LIVE TV
വ്യത്യസ്ത പ്രമേയങ്ങളിലും ജോണറുകളിലുമുള്ള സിനിമകളും വിനോദപരിപാടികളുമായി പ്രേക്ഷകര്‍ക്ക് വൈവിധ്യമാര്‍ന്ന കാഴ്ചാനുഭവങ്ങള്‍ ഒരുക്കുന്ന മനോരമമാക്‌സിലേക്ക് പുതിയൊരു ചിത്രം കൂടി. സൈജു കുറുപ്പ്, ഇന്ദ്രന്‍സ്, വിനയ് ഫോര്‍ട്ട് എന്നിവര്‍ പ്രധാന കഥാപാത്രങ്ങളായെത്തുന്ന സൈക്കോളജിക്കല്‍ ത്രില്ലര്‍ ചിത്രം 'ദ് തേര്‍ഡ് മര്‍ഡര്‍' നവംബര്‍ 13 മുതല്‍ മനോരമമാക്‌സില്‍ സ്ട്രീമിങ് ആരംഭിക്കും.
ഒക്ടോബര്‍ 2ന് തിയേറ്ററുകളിലെത്തിയ ചിത്രത്തിന് മികച്ച പ്രേക്ഷക പ്രതികരണം ലഭിച്ചിരുന്നു. മലയാളത്തിന് പുറമെ ഹിന്ദി, ഇംഗ്ലീഷ്, തമിഴ്, കന്നഡ ഭാഷകളിലും ചിത്രം മനോരമമാക്‌സില്‍ ലഭ്യമാകും. പ്രേക്ഷകരെ ഉദ്വേഗത്തിന്റെ മുള്‍മുനയില്‍ നിര്‍ത്തുന്ന കുറ്റാന്വേഷണ പശ്ചാത്തലമാണ് ചിത്രത്തിന്റെ പ്രധാന ആകര്‍ഷണം.
തുടര്‍ച്ചയായ കൊലപാതകങ്ങളും അവയ്ക്ക് പിന്നിലെ ദുരൂഹതകളുമാണ് ചിത്രത്തിന്റെ പ്രമേയം. ക്രിസ്റ്റി എന്ന പൊലീസ് ഉദ്യോഗസ്ഥനും സംഘവും നടത്തുന്ന അന്വേഷണത്തിലൂടെയാണ് കഥ മുന്നോട്ടുപോകുന്നത്. അന്വേഷണത്തിനിടെ ഓരോ ഘട്ടത്തിലും പുതിയ വെല്ലുവിളികളും അപ്രതീക്ഷിത വഴിത്തിരിവുകളും ഇവര്‍ക്ക് നേരിടേണ്ടിവരുന്നു. മുന്‍ പൊലീസ് ഉദ്യോഗസ്ഥനായ സ്വാമിയുടെ വരവും വിനയന്‍ എന്ന സാധാരണക്കാരന്റെ കടന്നുവരവും അന്വേഷണത്തിന്റെ ഗതി മാറ്റുന്നു. കൊലപാതകങ്ങളുടെ ചുരുളഴിക്കാന്‍ നടത്തുന്ന ശ്രമങ്ങള്‍ക്കൊപ്പം കഥാപാത്രങ്ങള്‍ക്കിടയിലെ സംഘര്‍ഷങ്ങളും ചേരുമ്പോള്‍ ചിത്രം പ്രേക്ഷകര്‍ക്ക് ആകാംക്ഷയും ഉദ്വേഗവും നിറഞ്ഞ സിനിമാനുഭവം സമ്മാനിക്കുന്നു.
സൈജു കുറുപ്പ്, ഇന്ദ്രന്‍സ്, വിനയ് ഫോര്‍ട്ട് എന്നിവര്‍ക്കൊപ്പം മണികണ്ഠന്‍ പട്ടാമ്പി, അനന്യ, ലിയോണ ലിഷോയ്, ജിബിന്‍ ഗോപിനാഥ്, ഫറാ ഷിബില തുടങ്ങിയവരും ചിത്രത്തില്‍ പ്രധാന വേഷങ്ങളിലെത്തുന്നു.
സുനില്‍ ഇബ്രാഹിമിന്റെ വേറിട്ട ആഖ്യാനശൈലിയും ദുരൂഹത നിറഞ്ഞ കഥാപശ്ചാത്തലവും ചേര്‍ന്ന 'ദ് തേര്‍ഡ് മര്‍ഡര്‍' നവംബര്‍ 13 മുതല്‍ മനോരമമാക്‌സില്‍ ലഭ്യമാകും.
Content Highlights: The psychological thriller 'The Third Murder' will be available on ManoramaMAX starting November 13. Saiju Kurup, Indrans, and Vinay Forrt feature in the lead roles.
