Get the latest news at
your fingertips!
Download our app now
LIVE TV
Search
'മാർക്കോ' എന്ന സൂപ്പർഹിറ്റ് ചിത്രത്തിന് ശേഷം ക്യൂബ്സ്എന്‍റർടെയ്ൻമെന്‍റ്സിന്‍റെ ബാനറിൽ ആന്‍റണി വർഗീസ് പെപ്പെയെ നായകനാക്കി ഷരീഫ് മുഹമ്മദ് നിർമ്മിക്കുന്ന ചിത്രമാണ് കാട്ടാളൻ. നവാഗതനായ പോള്‍ ജോര്‍ജ്ജ് സംവിധാനം ചെയ്യുന്ന സിനിമയിൽ വൈറൽ ഗായകൻ ഹനാൻ ഷായും പ്രധാന വേഷത്തിൽ എത്തുന്നുണ്ട്. ഹനാൻ ഷായുടെ ആദ്യ സിനിമയാണ് കാട്ടാളൻ. സിനിമയുടെ പൂജാ ചടങ്ങിൽ ഹനാൻ പറഞ്ഞ വാക്കുകൾ ഇപ്പോൾ ശ്രദ്ധ നേടുകയാണ്.
അഭിനയത്തിൽ ഇതിന് മുന്നേ ഒരു പരിചയവും ഇല്ലാത്ത തന്നെ സിനിമയിലേക്ക് തെരഞ്ഞെടുത്തതിൽ സന്തോഷം ഉണ്ടെന്ന് ഹനാൻ പറഞ്ഞു. ജഗദീഷ് പോലുള്ള വലിയ താരങ്ങൾ ഒന്നിക്കുന്ന ചിത്രത്തിന്റെ ഭാഗമാകാൻ കഴിഞ്ഞതിലും ഹനാൻ നന്ദി അറിയിച്ചിട്ടുണ്ട്, അഭിനയം നന്നായി വന്നില്ലെങ്കിൽ പാട്ടുകൾ തന്ന് സഹായിക്കണമെന്ന് സിനിമയുടെ നിർമാതാവായ ഷരീഫ് മുഹമ്മദിനോട് തമാശയായി ഹനാൻ പറഞ്ഞു.
'ഒരുപാട് സന്തോഷം. ഷരീഫ്ക്കനോടും പോളേട്ടനോടും നന്ദിയുണ്ട്. യാതൊരു അഭിനയ പാടവം ഇല്ലാത്ത എന്നെ എന്ത് കണ്ടിട്ടാണ് ഈ സിനിമയിലേക്ക് വിളിച്ചത് എന്ന് അറിയില്ല. എനിക്ക് വന്ന് ചേർന്ന സിനിമ ചെറുതല്ല, വലിയ ചിത്രമാണ്. ഈ നിമിഷം വിശ്വസിക്കാൻ പറ്റുന്നില്ല. ജഗദീഷ് ഏട്ടനെ എല്ലാം ചെറുപ്പം തൊട്ട് കാണുന്നതാണ്. അവർ അഭിനയിക്കുന്നതിന്റെ ബാക്കിൽ വന്നാൽ പോലും അത് എന്റെ ഭാഗ്യമായാണ് കാണുന്നത്.
അഭിനയിച്ച് ശരിയായില്ലെങ്കിൽ പാട്ടെങ്കിലും തന്ന് സഹായിക്കണം എന്നാണ് ഷരീഫ്ക്കയോട് പറയാൻ ഉള്ളത്. അതുപോലെ കബീർ സിങ് ഈ സിനിമയിൽ ഉണ്ടെന്ന് അറിഞ്ഞപ്പോൾ തല്ലുമ്പോൾ പതുക്കെ തല്ലണം എന്നാണ് ഞാൻ അദ്ദേഹത്തിനോട് ആദ്യം പറഞ്ഞത്. എല്ലാവരും നല്ല കമ്പനിയാണ്. സിനിമയിൽ നല്ല പ്രതീക്ഷയുണ്ട്,' ഹനാൻ ഷാ പറഞ്ഞു.
