LIVE TV
ഓഹരി വിപണിയിൽ ലാർജ്ക്യാപ് , സ്മോൾക്യാപ് ഫണ്ടുകൾക്കിടയിൽ ഏത് തിരഞ്ഞെടുക്കണം എന്ന ആശയക്കുഴപ്പത്തിലാണോ നിങ്ങൾ? എങ്കിൽ ഇതിനിടയിലുള്ള മിഡ്ക്യാപ് ഫണ്ടുകളാണ് ഇപ്പോൾ നിക്ഷേപകർക്ക് ഏറ്റവും അനുയോജ്യമെന്ന് വിപണി വിദഗ്ധർ ചൂണ്ടിക്കാട്ടുന്നു.
എന്തുകൊണ്ട് മിഡ്ക്യാപ്?
ലാർജ്ക്യാപ് ഓഹരികൾ സുരക്ഷിതമാണെങ്കിലും അവയിൽ നിന്നുള്ള ലാഭം പരിമിതമായിരിക്കും. അതേസമയം, സ്മോൾക്യാപ് ഓഹരികൾ വലിയ ലാഭം നൽകാൻ സാധ്യതയുണ്ടെങ്കിലും അവയിൽ റിസ്ക് കൂടുതലാണ്. ഈ രണ്ട് വിഭാഗങ്ങളുടെയും ഗുണങ്ങൾ ഒത്തുചേരുന്ന ഇടമാണ് മിഡ്ക്യാപ്. അതായത്, ലാർജ്ക്യാപ്പിനേക്കാൾ കൂടുതൽ വളർച്ചാ സാധ്യതയും സ്മോൾക്യാപ്പിനേക്കാൾ കുറഞ്ഞ റിസ്കും ഇവ വാഗ്ദാനം ചെയ്യുന്നു.
മെച്ചപ്പെട്ട വളർച്ച
മിഡ്ക്യാപ് കമ്പനികൾ പലതും വികസനത്തിന്റെ ഘട്ടത്തിലാണ്. അവ ഭാവിയിൽ വലിയ കമ്പനികളായി മാറാൻ സാധ്യതയുള്ളവയാണ്. മിഡ്ക്യാപ് കമ്പനികൾ അവയുടെ വളർച്ചയുടെ നിർണ്ണായക ഘട്ടത്തിലായതിനാൽ, പുതിയ വിപണികളിലേക്ക് അതിവേഗം വ്യാപിക്കാനുള്ള ശേഷി ഇവയ്ക്കുണ്ട്. കൃത്യമായ നിക്ഷേപവും മികച്ച മാനേജ്മെന്റും ഒത്തുചേരുന്നതോടെ, ഈ കമ്പനികൾ ഭാവിയിൽ വലിയ ലാഭം നൽകുന്ന ലാർജ്ക്യാപ് കമ്പനികളായി മാറാൻ സാധ്യതയുണ്ട്. അതിനാൽ, ദീർഘകാലാടിസ്ഥാനത്തിൽ വലിയ സമ്പത്ത് സൃഷ്ടിക്കാൻ ആഗ്രഹിക്കുന്ന നിക്ഷേപകർക്ക് മിഡ്ക്യാപ് ഓഹരികൾ മികച്ചൊരു അവസരമാണ് നൽകുന്നത്.
വിപണിയിലെ സ്ഥിരത
സ്മോൾക്യാപ് ഓഹരികൾ തകരുന്ന സമയത്ത് മിഡ്ക്യാപ് ഓഹരികൾ താരതമ്യേന പിടിച്ചുനിൽക്കാറുണ്ട്.സ്മോൾക്യാപ് ഓഹരികളെ അപേക്ഷിച്ച് കൂടുതൽ ശക്തമായ ബിസിനസ് അടിത്തറയും സാമ്പത്തിക ഭദ്രതയും ഉള്ളവയാണ് മിഡ്ക്യാപ് കമ്പനികൾ. വിപണിയിൽ തകർച്ചയുണ്ടാകുമ്പോൾ സ്മോൾക്യാപ് ഓഹരികൾ വൻതോതിൽ താഴേക്ക് പോകാറുണ്ടെങ്കിലും, മിഡ്ക്യാപ്പുകൾ അവയുടെ സ്ഥിരത കൊണ്ട് വലിയ തകർച്ചയെ പ്രതിരോധിക്കാറുണ്ട്. ഈ പ്രതിരോധശേഷി നിക്ഷേപകരുടെ മൂലധനം വലിയ തോതിൽ നഷ്ടപ്പെടാതെ സംരക്ഷിക്കാൻ സഹായിക്കുന്നു. ഇന്ത്യയുടെ സാമ്പത്തിക വളർച്ചയുടെ ഗുണഭോക്താക്കളാകാൻ ഈ കമ്പനികൾക്ക് വേഗത്തിൽ സാധിക്കുന്നു.
ചുരുക്കത്തിൽ, ദീർഘകാല നിക്ഷേപത്തിലൂടെ മികച്ച ലാഭം കൊയ്യാൻ ആഗ്രഹിക്കുന്നവർക്ക് മിഡ്ക്യാപ് ഫണ്ടുകൾ ഏറ്റവും നല്ല ഒരു തെരെഞ്ഞെടുപ്പായി ഓഹരി വിപണി വിദഗ്ധർ ഇപ്പോൾ ചൂണ്ടി കാണിക്കുന്നു. എന്നാൽ നിക്ഷേപം നടത്തുന്നതിന് മുമ്പ് വിപണിയിലെ മാറ്റങ്ങൾ ശ്രദ്ധിക്കേണ്ടത് അത്യാവശ്യമാണ്.
Disclaimer : ഓഹരി വിപണിയിലെ നിക്ഷേപം നഷ്ട സാധ്യതകള്ക്ക് വിധേയമായതിനാല് കൃത്യമായ പഠനം നടത്തിവേണം തീരുമാനം കൈകൊള്ളേണ്ടത്. Content Highlight : Mid cap shares are ideal for long term investment, especially in a volatile market
