LIVE TV
ദക്ഷിണാഫ്രിക്കയ്ക്കെതിരായ രണ്ടാം ടെസ്റ്റിൽ ഇന്ത്യൻ ടീമിൽ രണ്ട് മാറ്റങ്ങളുണ്ടായേക്കുമെന്ന് റിപ്പോർട്ട്. പരിക്കേറ്റ ഇന്ത്യൻ ക്യാപ്റ്റൻ ശുഭ്മൻ ഗില്ലും ബൗളിങ് ഓൾറൗണ്ടർ അക്സർ പട്ടേലുമാണ് ഇന്ത്യൻ നിരയിൽ നിന്ന് ഒഴിവാകുക. പകരമായി സായി സുദർശനും ബാറ്റിങ് ഓൾറൗണ്ടർ നിതീഷ് കുമാർ റെഡ്ഡിയും ഇന്ത്യൻ ടീമിൽ കളിക്കും.
ഒന്നാം ടെസ്റ്റിനിടെ കഴുത്തിന് പരിക്കേറ്റതാണ് ഇന്ത്യൻ ക്യാപ്റ്റൻ ശുഭ്മൻ ഗില്ലിന് തിരിച്ചടിയാകുന്നത്. പരിക്കിനെ തുടർന്ന് താരത്തിന് ഡോക്ടർമാർ വിശ്രമം നിർദ്ദേശിച്ചിരിക്കുകയാണ്. ഇതോടെ ഗിൽ രണ്ടാം ടെസ്റ്റ് കളിക്കില്ലെന്ന് ഏകദേശം ഉറപ്പായി. ഗില്ലിന് പകരം വൈസ് ക്യാപ്റ്റൻ റിഷഭ് പന്ത് രണ്ടാം ടെസ്റ്റിൽ ഇന്ത്യൻ ടീമിനെ നയിക്കും.
കൊൽക്കത്തയിൽ നടന്ന ആദ്യ ടെസ്റ്റിൽ ഇന്ത്യൻ ടീമിൽ നാല് സ്പിന്നർമാരാണ് കളിച്ചത്. അതിനാൽ സായി സുദർശന് സ്ഥാനം നഷ്ടമായി. ഗുവാഹത്തിൽ നടക്കുന്ന രണ്ടാം ടെസ്റ്റിൽ സ്പിൻ നിരയിൽ നിന്നും ഇന്ത്യ അക്സർ പട്ടേലിനെ ഒഴിവാക്കും. ഇതോടെ സായിക്ക് തിരിച്ച് ടീമിലെത്താൻ സാധിക്കും. പരിക്കേറ്റ ഗില്ലിന്റെ ഒഴിവിൽ നിതീഷ് കുമാർ റെഡ്ഡിയും കളിക്കും.
നവംബർ 22 മുതൽ 26 വരെ അസാമിന്റെ തലസ്ഥാനമായ ഗുവാഹത്തിയിലാണ് ഇന്ത്യയും ദക്ഷിണാഫ്രിക്കയും തമ്മിലുള്ള രണ്ടാം ടെസ്റ്റ് നടക്കുക. ഈഡൻ ഗാർഡനിൽ നടന്ന ആദ്യ ടെസ്റ്റിൽ ദക്ഷിണാഫ്രിക്ക വിജയിച്ചിരുന്നു. രണ്ടാം ടെസ്റ്റ് വിജയിച്ച് പരമ്പര സമനിലയിലാക്കാനാവും ഇന്ത്യൻ ടീമിന്റെ ശ്രമം.
ദക്ഷിണാഫ്രിക്കയ്ക്കെതിരായ ടെസ്റ്റ് പരമ്പരയ്ക്കുള്ള ഇന്ത്യൻ ടീം: ശുഭ്മൻ ഗിൽ (ക്യാപ്റ്റൻ), റിഷഭ് പന്ത് (വിക്കറ്റ് കീപ്പർ, വൈസ് ക്യാപ്റ്റൻ), യശസ്വി ജയ്സ്വാൾ, കെ എൽ രാഹുൽ, സായി സുദർശൻ, ദേവ്ദത്ത് പടിക്കൽ, ധ്രുവ് ജുറേൽ, രവീന്ദ്ര ജഡേജ, വാഷിങ്ടൺ സുന്ദർ, ജസ്പ്രീത് ബുംമ്ര, അക്സർ പട്ടേൽ, മുഹമ്മദ് സിറാജ്, കുൽദീപ് യാദവ്, ആകാശ് ദീപ്, നിതീഷ് കുമാർ റെഡ്ഡി.
Content Highlights: India set to make two changes in Guwahati test
