LIVE TV
ന്യൂഡൽഹി: പശ്ചിമേഷ്യൻ യുദ്ധത്തിന്റെ പശ്ചാത്തലത്തിൽ രൂപയുടെ മൂല്യത്തകർച്ച തടയുന്നതിനായി കേന്ദ്ര സർക്കാർ സ്വർണം, വെള്ളി, പ്ലാറ്റിനം എന്നിവയുടെ ഇറക്കുമതി തീരുവ (Import Duty) ഉയർത്തിയതിന് തൊട്ടുപിന്നാലെ രാജ്യത്തെ ഞെട്ടിക്കുന്ന വ്യാപാര കണക്കുകൾ പുറത്ത്. കഴിഞ്ഞ ഏപ്രിൽ മാസത്തിൽ രാജ്യത്തെ സ്വർണ ഇറക്കുമതി മുൻവർഷത്തെ അപേക്ഷിച്ച് 82 ശതമാനം വർദ്ധിച്ച് 5.63 ബില്യൺ ഡോളറിലെത്തിയതായി കേന്ദ്ര വാണിജ്യ മന്ത്രാലയം പുറത്തുവിട്ട കണക്കുകൾ വ്യക്തമാക്കുന്നു. സ്വർണ ഇറക്കുമതിയിലുണ്ടായ ഈ വൻ കുതിച്ചുചാട്ടം രാജ്യത്തിന്റെ ആകെ വ്യാപാര കമ്മി (Trade Deficit) മൂന്ന് മാസത്തെ ഏറ്റവും ഉയർന്ന നിരക്കായ 28.38 ബില്യൺ ഡോളറിലെത്തിച്ചു.
സ്വർണത്തിന് പുറമെ വെള്ളി ഇറക്കുമതിയിലും വൻ വർദ്ധനവാണുണ്ടായിട്ടുള്ളത്. മുൻവർഷത്തെ അപേക്ഷിച്ച് വെള്ളി ഇറക്കുമതി ഇരട്ടിയിലധികമായി വർദ്ധിച്ച് 411 മില്യൺ ഡോളറിലെത്തി. സസ്യ എണ്ണകളുടെ (Vegetable Oil) ഇറക്കുമതിച്ചെലവ് 40 ശതമാനം വർദ്ധനവോടെ 1.72 ബില്യൺ ഡോളറായപ്പോൾ, പെട്രോളിയം-അസംസ്കൃത എണ്ണ ഉൽപന്നങ്ങളുടെ ഇറക്കുമതി മുൻവർഷത്തെ അപേക്ഷിച്ച് 10 ശതമാനം കുറഞ്ഞ് 18.63 ബില്യൺ ഡോളറായെങ്കിലും ഇക്കഴിഞ്ഞ മാർച്ച് മാസത്തെ അപേക്ഷിച്ച് ഇതിൽ 53 ശതമാനത്തിന്റെ വർദ്ധനവുണ്ടായിട്ടുണ്ട്. ഏപ്രിലിൽ രാജ്യത്തെ ആകെ കയറ്റുമതി 13.8 ശതമാനം വർദ്ധിച്ച് 43.56 ബില്യൺ ഡോളറായപ്പോൾ, ഇറക്കുമതി 10 ശതമാനം ഉയർന്ന് 71.94 ബില്യൺ ഡോളറിലെത്തി.
കഴിഞ്ഞ ഫെബ്രുവരി അവസാനത്തോടെ പശ്ചിമേഷ്യയിൽ യുദ്ധം പൊട്ടിപ്പുറപ്പെട്ടതു മുതൽ ഇന്ത്യൻ രൂപ കടുത്ത സമ്മർദ്ദത്തിലാണ്. അതിനുശേഷം യു.എസ് ഡോളറിനെതിരെ രൂപയുടെ മൂല്യം 5.2 ശതമാനത്തോളം ഇടിഞ്ഞു. ഈ സാഹചര്യത്തിൽ വിദേശനാണ്യത്തിന്റെ ഉപയോഗം കുറയ്ക്കുന്നതിനും ഇന്ധന ഉപഭോഗം നിയന്ത്രിക്കുന്നതിനുമായി കടുത്ത ചെലവുചുരുക്കൽ നടപടികളാണ് സർക്കാർ സ്വീകരിച്ചു വരുന്നത്. വിലപിടിപ്പുള്ള ലോഹങ്ങളുടെ ഇറക്കുമതി തീരുവ വർദ്ധിപ്പിച്ചതിന് പുറമെ, എണ്ണക്കമ്പനികൾ നാല് വർഷത്തിന് ശേഷം ആദ്യമായി പെട്രോൾ, ഡീസൽ വില വർദ്ധിപ്പിക്കുകയും ചെയ്തു.
എന്നാൽ, നിലവിലെ സാഹചര്യത്തിൽ ഇറക്കുമതി നിരുത്സാഹപ്പെടുത്താൻ കൂടുതൽ കടുത്ത നയപരമായ തീരുമാനങ്ങളോ നിയന്ത്രണങ്ങളോ ഏർപ്പെടുത്താൻ സർക്കാർ ഉദ്ദേശിക്കുന്നില്ലെന്ന് വാണിജ്യ കാര്യ സെക്രട്ടറി രാജേഷ് അഗർവാൾ വ്യക്തമാക്കി."അനാവശ്യമായ ആഡംബര ഉപഭോഗം കുറയ്ക്കാൻ ബഹുമാനപ്പെട്ട പ്രധാനമന്ത്രി രാജ്യത്തെ ജനങ്ങളോട് ആഹ്വാനം ചെയ്തിട്ടുണ്ട്. ജനങ്ങൾ സ്വമേധയാ അത്തരം ഉപഭോഗം കുറയ്ക്കുകയാണെങ്കിൽ അത് സമ്പദ്വ്യവസ്ഥയിൽ പ്രതിഫലിക്കും. എന്നാൽ തൽക്കാലം സർക്കാർ തലത്തിൽ ഇറക്കുമതിക്ക് മറ്റ് നിയന്ത്രണങ്ങൾ ഏർപ്പെടുത്തില്ല," രാജേഷ് അഗർവാൾ വാർത്താലേഖകരോട് പറഞ്ഞു.
