ബെംഗളൂരു: ഇന്ത്യൻ പ്രീമിയർ ലീഗിൽ റോയൽ ചലഞ്ചേഴ്സ് വിജയം ആഘോഷിക്കുകയാണ്. എന്നാൽ മത്സരത്തിൽ ഒരു നാണക്കേടിന്റെ റെക്കോർഡും ഉണ്ടായി. ഐപിഎല്ലിൽ കൂടുതൽ തവണ പൂജ്യത്തിന് പുറത്താകുന്ന താരമെന്ന റെക്കോർഡ് ഇനി ദിനേശ് കാർത്തിക്കിന്റെ പേരിലാണ്. ഡൽഹിക്കെതിരെ രണ്ട് പന്ത് നേരിട്ട കാർത്തിക്ക് റൺസൊന്നും എടുക്കാതെ പുറത്തായി.
ഐപിഎല്ലിൽ ഇത് 18-ാം തവണയാണ് ദിനേശ് കാർത്തിക്ക് പൂജ്യത്തിന് പുറത്താകുന്നത്. റോയൽ ചലഞ്ചേഴ്സ് സഹതാരം ഗ്ലെൻ മാക്‌സ്‌വെല്ലിന്റെ റെക്കോർഡാണ് കാർത്തിക്കിന്റെ പേരിലായത്. മാക്‌സ്‌വെൽ 17 തവണ പൂജ്യത്തിന് പുറത്തായി. മുംബൈ ഇന്ത്യൻസ് മുൻ നായകൻ രോഹിത് ശർമ്മയും 17 തവണ പൂജ്യനായി മടങ്ങിയിട്ടുണ്ട്.
പീയൂഷ് ചൗള, മൻദീപ് സിംഗ്, സുനിൽ നരേൻ എന്നിവർ 15 തവണ വീതം ഐപിഎല്ലിൽ പൂജ്യത്തിന് പുറത്തായിട്ടുണ്ട്. ട്വന്റി 20 ക്രിക്കറ്റിൽ ഏറ്റവും കൂടുതൽ തവണ പൂജ്യത്തിന് പുറത്തായത് സുനിൽ നരേനാണ്. 44 തവണ താരം റൺസെടുക്കും മുമ്പ് വിക്കറ്റ് നഷ്ടമാക്കി.
