Get the latest news at
your fingertips!
Download our app now
LIVE TV
Search
ഇന്ത്യൻ പ്രീമിയർ ലീഗിൽ പ്ലേ ഓഫിനായി ടീമുകൾ തമ്മിലുള്ള പോരാട്ടം കടുക്കുന്നു. 10 മത്സരങ്ങളിൽ ഏഴിലും ജയിച്ച റോയൽ ചലഞ്ചേഴ്സ് ബെംഗളൂരു 14 പോയിന്റോടെ ടേബിളിൽ ഒന്നാമതുണ്ട്. ഒരു മത്സരം കൂടി വിജയിക്കാനായാൽ റോയൽ ചലഞ്ചേഴ്സിന് പ്ലേ ഓഫ് ഏറെക്കുറെ ഉറപ്പിക്കാം.
മുംബൈ ഇന്ത്യൻസ്, ഗുജറാത്ത് ടൈറ്റൻസ്, ഡൽഹി ക്യാപിറ്റൽസ് എന്നീ ടീമുകൾ ആറ് വിജയങ്ങൾ നേടിയിട്ടുണ്ട്. ഇതിൽ മുംബൈയും ഡൽഹിയും 10 മത്സരങ്ങൾ പൂർത്തിയായപ്പോൾ ഗുജറാത്ത് ഒമ്പത് മത്സരങ്ങൾ മാത്രമെ കളിച്ചിട്ടുള്ളു. മൂന്ന് ടീമുകൾക്കും രണ്ട് വിജയങ്ങൾ നേടിയാൽ ഐപിഎല്ലിന്റെ പ്ലേ ഓഫ് കടക്കാനാകും.
പോയിന്റ് ടേബിളിൽ അഞ്ചാം സ്ഥാനത്തുള്ള പഞ്ചാബ് കിങ്സിന് ഒമ്പത് മത്സരങ്ങളിൽ നിന്നായി അഞ്ച് വിജയങ്ങളുണ്ട്. ഒരു മത്സരം മഴമുടക്കിയതിനാൽ 11 പോയിന്റാണ് പഞ്ചാബ് ആകെ നേടിയിരിക്കുന്നത്. ബാക്കിയുള്ള അഞ്ച് മത്സരങ്ങളിൽ മൂന്നിൽ ജയിച്ചാൽ പഞ്ചാബിന് അനായാസം പ്ലേ ഓഫിൽ കടക്കാം.
10 മത്സരങ്ങൾ പൂർത്തിയാകുമ്പോൾ ലഖ്നൗ സൂപ്പർ ജയന്റ്സ് അഞ്ച് ജയവും അഞ്ച് തോൽവിയും നേരിട്ടു. അവശേഷിക്കുന്ന നാലിൽ മൂന്ന് ജയമാണ് ലഖ്നൗവിന് പ്ലേ ഓഫ് കടക്കാൻ വേണ്ടത്. 10 മത്സരങ്ങളിൽ നാല് ജയമാണ് നിലവിലെ ചാംപ്യന്മാരായ കൊൽക്കത്ത നൈറ്റ് റൈഡേഴ്സിന് നേടാനായത്. ഒമ്പത് പോയിന്റുള്ള കൊൽക്കത്തയ്ക്ക് ഇനിയുള്ള എല്ലാ മത്സരങ്ങളും നിർണായകമാണ്.
10 മത്സരങ്ങളിൽ മൂന്ന് ജയങ്ങളടക്കം ആറ് പോയിന്റുള്ള രാജസ്ഥാൻ റോയൽസിന് അവശേഷിക്കുന്ന എല്ലാ മത്സരങ്ങളും വലിയ റൺറേറ്റിൽ വിജയിക്കണം. ഒമ്പത് മത്സരങ്ങളിൽ മൂന്ന് ജയമുള്ള സൺറൈസേഴ്സ് ഹൈദരാബാദിനും 10 മത്സരങ്ങളിൽ മൂന്നെണ്ണം വിജയിച്ച ചെന്നൈ സൂപ്പർ കിങ്സിനും സമാനസ്ഥിതിയാണുള്ളത്.
Content Highlights: IPL 2025 Playoffs Scenarios For All 10 Franchises
