LIVE TV
ബംഗ്ലാദേശിനെതിരായ ഒന്നാം ടെസ്റ്റിലെ നാണംകെട്ട തോൽവിക്ക് പിന്നാലെ പ്രതികരണവുമായി ഓസ്ട്രേലിയൻ ക്യാപ്റ്റൻ പാറ്റ് കമ്മിൻസ്. ബാറ്റിങ്ങിലെ കൂട്ടത്തകർച്ചയാണ് പരാജയത്തിന് കാരണമായതെന്ന് കമ്മിൻസ് പറഞ്ഞു. ബംഗ്ലാദേശ് തങ്ങളെ എല്ലാ അർത്ഥത്തിലും തങ്ങളെ നിഷ്പ്രഭരാക്കിയെന്നും കമ്മിൻസ് കൂട്ടിച്ചേർത്തു.
'മത്സരത്തിന്റെ ഒന്നാം ദിവസം തന്നെയാണ് ഞങ്ങൾക്ക് പിഴച്ചത്. ഞങ്ങളുടെ തയ്യാറെടുപ്പുകൾ മികച്ചതായിരുന്നു, അതിനാൽ മറ്റ് ഒഴിവുകഴിവുകളൊന്നുമില്ല. ബംഗ്ലാദേശ് വളരെ നന്നായി കളിച്ചു.
ഒന്നാം ദിനത്തിലെ പിച്ചിൽ ബാറ്റിങ് അല്പം ദുഷ്കരമായിരുന്നു, എന്നാൽ ഞങ്ങൾ കുറച്ചുകൂടി സമയം ക്രീസിൽ ചെലവഴിക്കേണ്ടതായിരുന്നു. ബൗളിങ്ങിലും വേണ്ടത്ര പ്രതിരോധം തീർക്കാനായില്ല. മികച്ച തുടക്കം ലഭിച്ചിട്ടും അത് മുതലാക്കാൻ ബാറ്റർമാർക്ക് കഴിഞ്ഞില്ല', മത്സരശേഷം കമ്മിൻസ് പറഞ്ഞു.
ബംഗ്ലാദേശിനെതിരായ ഒന്നാം ടെസ്റ്റിൽ ഒമ്പത് വിക്കറ്റിന്റെ തോൽവിയാണ് ഓസ്ട്രേലിയ വഴങ്ങിയത്. ഓസ്ട്രേലിയൻ മണ്ണിൽ ഏറ്റവും വേഗത്തിൽ കന്നി ടെസ്റ്റ് വിജയം നേടുന്ന ഏഷ്യൻ രാജ്യമായും ഇതോടെ ബംഗ്ലാദേശ് മാറി.
ഇന്ത്യയ്ക്കും പാകിസ്താനും ശ്രീലങ്കയ്ക്കുമൊന്നുമില്ലാത്ത റെക്കോർഡാണ് ഇത്. ഓസ്ട്രേലിയൻ മണ്ണിൽ തങ്ങളുടെ മൂന്നാമത്തെ മാത്രം ടെസ്റ്റ് മത്സരത്തിലാണ് ബംഗ്ലാദേശ് ഈ ചരിത്ര വിജയം സ്വന്തമാക്കിയത്.
content highlights: pat cummins reacts to australia shameful loss against bangladesh
