്രീകരിക്കുന്നതുമാണ് ഗാനത്തിന്റെ വരികൾ എന്നാണ് കമന്റുകൾ ഉയരുന്നത്. സിനിമയും സമൂഹവും ഇത്രയും മുന്നോട്ട് പോയ സാഹചര്യത്തിലും ഇത്തരത്തിലും വരികളുള്ള ഗാനം പുറത്തുവരുന്നത് ലജ്ജയുണർത്തുന്നു എന്നാണ് ചിലർ എക്സിലൂടെ കുറിക്കുന്നത്. പാട്ടിനെതിരേ ഗായകൻ അർമാൻ മാലിക് രംഗത്തെത്തി. 'ഇങ്ങനെയൊരു പാട്ട് എന്റെ ടൈംലൈനിൽ വന്നു. ശരിയാണെന്ന് ഉറപ്പുവരുത്താൻ രണ്ടുതവണ കേട്ടു. വാണിജ്യചിത്രങ്ങളിലെ പാട്ടുകളുടെ അധഃപതനത്തിൽ ശരിക്കും ഖേദമുണ്ട്', എന്ന് അർമാൻ മാലിക് എക്സിൽ കുറിച്ചു.
'പറയാൻ വാക്കുകളില്ല. ഇത് കേൾക്കാതിരുന്നെങ്കിലെന്ന് ഞാൻ ആശിച്ചുപോവുന്നു', മറ്റൊരു പോസ്റ്റിൽ അർമാൻ മാലിക് പ്രതികരിച്ചു. കഴിഞ്ഞദിവസം പുറത്തിറങ്ങിയ പാട്ടിന്റെ യൂട്യൂബ് കമന്റ് ബോക്സ് നിറയെ വരികൾക്കെതിരായ വിമർശനമാണ്. 2026-ലും ഇങ്ങനെയാണോ പാട്ടുകളെന്നാണ് ചോദ്യം. അതേസമയം, 'ധുരന്ധറി'ന് പിന്നാലെ ഇത്തരമൊരു ചിത്രത്തിലാണ് സഞ്ജയ് ദത്ത് എത്തുന്നതെന്ന ചോദ്യവും ചില ആരാധകർ ചോദിക്കുന്നുണ്ട്. 'സർകെ ചുനാർ തേരി സർകെ' എന്ന തുടങ്ങുന്ന ഗാനം ആലപിച്ചിരിക്കുന്നത് മംഗ്ലിയാണ്. കെവിഎൻ പ്രൊഡക്ഷൻസിന്റെ ബാനറിൽ വെങ്കട് കെ. നാരായണ നിർമിക്കുന്ന ചിത്രം സംവിധാനം ചെയ്യുന്നത് പ്രേം ആണ്. ഏപ്രിൽ 30-ന് ചിത്രം തിയേറ്ററിലെത്തും.
Content Highlights: Nora Fathehi's song from KD movie gets trolled for inappropriate lyrics
