LIVE TV
സൗദി അറേബ്യയുടെ സ്വകാര്യ നിക്ഷേപ വിപണിയിലേക്ക് വിദേശ മൂലധനം വൻതോതിൽ ഒഴുകിയെത്തുന്നതായി റിപ്പോർട്ട്. സൗദി വെഞ്ച്വർ കാപ്പിറ്റൽ കമ്പനി പുറത്തുവിട്ട ഏറ്റവും പുതിയ കണക്കുകൾ പ്രകാരം, 2025-ൽ മാത്രം 2,000 കോടി സൗദി റിയാൽ (ഏകദേശം 20,000 കോടിയിലധികം ഇന്ത്യൻ രൂപ) വിദേശ നിക്ഷേപമായി രാജ്യത്തേക്ക് എത്തിയിട്ടുണ്ട്. ഇത് സൗദിയിലെ ആകെ സ്വകാര്യ നിക്ഷേപത്തിന്റെ 60 ശതമാനത്തോളം വരുമെന്നാണ് റിപ്പോർട്ടുകൾ വ്യക്തമാക്കുന്നത്. രാജ്യത്ത് നടപ്പിലാക്കിക്കൊണ്ടിരിക്കുന്ന സാമ്പത്തിക പരിഷ്കാരങ്ങളും നിയമങ്ങളുടെ ആധുനികവത്ക്കരണവുമാണ് അന്താരാഷ്ട്ര നിക്ഷേപകരെ സൗദിയിലേക്ക് കൂടുതൽ ആകർഷിക്കുന്നത്.
മിഡിൽ ഈസ്റ്റിലെയും വടക്കേ ആഫ്രിക്കയിലെയും ഏറ്റവും സജീവമായ നിക്ഷേപ കേന്ദ്രമായി സൗദി അറേബ്യ അതിവേഗം മാറിക്കൊണ്ടിരിക്കുകയാണെന്ന് "ഫോറിൻ ഇൻവെസ്റ്റ്മെന്റ് ഇൻ സൗദി അറേബ്യാസ് പ്രൈവറ്റ് മാർക്കറ്റ്സ്" എന്ന പേരിൽ പുറത്തിറക്കിയ ഈ റിപ്പോർട്ട് വ്യക്തമാക്കുന്നു. അമേരിക്ക, യൂറോപ്പ്, ഏഷ്യ എന്നിവിടങ്ങളിൽ നിന്നുള്ള 150-ഓളം പ്രമുഖ ഇൻവെസ്റ്റ്മെന്റ് കമ്പനികളാണ് ഇപ്പോൾ സൗദി വിപണിയിൽ സജീവമായി പങ്കാളികളാകുന്നത്. സുരക്ഷിതമായ വിപണി സാഹചര്യങ്ങളും മികച്ച പ്രാദേശിക പങ്കാളികളുടെ സാന്നിധ്യവും നിക്ഷേപകർക്ക് രാജ്യത്തുള്ള വിശ്വാസം ഇരട്ടിയാക്കിയിട്ടുണ്ട്.
2019 മുതൽ ഇതുവരെ 4,000 കോടിയിലധികം റിയാലിന്റെ വിദേശ സ്വകാര്യ നിക്ഷേപമാണ് സൗദിയിലേക്ക് ഒഴുകിയെത്തിയത്. വിദേശ നിക്ഷേപകരുടെ എണ്ണത്തിൽ അഞ്ചിരട്ടിയിലധികം വർദ്ധനവാണ് രേഖപ്പെടുത്തിയിരിക്കുന്നത്. അതായത്, 2019-ൽ വെറും 28 വിദേശ നിക്ഷേപകർ മാത്രമുണ്ടായിരുന്ന സ്ഥാനത്ത് 2025 ആയപ്പോഴേക്കും ഇത് 148 ആയി ഉയർന്നു.
തുടർച്ചയായ മൂന്നാം വർഷവും മിഡിൽ ഈസ്റ്റിലെ ഏറ്റവും വലിയ വെഞ്ച്വർ ക്യാപ്പിറ്റൽ വിപണിയായി സൗദി അറേബ്യ തങ്ങളുടെ സ്ഥാനം നിലനിർത്തിയിട്ടുണ്ട്. മുൻപ് ഫിൻടെക്, ഇ-കൊമേഴ്സ് എന്നീ മേഖലകളിൽ മാത്രമായി ഒതുങ്ങിനിന്നിരുന്ന നിക്ഷേപങ്ങൾ ഇപ്പോൾ ഹെൽത്ത് കെയർ, എന്റർപ്രൈസ് സോഫ്റ്റ്വെയർ, എഡ്യൂക്കേഷൻ ടെക്നോളജി, ഭക്ഷ്യ-പാനീയ മേഖലകൾ, ലോജിസ്റ്റിക്സ് തുടങ്ങിയ വൈവിധ്യമാർന്ന രംഗങ്ങളിലേക്ക് വ്യാപിക്കുകയാണ്.
സ്ഥിരതയാർന്ന സമ്പദ്വ്യവസ്ഥ, ആധുനിക നിയമസംവിധാനങ്ങൾ, ശക്തമായ വിപണി അടിസ്ഥാന സൗകര്യങ്ങൾ, ഗവൺമെന്റിന്റെ പിന്തുണ തുടങ്ങിയ ഘടകങ്ങളാണ് ഈ കുതിച്ചുചാട്ടത്തിന് പിന്നിലെ പ്രധാന ചാലകശക്തികൾ. ആഗോള തലത്തിൽ തന്നെ ഏറ്റവും കൂടുതൽ വളർച്ചാ സാധ്യതയുള്ളതും ദീർഘകാല നിക്ഷേപങ്ങൾക്ക് അനുയോജ്യവുമായ ഒരു പ്രധാന വിപണിയായി സൗദി അറേബ്യ മാറിക്കഴിഞ്ഞു എന്നാണ് ഈ പുതിയ കണക്കുകൾ സൂചിപ്പിക്കുന്നത്.
Content Highlights: Saudi Arabia is emerging as a top global investment destination, witnessing a fivefold increase in foreign investors as economic reforms and diversification efforts gain momentum.
