LIVE TV
കോഴിക്കോട്: ഇന്സ്റ്റാഗ്രാമിലെ കുട്ടി വൈറല് താരം മുഹമ്മദ് സിയാന്റെ അക്കൗണ്ടും പൂട്ടി മെറ്റ. വൈറല് 'കുട്ടി സഖാവ്' ഇന്സ്റ്റഗ്രാം അക്കൗണ്ടും പൂട്ടിച്ച് മെറ്റ. ഇന്സ്റ്റഗ്രാമില് കുട്ടി സഖാക്കളെ പരിചയപ്പെടുത്തുന്ന വീഡിയോ ചെയ്തതിന് പിന്നാലെയാണ് അക്കൗണ്ട് പൂട്ടിയത്. വീഡിയോയ്ക്ക് പ്രതിപക്ഷ നേതാവ് പിണറായി വിജയന്, മുന് മന്ത്രി പി എ മുഹമ്മദ് റിയാസ് എംഎല്എ തുടങ്ങിയ നേതാക്കള് കമന്റ് ഇട്ടിരുന്നു. 24 മണിക്കൂറിനകം രണ്ട് മില്യണ് വ്യൂസ് വീഡിയോക്ക് ലഭിച്ചിരുന്നു. അക്കൗണ്ട് തിരിച്ചു കിട്ടാന് അപ്പീല് നല്കിയിട്ടുണ്ട്.
അടുത്തിടെ നിരവധി വാര്ത്തകളും പേജുകളും മെറ്റ നീക്കം ചെയ്യുന്നുണ്ട്. റിപ്പോര്ട്ടര് ചാനലിന്റെ നിരവധി കാര്ഡുകളാണ് മെറ്റ ഫേസ്ബുക്കില് നിന്ന് നീക്കം ചെയ്തത്. മുഖ്യമന്ത്രി വി ഡി സതീശന്റെ പേര് പരാമര്ശിക്കുന്നതും വിമര്ശിക്കുന്നതുമായ വാര്ത്തകളായിരുന്നു സോഷ്യല് മീഡിയയില് നിന്നും തുടര്ച്ചയായി മെറ്റ നീക്കിയത്. റിപ്പോര്ട്ടറിന്റേത് മാത്രമായി മുപ്പതോളം വാര്ത്താകാര്ഡുകള് മെറ്റ നീക്കിയിരുന്നു.
എന്നാല് റിപ്പോര്ട്ടറിന്റെ പോരാട്ടത്തില് മെറ്റ് സെന്സര്ഷിപ്പ് ചെയ്ത റിപ്പോര്ട്ടറിന്റെ കാര്ഡുകള് പുനഃസ്ഥാപിച്ചു. റിപ്പോര്ട്ടറിന്റെ അപ്പീലിലാണ് മെറ്റയുടെ ഇടപെടല് ഉണ്ടായത്. അകാരണമായ മീഡിയ സെന്സര്ഷിപ്പിനെതിരെ മെറ്റ ഗ്രീവന്സ് സെല്ലിന് റിപ്പോര്ട്ടര് വിശദമായ പരാതി നല്കിയിരുന്നു.
അതിനിടെ പോസ്റ്റുകള് നീക്കിയതില് കേരള പൊലീസ് മെറ്റയോട് വിവരം തേടി. ഫേസ്ബുക്ക് പോസ്റ്റുകള് മെറ്റ നീക്കിയതില് തനിക്ക് പങ്കില്ലെന്ന് മുഖ്യമന്ത്രി വാര്ത്താസമ്മേളനത്തില് വ്യക്തമാക്കിയിരുന്നു. രാഷ്ട്രീയ വിമര്ശന സ്വഭാവമുള്ള പോസ്റ്റുകള് നീക്കം ചെയ്യാന് ആവശ്യപ്പെടാറില്ലെന്ന് പൊലീസും വ്യക്തമാക്കി. തന്റെ ഓഫീസിന്റെ ഔദ്യോഗിക ഇന്സ്റ്റഗ്രാം പേജായ 'CMO Kerala' ലഭ്യമാക്കിത്തരണം എന്നകാര്യം മാത്രമാണ് ഇതുവരെ മെറ്റയോട് ആവശ്യപ്പെട്ടത്. റിക്വസ്റ്റ് നല്കിയിട്ട് രണ്ടു മാസമായെന്നും എന്നാല് മെറ്റ ഇതുവരെ അത് ശരിയാക്കി നല്കിയിട്ടില്ലെന്നും മുഖ്യമന്ത്രി ചൂണ്ടിക്കാട്ടിയിരുന്നു. താന് പറഞ്ഞിട്ടാണ് മെറ്റ ഇതെല്ലാം റിമൂവ് ചെയ്യുന്നത് എന്നുപറഞ്ഞാല് വിശ്വസിക്കാനാകുമോ എന്നും അദ്ദേഹം ചോദിച്ചിരുന്നു.
Content Highlights: Meta has disabled the Instagram accounts of child viral star Mohammed Ziyan and the popular 'Kutti Sakhav' account. The action has drawn attention among social media users.
