LIVE TV
ഫോണില് സോഫ്റ്റ്വെയര് അപ്ഡേറ്റ് വരുമ്പോള് നമ്മള് സാധാരണയായി അത് ഇന്സ്റ്റാള് ചെയ്യാറുണ്ട് അല്ലേ. പുതിയ ഫീച്ചറുകള്, സുരക്ഷാ പരിഹാരങ്ങള്(Security solutions), പ്രകടനത്തിലെ മെച്ചപ്പെടുത്തലുകള് (Performance improvements) എന്നിവയാണ് അപ്ഡേറ്റിലൂടെ ലഭിക്കുന്നത്. എന്നാല് അപ്ഡേറ്റ് പൂര്ത്തിയായതിന് ശേഷം ഫോണ് ഒരിക്കല് കൂടി റീസ്റ്റാര്ട്ട് ചെയ്യണോ എന്ന കാര്യത്തില് പലര്ക്കും സംശയമുണ്ടാകും.
എല്ലാ അപ്ഡേറ്റുകള്ക്കും ശേഷം ഫോണ് നിര്ബന്ധമായും റീസ്റ്റാര്ട്ട് ചെയ്യേണ്ടതില്ല. അപ്ഡേറ്റ് ഇന്സ്റ്റാള് ചെയ്യുന്നതിനിടെ തന്നെ പല ഫോണുകളും ആവശ്യമായ പ്രക്രിയകള് പൂര്ത്തിയാക്കുകയും സ്വമേധയാ റീസ്റ്റാര്ട്ട് ചെയ്യുകയും ചെയ്യും. ഫോണ് ഇതിനകം തന്നെ റീസ്റ്റാര്ട്ട് ആയിട്ടുണ്ടെങ്കില് വീണ്ടും ഓഫാക്കി ഓണ് ചെയ്യേണ്ട ആവശ്യമില്ല.
ഒരു അപ്ഡേറ്റിന് ശേഷം ഫോണ് റീസ്റ്റാര്ട്ട് ചെയ്യുമ്പോള് സിസ്റ്റം പുതുതായി ലോഡ് ചെയ്യും. മുന്പ് പ്രവര്ത്തിച്ചുകൊണ്ടിരുന്ന ചില ബാക്ക്ഗ്രൗണ്ട് പ്രോസസുകളും ആപ്പുകളും ക്ലോസ് ചെയ്യുകയും സിസ്റ്റം പ്രവര്ത്തനങ്ങള് വീണ്ടും ആരംഭിക്കുകയും ചെയ്യും. അതുകൊണ്ടുതന്നെ അപ്ഡേറ്റിന് ശേഷം ഫോണില് ചെറിയ പ്രശ്നങ്ങള് അനുഭവപ്പെടുന്നുണ്ടെങ്കില് ആദ്യം പരീക്ഷിക്കാവുന്ന എളുപ്പമുള്ള പരിഹാരമാണ് റീസ്റ്റാര്ട്ട് ചെയ്യുക എന്നത്.
ഇത്തരം സാഹചര്യങ്ങളില് ഫോണ് റീസ്റ്റാര്ട്ട് ചെയ്താല് താല്ക്കാലികമായ സോഫ്റ്റ്വെയര് പ്രശ്നങ്ങള് പരിഹരിക്കാന് കഴിയും.
ഒരു ചെറിയ സുരക്ഷാ അപ്ഡേറ്റ് മാത്രമാണ് ഇന്സ്റ്റാള് ചെയ്തതെങ്കില് പ്രത്യേകമായി റീസ്റ്റാര്ട്ട് ചെയ്യേണ്ട ആവശ്യം സാധാരണയായി ഉണ്ടാകില്ല. എന്നാല് ഫോണിന്റെ Android അല്ലെങ്കില് iOS പതിപ്പ് തന്നെ മാറുന്ന തരത്തിലുള്ള വലിയ സിസ്റ്റം അപ്ഡേറ്റ് ആണെങ്കില് അപ്ഡേറ്റിന് ശേഷം ഒരിക്കല് റീസ്റ്റാര്ട്ട് ചെയ്യുന്നത് സഹായകരമായേക്കാം.
കാരണം ഇത്തരം വലിയ അപ്ഡേറ്റുകളില് ഫോണിന്റെ സിസ്റ്റത്തിലെ പല ഘടകങ്ങളിലും മാറ്റങ്ങള് വരാം. റീസ്റ്റാര്ട്ട് ചെയ്യുമ്പോള് പുതിയ സിസ്റ്റം ഘടകങ്ങള് വീണ്ടും ലോഡ് ചെയ്യപ്പെടും.
റീസ്റ്റാര്ട്ട് ചെയ്തതുകൊണ്ട് ഫോണ് എപ്പോഴും വേഗത്തിലാകുമെന്ന് പറയാനാകില്ല. എന്നാല് ഒരു ആപ്പ്, പശ്ചാത്തലത്തിലുള്ള ഏതെങ്കിലും പ്രക്രിയ, അല്ലെങ്കില് സിസ്റ്റത്തിലെ താല്ക്കാലിക പ്രശ്നം എന്നിവയാണ് ഫോണിന്റെ വേഗം കുറച്ചതെങ്കില് റീസ്റ്റാര്ട്ട് ചെയ്ത ശേഷം ഫോണ് സാധാരണ നിലയിലേക്ക് മടങ്ങിയെത്താം.
അതിനാല് ഫോണ് ചെറിയ രീതിയില് സ്ലോ ആകുമ്പോഴോ അപ്ഡേറ്റിന് ശേഷം എന്തെങ്കിലും തകരാര് അനുഭവപ്പെടുമ്പോഴോ ആദ്യം ചെയ്യാവുന്ന ലളിതമായ കാര്യങ്ങളില് ഒന്നാണ് റീസ്റ്റാര്ട്ട്.
അപ്ഡേറ്റിന് ശേഷം മാത്രമല്ല, ഫോണ് വിചിത്രമായി പെരുമാറുന്ന സമയത്തും റീസ്റ്റാര്ട്ട് സഹായിക്കും. ആപ്പുകള് ശരിയായി പ്രവര്ത്തിക്കാത്തത്, കണക്ഷന് പ്രശ്നങ്ങള്, നോട്ടിഫിക്കേഷന് വൈകുന്നത് തുടങ്ങിയ ചെറിയ സോഫ്റ്റ്വെയര് പ്രശ്നങ്ങള് നേരിടുമ്പോള് അപ്ഡേറ്റ് പരീക്ഷിക്കാം.
Content Highlights :When should you restart your phone? Will restarting make the phone run faster?
