Get the latest news at
your fingertips!
Download our app now
LIVE TV
Search
തിരുവനന്തപുരം: കുംഭമേളയിലെ വൈറൽ പെൺകുട്ടിയുടെ വിവാഹം നടത്തിയതിൽ പഞ്ചായത്തിന് വീഴ്ചയില്ലെന്ന് പൊലീസ്. ആധാറും പാൻ കാർഡും ജനന സർട്ടിഫിക്കറ്റും പരിശോധിച്ച ശേഷമാണ് വിവാഹ രജിസ്ട്രേഷൻ നടത്തിയത്. പെൺകുട്ടി ഹാജരാക്കിയ രേഖകളിൽ 18 വയസ് തികഞ്ഞിട്ടുണ്ട്. വിവാഹം നടന്നതിൽ മറ്റ് ദുരൂഹതകളില്ലെന്നതടക്കമുള്ള അന്വേഷണ റിപ്പോർട്ട് റൂറൽ എസ് പി ഡിജിപിക്ക് കൈമാറി.
പ്രായപൂര്ത്തിയാകാത്ത കുംഭമേള വൈറല് താരത്തെ വിവാഹം ചെയ്തെന്ന കാരണത്താലാണ് പോക്സോ കുറ്റം ചുമത്തി മധ്യപ്രദേശ് പൊലീസ് ഉത്തര് പ്രദേശ് സ്വദേശി ഫര്മാൻ ഖാനെതിരെ കേസെടുത്തത്. തുടർന്നാണ് വിവാഹവുമായി ബന്ധപ്പെട്ട് കേരള പൊലീസും അന്വേഷണം ആരംഭിച്ചത്. പെണ്കുട്ടിയും വിവാഹം കഴിച്ച ഫര്മാനും തങ്ങള്ക്ക് മുന്നില് ഹാജരാക്കിയ രേഖകള് യഥാര്ത്ഥമാണെന്നാണ് വിവാഹം രജിസ്റ്റര് ചെയ്ത പൂവാര് പഞ്ചായത്ത് ഓഫീസിലെ അധികൃതര് പൊലീസിന് നല്കിയ മൊഴി. ദേശീയ പട്ടികവര്ഗ കമ്മീഷന്റെയും മധ്യപ്രദേശ് പൊലീസിന്റെയും ഇടപെടലോടെയാണ് കേരളാ പൊലീസും വിവാഹ വിവാദത്തില് അന്വേഷണം തുടങ്ങിയത്.
പെണ്കുട്ടിക്ക് 18 വയസ് തികഞ്ഞുവെന്ന് ഫര്മാന് ഹൈക്കോടതിയെ അറിയിച്ചിരുന്നു. 2025 ജൂണില് മധ്യപ്രദേശ് സര്ക്കാര് നല്കിയ ജനന സര്ട്ടിഫിക്കറ്റും ഫര്മാന് ഹൈക്കോടതിയില് ഹാജരാക്കിയിരുന്നു. ഫര്മാന് ഖാന്റെ അറസ്റ്റ് തടഞ്ഞ നടപടി ഹൈക്കോടതി നീട്ടുകയും ചെയ്തിരുന്നു. അഞ്ചാഴ്ചത്തേക്കാണ് അറസ്റ്റ് തടഞ്ഞ നടപടി ജസ്റ്റിസ് കൗസര് എടപ്പഗത്ത് അധ്യക്ഷനായ സിംഗിള് ബെഞ്ച് നീട്ടിയത്. മുഹമ്മദ് ഫര്മാനെതിരെ കേസെടുത്തോ എന്നതില് മധ്യപ്രദേശ് സംസ്ഥാന പൊലീസ് മേധാവിയില് നിന്ന് സ്ഥിരീകരണം ലഭിച്ചില്ലെന്ന് സംസ്ഥാന സര്ക്കാര് ഹൈക്കോടതിയെ അറിയിച്ചിരുന്നു. മുഹമ്മദ് ഫര്മാന്റെയും പെണ്കുട്ടിയുടെയും മുന്കൂര് ജാമ്യാപേക്ഷ ഹൈക്കോടതി അടുത്തമാസം 20ന് വീണ്ടും പരിഗണിക്കും.
കുംഭമേളയ്ക്കിടെ വൈറലായ പെൺകുട്ടിയും ഫർമാൻ ഖാനും മാർച്ച് പതിനൊന്നിനാണ് വിവാഹിതരായത്. കേരളത്തിലെത്തിയ ഇരുവരും പൂവാറിനടുത്ത് അരുമാനൂര് നൈനാര് ക്ഷേത്രത്തില് വെച്ചാണ് വിവാഹിതരായത്. വിവാഹച്ചടങ്ങില് സിപിഐഎം സംസ്ഥാന സെക്രട്ടറി എം വി ഗോവിന്ദന്, മന്ത്രി വി ശിവന്കുട്ടി, ജില്ലാ സെക്രട്ടറി വി ജോയ്, എ എ റഹിം എംപി എന്നിവര് പങ്കെടുത്തിരുന്നു. പിന്നീടാണ് ഫർമാനെതിരെ മധ്യപ്രദേശ് പൊലീസ് പോക്സോ കേസെടുത്തത്. നാഷണല് കമ്മീഷന് ഫോര് ഷെഡ്യൂള്ഡ് ട്രൈബ്സിന്റെ അന്വേഷണ റിപ്പോര്ട്ടിന്റെ അടിസ്ഥാനത്തിലായിരുന്നു കേസ്.
Content Highlights: Police say there was no lapse on the part of the panchayat in conducting the wedding of the viral girl at the Kumbh Mela
