'ലീഗ് പ്രശംസ നെഗറ്റീവ് ഫലം ഉണ്ടാക്കും'; കാനത്തിന്റെ അതൃപ്തിയില്‍ മറുപടി പറയാതെ എം വി ഗോവിന്ദന്‍

തിരുവനന്തപുരം: ഉന്നത വിദ്യാഭ്യാസ മേഖല പരിപൂര്‍ണമായി കാവിവല്‍ക്കരിക്കുകയാണെന്ന് സിപിഐഎം സംസ്ഥാന സെക്രട്ടറി എംവി ഗോവിന്ദന്‍. ഇതിന്റെ ഭാഗമായുള്ള ശ്രമങ്ങളാണ് ഗവര്‍ണര്‍ നടത്തുന്നത്. ഇതിന് വഴങ്ങില്ലെന്ന ശക്തമായ താക്കീതാണ് ഇടതുപക്ഷം നല്‍കുന്നതെന്നും എംവി ഗോവിന്ദന്‍ പറഞ്ഞു. അതേസമയം മുസ്ലീം ലീഗിനെകുറിച്ചുള്ള തന്റെ പ്രസ്താവന അപക്വമെന്ന കാനത്തിന്റെ പരാമര്‍ശത്തോട് ഒന്നും പറയാനില്ലെന്നും എം വി ഗോവിന്ദന്‍ പറഞ്ഞു. മുസ്ലീംലീഗ് വര്‍ഗീയ പാര്‍ട്ടിയല്ലെന്നായിരുന്നു കഴിഞ്ഞ ദിവസം സിപിഐഎം സംസ്ഥാന സെക്രട്ടറി ആവര്‍ത്തിച്ച് പറഞ്ഞത്. തുടര്‍ന്ന് ഗോവിന്ദന്റെ പ്രസ്താവന അനവസരത്തിലുള്ള ചര്‍ച്ചകള്‍ക്ക് വഴിയൊരുക്കിയെന്നും കാനം അഭിപ്രായപ്പെട്ടിരുന്നു.

സംസ്ഥാന സെക്രട്ടറിയുടെ പ്രസ്താവന ഇടതുമുന്നണിക്ക് രാഷ്ട്രീയമായി എന്ത് ഗുണമുണ്ടാക്കിയെന്ന് പരിശോധിക്കണം. ചില പ്രസ്താവനകള്‍ നെഗറ്റീവായ ഫലം ഉണ്ടാക്കും. ഈ പ്രസ്താവനയുടെ ഫലം എന്താണെന്ന് കാലം തീരുമാനിക്കട്ടെ. നേരില്‍ കാണുമ്പോള്‍ പ്രസ്താവനയെക്കുറിച്ച് അദ്ദേഹവുമായി ചര്‍ച്ച ചെയ്യുമെന്നും കാനം പറഞ്ഞിരുന്നു.

താല്‍ക്കാലിക ലാഭത്തിന് വേണ്ടിയെടുക്കുന്ന നിലപാടുകള്‍ ദീര്‍ഘകാലാടിസ്ഥാനത്തില്‍ ദോഷം ചെയ്യില്ലെന്ന് ഉറപ്പ് പറയാന്‍ കഴിയുമോ? ഇതൊക്കെ സൂക്ഷിച്ചു പറയേണ്ട കാര്യങ്ങളാണ്. കമ്മ്യൂണിസ്റ്റ് പാര്‍ട്ടികള്‍ മുന്‍കാലത്ത് എടുത്തിട്ടുള്ള നിലപാടുകള്‍ ജനങ്ങളുടെ മനസ്സിലുണ്ടാവും. ഏത് സാഹചര്യത്തിലാണ് എം വി ഗോവിന്ദന്‍ അങ്ങനെ പറഞ്ഞതെന്ന് അറിയില്ലെന്നും കാനം ആശങ്ക പ്രകടിപ്പിച്ചു.

ലീഗ് ന്യൂനപക്ഷങ്ങള്‍ക്ക് വേണ്ടി ജനാധിപത്യ രീതിയില്‍ പ്രവര്‍ത്തിക്കുന്ന പാര്‍ട്ടിയാണെന്നായിരുന്നു എംവി ഗോവിന്ദന്‍ അഭിപ്രായപ്പെട്ടത്. രേഖകളില്‍ അങ്ങനെയാണ് ഞങ്ങളും വിശദീകരിച്ചിട്ടുള്ളത്. വര്‍ഗീയ പാര്‍ട്ടിയാണെന്ന് ഞങ്ങള്‍ പറഞ്ഞിട്ടില്ല. വര്‍ഗീയ നിലപാട് സ്വീകരിക്കുന്നത് എസ്ഡിപിഐ അടക്കമുള്ളവരാണ്. അവരോട് കൂട്ടുകൂടുന്ന നിലപാടില്‍ ലീഗിനെ വിമര്‍ശിച്ചിട്ടുണ്ടെന്നും എംവി ഗോവിന്ദന്‍ പറഞ്ഞിരുന്നു.

Story Highlights: MV Govindan did not reply to Kanam rajendran displeasure