Get the latest news at
your fingertips!
Download our app now
LIVE TV
Search
ദക്ഷിണാഫ്രിക്കയ്ക്കെതിരായ ഒന്നാം ഏകദിനത്തിലെ വിജയത്തിന് പിന്നാലെ പ്രതികരണവുമായി ഇന്ത്യൻ ക്യാപ്റ്റൻ കെ എൽ രാഹുൽ. വിരാട് കോഹ്‍ലിയും രോഹിത് ശർമയും അവർ ആരാണെന്നും എന്താണെന്നും വീണ്ടും വീണ്ടും തെളിയിച്ചുകൊണ്ടിരിക്കുകയാണെന്ന് രാഹുൽ മത്സരശേഷം പറഞ്ഞു. എപ്പോഴും അവരുടെ ക്രിക്കറ്റ് ആസ്വദിക്കുന്നത് സന്തോഷമുള്ള കാര്യമാണെന്നും രാഹുൽ കൂട്ടിച്ചേർത്തു.
മത്സരത്തിൽ എപ്പോഴെങ്കിലും പരിഭ്രമം ഉണ്ടായോ എന്നായിരുന്നു ഇന്ത്യൻ ക്യാപ്റ്റൻ നേരിട്ട ആദ്യ ചോദ്യം. 'ഉണ്ടായിരുന്നില്ല എന്ന് പറഞ്ഞാൽ ഞാൻ കള്ളം പറയുന്നതിന് തുല്യമാകും. ഏകദിന ക്രിക്കറ്റിൽ ഒരു ഇടവേളയ്ക്ക് ശേഷമാണ് ഞാൻ കളിക്കുന്നത്. ഇന്ത്യൻ ക്യാപ്റ്റൻ എന്ന സ്ഥാനം ലഭിക്കുമ്പോൾ അത് നൽകിയവർക്ക് പ്രതീക്ഷകളുണ്ടാകും. അതുകൊണ്ട്, കുറച്ച് പരിഭ്രമം ഉണ്ടായിരുന്നു. പക്ഷേ, കൃത്യമായ ഇടവേളകളിൽ ഇന്ത്യൻ ബൗളർമാർക്ക് വിക്കറ്റുകൾ വീഴ്ത്താൻ സാധിച്ചു. എങ്കിലും ദക്ഷിണാഫ്രിക്ക തീർച്ചയായും ഇന്ത്യയെ സമ്മർദ്ദത്തിലാക്കി. മത്സരം ആവേശകരമായിരുന്നുവെന്നും രാഹുൽ പ്രതികരിച്ചു.
താൻ ആറാം നമ്പറിൽ ബാറ്റ് ചെയ്യുന്നത് ടീമിന് വേണ്ടിയാണെന്നും രാഹുൽ പറഞ്ഞു. കഴിഞ്ഞ 2-3 ഏകദിന പരമ്പരകളിലായി എന്റെ ജോലി അതാണ്. ഞാൻ കഴിവിൻ്റെ പരമാവധി ശ്രമിക്കുന്നു. വ്യത്യസ്തമായ ഉത്തരവാദിത്തങ്ങൾ സന്തോഷം നൽകുന്നുണ്ട്,' രാഹുൽ പറഞ്ഞു.
'വിരാട് കോഹ്‍ലിയും രോഹിത് ശർമയും സ്വതന്ത്രരായി കളിക്കുന്നത് കാണാൻ എപ്പോഴും രസകരമാണ്. അവരുടെ കരിയറിലുടനീളം അവർ അത് തന്നെയാണ് ചെയ്തത്. എതിർ ടീമുകളെ സമ്മർദ്ദത്തിലാക്കി. ചില സമയങ്ങളിൽ എതിരാളികളെ നിസ്സഹായരാക്കി. അവർ ആരാണെന്ന് ലോകത്തിന് കാണിച്ചു കൊടുത്തു. എന്നെ സംബന്ധിച്ചിടത്തോളം, ഞാൻ ഇത് വളരെക്കാലമായി കാണുന്നതാണ്. ഡ്രസ്സിംഗ് റൂമിൽ കോഹ്‍ലിയെയും രോഹിത്തിനെയും കാണുന്നത് കൂടുതൽ സന്തോഷകരമാണ്. എൻ്റെ ക്രിക്കറ്റ് ജീവിതം മുഴുവൻ അവരോടൊപ്പമാണ് കളിച്ചിട്ടുള്ളത്. അതിനാൽ ഇരുവരും ടീമിലുള്ളത് വലിയ സന്തോഷമാണ്,' രാഹുൽ വ്യക്തമാക്കി.
ദക്ഷിണാഫ്രിക്കയ്ക്കെതിരായ ഒന്നാം ഏകദിനത്തിൽ ഇന്ത്യ 17 റൺസിനാണ് വിജയിച്ചത്. മത്സരത്തിൽ ആദ്യം ബാറ്റ് ചെയ്ത ഇന്ത്യ നിശ്ചിത 50 ഓവറിൽ എട്ട് വിക്കറ്റ് നഷ്ടത്തിൽ 349 റൺസെടുത്തു. ദക്ഷിണാഫ്രിക്കയുടെ മറുപടി 49.2 ഓവറിൽ 332 റൺസിൽ അവസാനിച്ചു. വിജയലക്ഷ്യത്തിലേക്ക് ബാറ്റുവെച്ച ദക്ഷിണാഫ്രിക്ക മൂന്നിന് 11 എന്നും പിന്നീട് അഞ്ച് വിക്കറ്റ് നഷ്ടത്തിൽ 130 റൺസെന്നും തകർന്നതിന് ശേഷമാണ് 332 എന്ന സ്കോറിലേക്കെത്തിയത്. മുൻനിരയുടെ സംഭാവനകൂടിയുണ്ടായിരുന്നെങ്കിൽ മത്സരഫലം മറ്റൊന്നാകുമായിരുന്നു.
Content Highlights: Virat Kohli and Rohit Sharma continues to show them says Rahul