രാജ്യത്തെ വിദേശനാണ്യ ശേഖരം ചോർന്നുപോകാതെ സംരക്ഷിക്കുന്നതിനായി ജനങ്ങൾ തങ്ങളുടെ ഉപഭോഗ ശീലങ്ങളിൽ മാറ്റം വരുത്തണമെന്ന് പ്രധാനമന്ത്രി നരേന്ദ്ര മോദി ആവശ്യപ്പെട്ടു. കൊവിഡ് കാലത്തെപ്പോലെ വർക്ക് ഫ്രം ഹോം (Work-from-home), വെർച്വൽ മീറ്റിംഗുകൾ എന്നിവ പ്രോത്സാഹിപ്പിക്കുക, അത്യാവശ്യമല്ലാത്ത വിദേശയാത്രകളും സ്വർണം വാങ്ങലും ഒരു വർഷത്തേക്ക് ഒഴിവാക്കുക, പ്രാദേശിക ഉൽപ്പന്നങ്ങൾക്ക് മുൻഗണന നൽകുക എന്നിവയിലൂടെ വലിയ രീതിയിൽ വിദേശനാണ്യം ലാഭിക്കാൻ രാജ്യത്തിന് സാധിക്കുമെന്ന് അദ്ദേഹം ഓർമ്മിപ്പിച്ചു.
കഴിഞ്ഞ 2025-26 സാമ്പത്തിക വർഷത്തിൽ ഇന്ത്യ റെക്കോർഡ് തുകയ്ക്കുള്ള സ്വർണമാണ് ഇറക്കുമതി ചെയ്തത്—71.98 ബില്യൺ ഡോളർ (മുൻവർഷത്തേക്കാൾ 24% കൂടുതൽ). രാജ്യത്തിന്റെ ആകെ ഇറക്കുമതിച്ചെലവിന്റെ 9 ശതമാനത്തിലധികം സ്വർണത്തിന് വേണ്ടിയും 1.6 ശതമാനം വെള്ളിക്കുവേണ്ടിയുമാണ് ചിലവഴിച്ചത്. ഇറക്കുമതി തീരുവ വർദ്ധിപ്പിച്ചത് സ്വർണ ഇറക്കുമതിയെ ബാധിക്കുമെങ്കിലും, വെള്ളി വ്യവസായ ആവശ്യങ്ങൾക്ക് ഉപയോഗിക്കുന്നതിനാൽ അതിന്റെ ഇറക്കുമതിയിൽ വലിയ കുറവുണ്ടാകാൻ സാധ്യതയില്ലെന്നാണ് വിലയിരുത്തൽ.
രാജ്യത്തിന്റെ ആകെ കയറ്റുമതിയിൽ മികച്ച വളർച്ചയുണ്ടായെങ്കിലും, പശ്ചിമേഷ്യൻ രാജ്യങ്ങളുമായുള്ള വ്യാപാരത്തെ യുദ്ധം കഠിനമായി ബാധിച്ചു. ഹോർമുസ് കടലിടുക്ക് അടച്ചിട്ടതും യുദ്ധപ്രതിസന്ധികളും കാരണം തുടർച്ചയായ രണ്ടാം മാസവും ഈ മേഖലയിലേക്കുള്ള വ്യാപാരം ഇടിഞ്ഞു. ഏപ്രിലിൽ പശ്ചിമേഷ്യയിലേക്കുള്ള ഇന്ത്യയുടെ കയറ്റുമതി 28 ശതമാനം കുറഞ്ഞ് 4.16 ബില്യൺ ഡോളറായപ്പോൾ, അവിടുനിന്നുള്ള ഇറക്കുമതി 32 ശതമാനം ഇടിഞ്ഞ് 10.47 ബില്യൺ ഡോളറായി ചുരുങ്ങി.
അതേസമയം, സ്വതന്ത്ര വ്യാപാര കരാറുകളുമായി (FTAs) ബന്ധപ്പെട്ട് യു കെയുമായുള്ള ചർച്ചകൾ പുരോഗമിക്കുകയാണെന്നും സ്റ്റീൽ ഇറക്കുമതിക്ക് യു കെ ഏർപ്പെടുത്തിയ പുതിയ നിയന്ത്രണങ്ങളിൽ ക്രിയാത്മകമായ പരിഹാരം കണ്ടെത്തുമെന്നും വാണിജ്യ സെക്രട്ടറി അറിയിച്ചു. യു.എസുമായുള്ള വ്യാപാര കരാർ ചർച്ചകൾക്കായി അമേരിക്കൻ പ്രതിനിധി സംഘം ഉടൻ തന്നെ ഇന്ത്യ സന്ദർശിക്കുമെന്നും അദ്ദേഹം കൂട്ടിച്ചേർത്തു.
Content Highlights: India’s gold imports have increased by a record 82 percent, reflecting strong demand in the domestic market. Despite the sharp rise, the Centre has indicated that no further restrictions on gold imports are being considered at this stage.
