ഷാർജ: പുതിയ ബ്രാൻഡ് ലോഗോ പരിചയപ്പെടുത്തി ഷാർജ. അറബ് സാംസ്കാരിക അടയാളങ്ങൾ പ്രതിഫലിപ്പിക്കുന്ന രീതിയിലാണ് ലോഗോ രൂപപ്പെടുത്തിയിരിക്കുന്നത്. ഉപഭരണാധികാരിയും ഷാർജ മീഡിയ കൗൺസിൽ ചെയർമാനുമായ ഷെയ്ഖ് സുൽത്താൻ ബിൻ അഹ്മദ് ബിൻ സുൽത്താൻ അൽ ഖാസിമിയാണ് ലോഗോ പ്രകാശനം ചെയ്തത്.
ജനുവരി 28 ഞായറാഴ്ച നഗരത്തിലെ അൽ നൂർ ദ്വീപിൽ നടന്ന ചടങ്ങിലാണ് ഷാർജയുടെ പുതിയ ഐഡൻ്റിറ്റി വെളിപ്പെടുത്തിയത്. പുതിയ ഐഡൻ്റിറ്റി ആരംഭിക്കുന്നതോടെ താമസത്തിനും വിനോദസഞ്ചാരത്തിനും നിക്ഷേപത്തിനുമുള്ള ഒരു ലക്ഷ്യസ്ഥാനമെന്ന നിലയിലുള്ള എമിറേറ്റിൻ്റെ സ്ഥാനം ശക്തിപ്പെടുത്താനാകുമെന്ന പ്രതീക്ഷയിലാണ് ഷാർജ. വിനോദസഞ്ചാരം, താമസം, ജോലി, പഠനം, നിക്ഷേപം എന്നീ മേഖലകളിലെ ആകർഷണീയതയ്ക്കൊപ്പം ഷാർജയുടെ ശക്തിയും വ്യതിരിക്ത സവിശേഷതകളും തിരിച്ചറിയുന്നതിന് അനുസരിച്ചാണ് പുതിയ ഐഡൻ്റിറ്റി വികസിപ്പിച്ചതെന്നും അൽ ഖാസിമി പറഞ്ഞു. പുതിയ ഐഡൻ്റിറ്റി എമിറേറ്റിൻ്റെ ആത്മാവിനെ പ്രതിഫലിപ്പിക്കുന്നതാണെന്നും അദ്ദേഹം വ്യക്തമാക്കി.
'കഴിഞ്ഞ 52 വർഷമായി ഷാർജ അതിവേഗം വളർന്നു. ഈ ഐഡൻ്റിറ്റി ആളുകൾക്ക് ബന്ധപ്പെടാൻ കഴിയുന്ന ഒന്നാണ്. 'നിങ്ങളുടെ ഷാർജ' എന്ന എമിറേറ്റിൻ്റെ സാരാംശം ഉൾക്കൊള്ളുന്ന ടാഗ് ലൈനോടുകൂടിയാണ് വിനോദസഞ്ചാര കാമ്പയിന് തുടക്കം കുറിച്ചത്. ഷാർജയുടെ തുടർച്ചയായ വളർച്ചയെ പിന്തുണയ്ക്കുന്ന മികച്ച സേവനങ്ങൾക്ക് പ്രോത്സാഹനം നൽകുമെന്നും'. അൽ ഖാസിമി പറഞ്ഞു.
ഷാർജയുടെ സാംസ്കാരികമായ സവിശേഷത പറയുന്നതാണ് ലോഗോയിലെ അറേബ്യൻ വാസ്തുശിൽപ രീതി. ‘നിങ്ങളുടെ ഷാർജ’ തലക്കെട്ടിൽ വിനോദസഞ്ചാര കാമ്പയിനും തുടക്കം കുറിച്ചു. ഷാർജ സർക്കാറിലെ വിവിധ വകുപ്പുകൾ ചേർന്നാണ് പുതിയ ലോഗോ ബ്രാൻഡ് രൂപപ്പെടുത്തിയിരിക്കുന്നത്.