LIVE TV
മലപ്പുറം: എടവണ്ണയിൽ റോഡിലെ വെള്ളക്കെട്ടിൽ ഓട്ടോ മറിഞ്ഞ് ഡ്രൈവർക്ക് ദാരുണാന്ത്യം. വഴിക്കടവ് മണിമൂളി സ്വദേശി യൂനുസ് ആണ് മരിച്ചത്. അപകടത്തിന് പിന്നാലെ നാട്ടുകാർ റോഡ് ഉപരോധിച്ചു. റോഡ് നിർമ്മാണത്തിലെ ആശാസ്ത്രീയതയാണ് അപകടത്തിന് കാരണമെന്ന് ആരോപിച്ചാണ് റോഡ് ഉപരോധിച്ചത്.
ഇന്ന് പുലർച്ചെ വിമാനത്താവളത്തിലേക്ക് യാത്രക്കാരുമായി പോകുമ്പോഴാണ് അപകടം. ബ്രേക്കിട്ടപ്പോൾ നിയന്ത്രണം വിട്ട് ഓട്ടോ വെള്ളക്കെട്ടിലേക്ക് മറിയുകയായിരുന്നു. ഓട്ടോയുടെ അടിയിൽ പെട്ട യുനുസിനെ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. ഓട്ടോയിൽ ഉണ്ടായിരുന്ന മറ്റ് യാത്രക്കാരെ പരിക്കുകളോടെ ആശുപത്രിയിലേക്ക് മാറ്റി. അപകടത്തിന് പിന്നാലെ നാട്ടുകാർ റോഡ് ഉപരോധിച്ചു. എടവണ്ണ നിലമ്പൂർ റോഡ് ആണ് ഉപരോധിച്ചത്. റോഡ് നിർമ്മാണത്തിലെ ആശാസ്ത്രീയതയാണ് അപകടത്തിന് കാരണമെന്ന് ആരോപിച്ചാണ് റോഡ് ഉപരോധിച്ചത്.
നിരവധി തവണ പൊതുമരാമത്ത് വകുപ്പിനും പോലീസിനും പരാതി നൽകിയങ്കിലും പരിഹാരം ഉണ്ടായിട്ടില്ലെന്നാണ് നാട്ടുകാരുടെ പരാതി. ഇതേ സ്ഥലത്ത് മുൻപും സമാനമായ അപകടങ്ങൾ നടന്നിട്ടുണ്ടെന്നും നാട്ടുകാർ പറയുന്നു.
