Get the latest news at
your fingertips!
Download our app now
LIVE TV
Search
ന്യൂഡൽഹി: തലസ്ഥാന നഗരിയിൽ ചെങ്കാട്ടയ്ക്ക് സമീപം നടന്ന സ്‌ഫോടനത്തിലെ പ്രധാന കണ്ണികളിലൊരാളായ ഡോ ഷെഹീനെ കുറിച്ചുള്ള കൂടുതൽ വിവരങ്ങൾ പുറത്ത് വന്നിരിക്കുകയാണ്. ഡോക്ടർ ദമ്പതിമാരായ 46കാരിയായ ഷെഹീൻ സെയ്ദിനും ഭർത്താവ് മുസമിൽ ഷക്കീലിനും ഡൽഹിയിലെ സ്‌ഫോടനത്തിന് പിന്നാലെ വൈദ്യസേവനം നൽകാനുള്ള ലൈസൻസുകൾ നഷ്ടമായിരുന്നു. 2023 സെപ്തംബറിൽ മുസമിലിനെ വിവാഹം കഴിച്ചതിന് പിന്നാലെയാണ് ഷഹീൻ ഭീകരവാദത്തിന്റെ ഭാഗമാകുന്നത്.
ലക്‌നൗവിലെ ജനസാന്ദ്രമായ ദാലിഗഞ്ചിലാണ് ഷെഹീൻ പഠിച്ച് വളർന്നത്. ബാച്ചിലർ ഓഫ് മെഡിസിൻ, ബാച്ചിലർ ഓഫ് സർജറി ബിരുദങ്ങൾ അലഹബാദിൽ നിന്നാണ് നേടിയത്. പിന്നീട് ഫാർമക്കോളജിയിൽ സ്‌പെഷ്യലൈസ് ചെയ്തു. ഇവരുടെ പിതാവ് സയിദ് അഹമ്മദ് അൻസാരി സർക്കാർ ജീവനക്കാരനാണ്.
നേത്രരോഗ വിദഗ്ധനായ ഡോ സഫർ ഹയാത്തിനെ 2003ൽ വിവാഹം കഴിച്ച ഷെഹീന്, ഈ ബന്ധത്തിൽ രണ്ട് മക്കളുണ്ട്. പക്ഷേ ഈ ബന്ധം അധികകാലം നീണ്ടുനിന്നില്ല. 2012ലായിരുന്നു വിവാഹമോചനം. എന്ത് കാരണത്തിലാണ് പിരിയാൻ അവർ തീരുമാനിച്ചതെന്ന് ഇപ്പോഴും അറിയില്ലെന്നും സന്തോഷകരമായ ജീവിതമാണ് നയിച്ചിരുന്നതെന്നും ആദ്യ ഭർത്താവ് ദേശീയ മാധ്യമത്തോട് പ്രതികരിച്ചിരുന്നു. അവർ ഇത്തരം പ്രവർത്തനങ്ങളുടെ ഭാഗമായി തീരുമെന്ന് കരുതിയില്ലെന്നാണ് ഡോ സഫറിന്റെ പ്രതികരണം. വിവാഹദിനത്തിലല്ലാതെ അവരെ ബുർഖ ധരിച്ച് കണ്ടിട്ടില്ലെന്നും അദ്ദേഹം പറയുന്നു.
