LIVE TV
ന്യൂയോർക്ക്: ന്യൂയോര്ക്കില് നടക്കുന്ന യുഎന് പൊതുസഭയില് അമേരിക്കയെ വിമര്ശിച്ച് ഇറാന് പ്രസിഡന്റ് മസൂദ് പെസഷ്കിയാന്. ഇറാന് ഭീകരതയുടെ ഇരയാണെന്ന് പ്രസിഡന്റ് തുറന്നടിച്ചു. പൊതുസഭയെ അഭിസംബോധന ചെയ്ത് സംസാരിച്ച മസൂദ് പെസഷ്കിയാന് ഇറാൻ നയതന്ത്രത്തിലേക്കുള്ള വാതില് തുറന്നിട്ടിരിക്കുകയാണെന്നും വ്യക്തമാക്കി.
അമേരിക്ക അന്താരാഷ്ട്ര നിയമങ്ങള് ലംഘിക്കുകയാണെന്നും ഇറാന് പ്രസിഡന്റ് ചൂണ്ടിക്കാട്ടി. ഇറാന് വേണ്ടത് ആണവോര്ജ്ജം മാത്രമാണെന്നും അണുബോംബ് നിര്മ്മിക്കാന് ഉദ്ദേശിക്കുന്നില്ലെന്നും അദ്ദേഹം വ്യക്തമാക്കി. ഹോര്മൂസ് കടലിടുക്കിലൂടെ ആയുധങ്ങള് കടത്താനാവില്ലെന്നും അമേരിക്കയുടെ ഭീഷണിക്ക് ഇറാന് വഴങ്ങില്ലെന്നും പെസഷ്കിയാന് വ്യക്തമാക്കി.
ആയത്തുള്ള അലി ഖമനയിയുടെ ചിത്രവും മിനാബ് സ്കൂള് ആക്രമണത്തില് കൊല്ലപ്പെട്ട കുട്ടികളുടെ ചിത്രങ്ങളും ഉയര്ത്തിക്കാട്ടിക്കൊണ്ടാണ് പെസഷ്കിയാന് പ്രസംഗിച്ചത്. 'യാതൊരു കാരണവും ഇല്ലാതെ പരമോന്നത നേതാവ് വധിക്കപ്പെട്ട ഒരു രാജ്യത്ത് നിന്നാണ് ഞാന് വരുന്നത്. നിങ്ങള് ഈ കുട്ടികളേ കാണുന്നുണ്ടോ? യു എസും ഇസ്രയേലും സ്കൂളിനുനേരെ ബോംബെറിഞ്ഞ് കൊലപ്പെടുത്തിയതാണ് ഈ കുട്ടികളെ. ഞങ്ങളുടെ കുട്ടികളെയും ജനങ്ങളെയും അവർ ഇല്ലാതാക്കി. അവർ ഭീകരവാദികളാണ്. നിഷ്കളങ്കരായ ജനങ്ങളെ അവർ കൊന്നുകളഞ്ഞു. എന്നിട്ട് ഞങ്ങളെ ഭീകരവാദികൾ എന്ന് വിളിക്കുന്നു. ഞങ്ങൾ പ്രതിരോധിക്കുക മാത്രമാണ് ചെയ്യുന്നത്. ഇപ്പോൾ അവർ ഞങ്ങളുടെ ജലപാത ഉപരോധിക്കുന്നു. ഇറാൻ പ്രതിരോധിക്കും ഞങ്ങൾ ആരുടെയും മുന്നിൽ മുട്ടുകുത്തില്ല',
ഇറാന് പ്രസിഡന്റ് പറഞ്ഞു.
യുഎസിന്റെ ബലപ്രയോഗത്തിൻ്റെ ഭാഷ ഇറാന് അംഗീകരിക്കില്ലെന്നും നയതന്ത്രത്തിനും ചര്ച്ചകള്ക്കും തയ്യാറെന്നും അദ്ദേഹം പറഞ്ഞു. അതിക്രമങ്ങള്ക്ക് മുന്നില് തല കുനിക്കില്ലെന്നും ബാഹ്യസമ്മര്ദ്ദങ്ങള്ക്ക് മുന്നില് വഴങ്ങില്ലെന്നും ഇറാന് പ്രഖ്യാപിച്ചു. പരമാധികാരം സംരക്ഷിക്കാന് രാജ്യം പ്രതിജ്ഞാബദ്ധരാണെന്നും ഇറാന് പറഞ്ഞു. ഉപരോധങ്ങള്ക്കും ഭീഷണികള്ക്കും മുന്നില് പതറില്ലെന്നാണ് പ്രസിഡന്റ് വ്യക്തമാക്കിയത്. രാജ്യത്തിന്റെ സുരക്ഷയില് വിട്ടുവീഴ്ചയില്ലെന്നും ജനങ്ങളുടെ ആത്മാഭിമാനം സംരക്ഷിക്കുമെന്നും ഇറാന് പ്രസിഡന്റ് മസൂദ് പെസഷ്കിയാന് ആവര്ത്തിച്ച് പറഞ്ഞു.
പശ്ചിമേഷ്യന് സംഘര്ഷത്തില് മാസങ്ങള്ക്ക് ശേഷം അമേരിക്കയും ഇറാനും തമ്മിലുള്ള നേരിട്ടുള്ള ചര്ച്ചകള് ആരംഭിച്ചത്. യുദ്ധം അവസാനിപ്പിക്കുന്നതിനുള്ള ധാരണകളിൽ ഇരുപക്ഷവും എത്തിച്ചേരുമോ എന്നാണ് ലോകം ആകാംക്ഷയോടെ ഉറ്റുനോക്കുന്നത്. ന്യൂയോര്ക്കില് നടക്കുന്ന യുഎന് ജനറല് അസംബ്ലിക്കിടെയാണ് ചര്ച്ചകള് പുരോഗമിക്കുന്നത്. യുഎന് ജനറല് അസംബ്ലിക്കിടെ ഇറാന് വിദേശകാര്യ മന്ത്രി അബ്ബാസ് അരാഗ്ചിയും യുഎസ് പ്രതിനിധികളായ സ്റ്റീവ് വിറ്റ്കോഫും ജാരെഡ് കുഷ്നറും മധ്യസ്ഥര് വഴി ചര്ച്ചകള് നടത്തിയിരുന്നു. ജൂലൈയില് ഒരു ഇടക്കാല വെടിനിര്ത്തല് കരാര് തകര്ന്നതിനുശേഷം ആദ്യമായാണ് ഇരുരാജ്യങ്ങളും നേരിട്ട് ചര്ച്ചയില് ഏര്പ്പെടുന്നത്.
Content Highlights: Iranian President Masoud Pezeshkian told the UN General Assembly that Iran has been a victim of terrorism and will not bow to threats or pressure
