Get the latest news at
your fingertips!
Download our app now
LIVE TV
Search
കേരള ക്രിക്കറ്റ് ലീഗില്‍ ട്രിവാന്‍ഡ്രം റോയല്‍സിനെതിരെ ആലപ്പി റിപ്പിള്‍സിന് വിജയം. മൂന്ന് വിക്കറ്റിനാണ് ട്രിവാന്‍ഡ്രം റോയല്‍സിനെ ആലപ്പി റിപ്പിൾസ് പരാജയപ്പെടുത്തിയത്. ട്രിവാന്‍ഡ്രം ഉയര്‍ത്തിയ 179 റണ്‍സ് വിജയലക്ഷ്യം രണ്ടുപന്തുകള്‍ ബാക്കിനില്‍ക്കേ ഏഴ് വിക്കറ്റ് നഷ്ടത്തില്‍ ആലപ്പി മറികടന്നു. അര്‍ധസെഞ്ച്വറി തികച്ച മുഹമ്മദ് കൈഫാണ് ആലപ്പിക്കായി തിളങ്ങിയത്. മുഹമ്മദ് കൈഫ് പുറത്താകാതെ 30 പന്തിൽ 66 റൺസെടുത്തു.
ട്രിവാന്‍ഡ്രം ഉയര്‍ത്തിയ 179 റണ്‍സ് വിജയലക്ഷ്യം മറികടക്കാനിറങ്ങിയ ആലപ്പിയുടെ തുടക്കം തകര്‍ച്ചയോടെയായിരുന്നു. 29 റണ്‍സിനിടെ ആലപ്പിക്ക് മൂന്ന് വിക്കറ്റുകള്‍ നഷ്ടമായി. അക്ഷയ് ചന്ദ്രന്‍ (3), ജലജ് സക്‌സേന (17), അഭിഷേക് പി നായര്‍ (0) എന്നിവരെയാണ് ആലപ്പിക്ക് തുടക്കം തന്നെ നഷ്ടമായത്. എന്നാല്‍ ക്യാപ്റ്റൻ മുഹമ്മദ് അസ്ഹറുദ്ദീന്‍ ടീമിന്റെ രക്ഷാപ്രവർത്തിനെത്തി. ക്രീസില്‍ നിലയുറപ്പിച്ച് ബാറ്റേന്തിയ ക്യാപ്റ്റൻ ആലപ്പിയെ മുന്നോട്ടുനയിച്ചു. അരുണ്‍ കെഎയും ഭേദപ്പെട്ട പ്രകടനം കാഴ്ചവെച്ചു. എന്നാൽ 22 പന്തില്‍ നിന്ന് 38 റണ്‍സെടുത്ത അസ്ഹറുദ്ദീന്റെയും 19 റണ്‍സെടുത്ത അരുണിന്റെയും വിക്കറ്റുകള്‍ വീഴ്ത്തി ട്രിവാന്‍ഡ്രം തിരിച്ചടിച്ചു.
ആറാം വിക്കറ്റില്‍ ഒരുമിച്ച അക്ഷയ് ടികെ- മുഹമ്മദ് കൈഫ് സഖ്യം അലപ്പിയെ വീണ്ടും കരകയറ്റി. അവസാന ഓവറുകളില്‍ കൈഫ് വെടിക്കെട്ട് ബാറ്റിങ് പുറത്തെടുത്ത ട്രിവാന്‍ഡ്രം പരാജയം മണത്തുതുടങ്ങി. അക്ഷയ് ടികെ 24 റണ്‍സെടുത്ത് പുറത്തായി. കൈഫ് 30 പന്തില്‍ 66 റണ്‍സെടുത്ത് പുറത്താവാതെ നിന്നു. ട്രിവാന്‍ഡ്രത്തിനായി ബേസില്‍ തമ്പി രണ്ട് വിക്കറ്റെടുത്തു.
ആദ്യം ബാറ്റുചെയ്ത ട്രിവാന്‍ഡ്രം റോയല്‍സ് നിശ്ചിത 20 ഓവറില്‍ അഞ്ച് വിക്കറ്റ് നഷ്ടത്തില്‍ 178 റണ്‍സാണ് അടിച്ചെടുത്തത്. ക്യാപ്റ്റൻ കൃഷ്ണ പ്രസാദിന്റെ ബാറ്റിങ് മികവിലാണ് ട്രിവാന്‍ഡ്രം റോയല്‍സ് ആലപ്പി റിപ്പിള്‍സിന് മുന്നില്‍ പൊരുതാവുന്ന സ്‌കോര്‍ ഉയർത്തിയത്. തുടർച്ചയായ രണ്ടാം മത്സരത്തിലും അര്‍ധ സെഞ്ച്വറിയുമായി മുന്നില്‍ നിന്നു നയിക്കാൻ കൃഷ്ണ പ്രസാദിന് സാധിച്ചു.
കൃഷ്ണ പ്രസാദ് 53 പന്തില്‍ 3 സിക്‌സും 4 ഫോറും സഹിതം 67 റണ്‍സുമായി പുറത്താകാതെ നിന്നു. 4 സിക്‌സുകള്‍ സഹിതം 31 പന്തില്‍ 44 റണ്‍സ് വാരിയ നിഖില്‍ എം, 22 പന്തില്‍ 3 സിക്‌സും ഒരു ഫോറും സഹിതം 31 റണ്‍സെടുത്ത അബ്ദുല്‍ ബാസിത് എന്നിവര്‍ ക്യാപ്റ്റനെ പിന്തുണച്ചു. 4 പന്തില്‍ രണ്ടണ്ണം സിക്‌സിലേക്ക് പായിച്ച് അഭിജിത് പ്രവീണും സ്‌കോറിലേക്ക് നിര്‍ണായക സംഭാവന നല്‍കി.
Content Highlights: Kerala Cricket League: Alleppey Ripples beats Adani Trivandrum Royals
