Get the latest news at
your fingertips!
Download our app now
LIVE TV
Search
റിഷബ് ഷെട്ടി രചനയും സംവിധാനവും നിർവഹിച്ച് അദ്ദേഹം തന്നെ കേന്ദ്ര കഥാപാത്രമായെത്തിയ കാന്താര ചാപ്റ്റർ 1 ബോക്സ് ഓഫീസിൽ അതിഗംഭീര പ്രകടനമാണ് കാഴ്ചവെച്ചത്. വലിയ സ്വീകരണമാണ് സിനിമയ്ക്ക് ലഭിച്ചത്. എന്നാൽ അതോടൊപ്പം ചില വിമർശനങ്ങളും സിനിമയെ തേടി എത്തിയിരുന്നു. നാലാം നൂറ്റാണ്ടിലെ കഥ പറയുന്ന ചിത്രത്തിലെ പാട്ടുസീനില്‍ ഒരു പ്ലാസ്റ്റിക് കുടിവെള്ള കാന്‍ പ്രത്യക്ഷപ്പെട്ടതാണ് സാമൂഹ്യ മാധ്യമങ്ങളില്‍ ചര്‍ച്ചയായത്. ഇപ്പോഴിതാ ഇതിൽ വിശദീകരണവുമായി എത്തിയിരിക്കുകയാണ് പ്രൊഡക്ഷൻ ഡിസൈനർ ബംഗ്ലാൻ.
'പ്രൊഡക്ഷന്റെ ഭാഗത്തുനിന്ന് ഭക്ഷണത്തിനൊപ്പം കൊണ്ടുവന്ന വെള്ളത്തിന്റെ ബോട്ടില്‍ ആരോ വെച്ചു മറന്നതാണ്. പിന്നീട് ചിത്രത്തില്‍ നിന്ന് വിഎഫ്എക്സ് ഉപയോഗിച്ച് അത് മാറ്റി. അത്രയും സൂക്ഷ്മമായി പരിശോധിച്ചിട്ടുപോലും ശ്രദ്ധയില്‍പ്പെട്ടില്ലല്ലോ എന്ന് അത് പുറത്തുവന്നപ്പോള്‍ ടെന്‍ഷനടിച്ചു', ബംഗ്ലാന്റെ വാക്കുകൾ. ചിത്രത്തിലെ 'ബ്രഹ്‌മകലശ' എന്ന പാട്ടിലെ മൂന്നാം മിനിറ്റിന് ശേഷമാണ് വാട്ടർ കാൻ പ്രത്യക്ഷപ്പെട്ടത്. നിലത്തിരുന്ന് ഭക്ഷണം കഴിക്കുന്നവര്‍ക്ക് പിന്നിലായി പ്ലാസ്റ്റിക് കുടിവെള്ള കാന്‍ വെച്ചിരിക്കുന്നതായാണ് വീഡിയോയിലുള്ളത്. ക്ലബ് എഫ്എമ്മിന് നൽകിയ അഭിമുഖത്തിൽ സംസാരിക്കുകയായിരുന്നു ബംഗ്ലാൻ.
ഈ വർഷം ആദ്യം പുറത്തിറങ്ങിയ വിക്കി കൗശൽ ചിത്രം 'ഛാവയുടെ' കളക്ഷൻ റെക്കോർഡ് ആയ 807 കോടിയെ കാന്താര മറികടന്നിരുന്നു. റിഷഭ് ഷെട്ടിയെ കൂടാതെ ജയറാം, രുക്മിണി വസന്ത്, ഗുല്‍ഷന്‍ ദേവയ്യ എന്നിവരാണ് ചിത്രത്തിലെ പ്രധാന കഥാപാത്രങ്ങളെ അവതരിപ്പിക്കുന്നത്. 2024-ല്‍ 'കാന്താര'യിലെ അഭിനയത്തിന് റിഷഭ് ഷെട്ടിക്ക് മികച്ച നടനുള്ള ദേശീയ പുരസ്‌കാരം ലഭിച്ചിരുന്നു. മികച്ച ജനപ്രിയ ചിത്രത്തിനുള്ള ദേശീയ പുരസ്‌കാരവും ഈ ചിത്രം നേടി.
Content Highlights: Mistake in Kantara explained by Banglan
