LIVE TV
ബാലണ്‍ ദ് ഓർ പുരസ്കാര ചടങ്ങിൽ ബാഴ്‌സലോണയുടെ സ്പാനിഷ് യുവതാരം ലമീൻ യമാലിനെ തമാശരൂപേണ കളിയാക്കി മുൻ ഫ്രഞ്ച് ഇതിഹാസം തിയറി ഹെൻറി. ലോകത്തിലെ മികച്ച യുവതാരത്തിനുള്ള കോപ ട്രോഫി തുടർച്ചയായ മൂന്നാം തവണയും ഏറ്റുവാങ്ങാൻ വേദിയിലെത്തിയപ്പോഴായിരുന്നു യമാലിനോട് ഹെൻറിയുടെ അപ്രതീക്ഷിത ചോദ്യം.
ഹാരി കെയ്ൻ ആദ്യ ബാലൺ ഡി ഓർ പുരസ്കാരം സ്വന്തമാക്കിയ ചടങ്ങിൽ റയൽ മാഡ്രിഡിന്‍റെ കിലിയൻ എംബാപ്പെ രണ്ടാമതും യമാൽ മൂന്നാമതുമാണ് എത്തിയത്. ഇത്തവണ ബാലൺ ഡി ഓർ പുരസ്കാരത്തിനായി ശക്തമായി രംഗത്തുണ്ടായിരുന്ന യമാൽ, താൻ എന്തുകൊണ്ട് ഈ പുരസ്കാരത്തിന് അർഹനാകുന്നു എന്ന് പല അഭിമുഖങ്ങളിലും വ്യക്തമാക്കിയിരുന്നു.
എന്നാൽ പ്രധാന പുരസ്കാരത്തിന് പകരം വീണ്ടും കോപ ട്രോഫി ലഭിച്ചതിന് പിന്നാലെയാണ് ബാഴ്‌സലോണയുടെ മുൻ താരം കൂടിയായ ഹെൻറി ട്രോളുമായി രംഗത്തെത്തിയത്. ഇത് നിന്‍റെ മൂന്നാമത്തെ കോപ ട്രോഫിയല്ലേ? എന്നാൽ, ഇതാണോ നീ ശരിക്കും ആഗ്രഹിച്ച പുരസ്കാരം? എന്ന ഹെൻറിയുടെ ചോദ്യം 19-കാരനായ യമാലിനെ വേദിയിൽ അൽപ്പം അസ്വസ്ഥനാക്കി.
പുരസ്കാരം ഏറ്റുവാങ്ങിയ ശേഷം സംസാരിച്ച യമാൽ, ഈ ട്രോഫി ബാഴ്‌സലോണയിലെ തന്‍റെ സഹതാരം പൗ കുബാർസിക്ക് ലഭിക്കണമായിരുന്നുവെന്ന് അഭിപ്രായപ്പെട്ടു.
2025-26 സീസണിൽ ബാഴ്‌സലോണയ്ക്കും സ്പെയിൻ ദേശീയ ടീമിനുമായി ഉജ്ജ്വല പ്രകടനമാണ് യമാൽ പുറത്തെടുത്തത്. ബാഴ്‌സലോണയ്ക്കായി കളിച്ച 45 മത്സരങ്ങളിൽ നിന്ന് 24 ഗോളുകളും 18 അസിസ്റ്റുകളും താരം നേടി. ക്ലബ്ബിന്റെ ലാ ലിഗ, സ്പാനിഷ് സൂപ്പർ കപ്പ് വിജയങ്ങളിൽ നിർണായക പങ്കുവഹിച്ച യമാൽ സ്പെയിൻ ലോകകപ്പ് കിരീടം ചൂടിയപ്പോൾ എട്ട് മത്സരങ്ങളിൽ കളത്തിലിറങ്ങി ഒരു ഗോളും യമാൽ സ്വന്തം പേരിൽ കുറിച്ചിരുന്നു.
content highlights: thierry henry lamine yamal ballon dor ceremony interaction