ജോലിപരമായ സമ്മർദം, കരിയർ, വിദേശത്തേക്ക് പോകണമെന്ന ഷഹീന്റെ നിർബന്ധം എന്നിവ ചൂണ്ടിക്കാട്ടിയാണ് വിവാഹമോചനം തേടിയത്. ഓസട്രേലിയയിലോ യൂറോപ്പിലോ പോയി കൂടുതൽ സമ്പാദിച്ച് നന്നായി ജീവിക്കാമെന്ന് ഷെഹീൻ ആവശ്യപ്പെട്ടപ്പോൾ, നാട്ടിൽ നല്ല നിലയിൽ കുട്ടികൾക്കും പ്രിയപ്പെട്ടവർക്കുമൊപ്പം ജീവിക്കുന്നതല്ലേ നല്ലതെന്ന് താൻ ചോദിച്ചിരുന്നുവെന്നും ഡോ സഫർ പറയുന്നു. ഗണേഷ് ശങ്കർ വിദ്യാർത്ഥി മെമ്മോറിയൽ മെഡിക്കൽ കോളേജിൽ അധ്യാപികയായി ജോലി ചെയ്യുമ്പോഴായിരുന്നു വിവാഹമോചനം. എന്നാൽ ഒരറിയിപ്പുമില്ലാതെ ജോലിയിൽ നിന്ന് വിട്ടുനിന്നതിനാൽ ഇവരെ പിരിച്ചുവിട്ടു.
വിവാഹമോചനത്തിന് പിന്നാലെ ഒറ്റപ്പെട്ടെന്ന് തോന്നിയ ഷെഹീൻ ഗാസിയാബാദിൽ ടെക്‌സ്റ്റൈൽ ബിസിനസുള്ള ഒരാളെ വിവാഹം കഴിച്ചെങ്കിലും അതും വിജയിച്ചില്ല.
ഇതിനെല്ലാം ശേഷമാണ് അൽഫലാഹ് സർവകലാശാലയിൽ തന്റെ ജൂനിയറായി എത്തിയ കശ്മീരി ഡോക്ടർ മുസമിൽ ഷക്കീലിനെ ഷെഹീൻ പരിചയപ്പെടുന്നത്. ഒരുമിച്ച് ജീവിക്കാൻ തുടങ്ങിയതിന് പിന്നാലെയാണ് ഇവർ മതപരമായ പ്രവർത്തനങ്ങളിൽ പങ്കെടുക്കാൻ ആരംഭിച്ചത്. ജെയ്ഷ് ഇ മുഹമ്മദിന്റെ വനിതാ സംഘടനയായ ജമാത്ത് ഉൽ മോമിനാത്തുമായി ഇതിനിടയിൽ ഇവർ അടുത്തു. ഈ സംഘടനയുടെ പ്രവർത്തകരാണ് ഷെഹീന് പിന്നീട് പരിശീലനങ്ങൾ നൽകി വന്നത്.
ഡോക്ടർ എന്ന തന്റെ ഐഡന്റിന്റി ഉപയോഗിച്ച് ഷെഹീന് ജമ്മുകശ്മീർ, ഡൽഹി എൻസിആർ, ഹരിയാന എന്നിവിടങ്ങളിൽ യാത്ര നടത്തി ഫണ്ടുകൾ സ്വരൂപിക്കുകയും സന്ദേശങ്ങൾ കൈമാറുകയും ചെയ്തു. ജെയ്ഷ് സ്ഥാപകൻ മസൂദ് അസറിന്റെ സഹോദരി നയിക്കുന്ന ജമാത്ത് ഉൽ മോമിനാത്തിന്റെ ഇന്ത്യൻ ശാഖയ്ക്ക് നേതൃത്വം നൽകിയത് ഷെഹീനാണ്.
കഴിഞ്ഞ നാലു വർഷമായി ഷെഹീനുമായി ഒരു ബന്ധവുമില്ലെന്നാണ് ഇവരുടെ സഹോദരൻ മുഹമ്മദ് ഷോയബ് പറയുന്നത്. പഠിക്കുന്ന കാലത്ത് മിടുക്കിയായിരുന്ന ഇവർ ഇത്തരം പ്രവർത്തനങ്ങളുടെ ഭാഗമായത് കുടുംബത്തിന് ഇപ്പോഴും വിശ്വസിക്കാൻ കഴിഞ്ഞിട്ടില്ല.
Content Highlights: The Love Story of Shaheen Saeed key accused in Red Fort Incident
