LIVE TV
തിരുവനന്തപുരം: സംസ്ഥാനത്ത് മഴ മുന്നറിയിപ്പില് മാറ്റം. എല്ലാ ജില്ലകളിലും മഴ മുന്നറിപ്പ് പ്രഖ്യാപിച്ച് കേന്ദ്രകാലാവസ്ഥ വകുപ്പ്. തിരുവനന്തപുരം, കൊല്ലം, ആലപ്പുഴ, തൃശൂര്, പാലക്കാട്, ജില്ലകള്ക്കാണ് പുതുതായി മുന്നറിയിപ്പ് പ്രഖ്യാപിച്ചത്. ഇതോടെ 14 ജില്ലകളിലും ഇന്ന് മഴ മുന്നറിയിപ്പുണ്ട്. എല്ലാ ജില്ലകൾക്കും യെല്ലോ അലേർട്ടാണ്.
ഗുജറാത്ത് തീരം മുതല് മധ്യകേരള തീരം വരെ രൂപപ്പെട്ട ന്യൂനമര്ദ്ദ പാത്തിയുടെ സ്വാധീനത്തെ തുടര്ന്നാണ് മഴ ശക്തമാകുന്നത്. ജൂലൈ 13 വരെ കേരളം, മാഹി എന്നിവിടങ്ങളില് ഇടത്തരം മഴയ്ക്ക് സാധ്യതയുണ്ടെന്നാണ് മുന്നറിയിപ്പ്. കേരള-കര്ണാടക-ലക്ഷദ്വീപ് തീരങ്ങളില് ഇന്ന് മത്സ്യബന്ധനത്തിന് പോകാന് പാടില്ലെന്ന് കേന്ദ്ര കാലാവസ്ഥാ വകുപ്പ് അറിയിച്ചു. 40 മുതല് 50 കിലോമീറ്റര് വരെയും ചില അവസരങ്ങളില് മണിക്കൂറില് 60 കിലോമീറ്റര് വരെയും വേഗതയില് കാറ്റിനും മോശം കാലാവസ്ഥയ്ക്കുമാണ് സാധ്യത.
അതേസമയം ഉത്തരേന്ത്യന് സംസ്ഥാനങ്ങളില് മഴക്കെടുതി തുടരുകയാണ്. ഡല്ഹിയില് ഓറഞ്ച് അലര്ട്ട് തുടരുന്നതിനിടെ സമീപ പ്രദേശങ്ങളിലും ജാഗ്രതാ നിര്ദേശം നല്കിയിട്ടുണ്ട്. മഹാരാഷ്ട്രയിലും ഗുജറാത്തിലും മഴക്കെടുതിയില് മരണം ഉയരുകയാണ്. പുനെയിലെ കെട്ടിടാപകടത്തില് കാണാതായവര്ക്കായുള്ള തെരച്ചില് ഇന്നും തുടരും. ഉത്തരാഖണ്ഡ്, ഹിമാചല് പ്രദേശ്, രാജസ്ഥാന് സംസ്ഥാനങ്ങളിലും ശക്തമായ മഴ തുടരുമെന്നാണ് മുന്നറിയിപ്പ്.
Content Highlights: The rain warning issued for Kerala has been changed as weather conditions continue to develop across the state. The updated alert provides revised information on rainfall possibilities and weather conditions.