2022 ൽ പുറത്തിറങ്ങിയ 'പറയാതെ അറിയാതെ' എന്ന കവർ ഗാനത്തിലൂടെയാണ് ഹനാൻ ശ്രദ്ധ നേടിയത്. ശേഷം ഒട്ടേറെ കവർ സോങ്ങുകളും സിംഗിളുകളും മ്യൂസിക് വീഡിയോകളും ഹനാൻഷാ എന്ന തന്‍റെ യൂട്യൂബ് ചാനലിലും ഇൻസ്റ്റഗ്രാമിലും അടക്കം പങ്കുവയ്ക്കാറുണ്ട്. ഇൻസ്റ്റഗ്രാമിൽ 2.2 മില്ല്യണിലേറെ ഫോളോവേഴ്സാണ് ഹനാനുള്ളത്. ചിറാപുഞ്ചി, കസവിനാൽ, ഇൻസാനിലെ, ഹാനിയ, ഓ കിനാക്കാലം, അജപ്പാമട, ആലപ്പുഴ മുല്ലക്കല് തുടങ്ങിയവയാണ് ഹനാന്‍റെ വൈറൽ ഗാനങ്ങൾ. വ്ളോഗിലൂടെയും ഹനാന്‍ഷായും കുടുംബവും മലയാളികള്‍ക്ക് പരിചിതരാണ്.
അതേസമയം, ആന്‍റണി വർഗീസ് പെപ്പെ നായകനായെത്തുന്ന കാട്ടാളനിൽ നായികയായെത്തുന്നത് രജിഷ വിജയനാണ്. മലയാളത്തിൽ നിന്നുള്ളവരും പാൻ ഇന്ത്യൻ താരങ്ങളും അടക്കം വലിയൊരു താരനിരയാണ് ചിത്രത്തിൽ ഒരുമിക്കുന്നത്. പാൻ ഇന്ത്യൻ താരങ്ങളായ സുനിൽ, കബീർ ദുഹാൻ സിങ് എന്നിവരേയും ജഗദീഷ്, സിദ്ധിഖ് തുടങ്ങിയ മലയാളത്തിലെ ശ്രദ്ധേയ താരങ്ങളേയും റാപ്പർ ബേബി ജീനിനേയും ചിത്രത്തിലേക്ക് സ്വാഗതം ചെയ്തുകൊണ്ട് അടുത്തിടെ പോസ്റ്ററുകള്‍ എത്തിയിരുന്നത് വലിയ ശ്രദ്ധ നേടിയിരുന്നു.
ചിത്രത്തിൽ പെപ്പെ തന്‍റെ യഥാർത്ഥ പേരായ "ആന്‍റണി വർഗ്ഗീസ്" എന്ന പേരിൽ തന്നെയാണ് എത്തുന്നത്. ഓങ്-ബാക്ക് 2, ബാഹുബലി-2: കൺക്ലൂഷൻ, ജവാൻ, ബാഗി 2, പൊന്നിയൻ സെൽവൻ പാർട്ട് 1 തുടങ്ങിയ ശ്രദ്ധേയ സിനിമകൾക്ക് ആക്ഷൻ ഒരുക്കിയ ലോക പ്രശസ്തനായ സ്റ്റണ്ട് കോറിയോഗ്രഫർ കെച്ച കെംബഡികെ ആണ് ചിത്രത്തിൽ ആക്ഷനൊരുക്കാനായി എത്തുന്നത്. പാൻ ഇന്ത്യൻ ലെവൽ ആക്ഷൻ ത്രില്ലർ മാസ്സ് ചിത്രത്തിൽ കന്നഡയിലെ ശ്രദ്ധേയ സംഗീത സംവിധായകൻ അജനീഷ് ലോക്നാഥാണ് സംഗീതമൊരുക്കുന്നത്. സിനിമയിലെ സംഭാഷണം ഒരുക്കുന്നത് ഉണ്ണി ആറാണ്. എഡിറ്റിംഗ് നിർവ്വഹിക്കുന്നത് മലയാളത്തിലെ ശ്രദ്ധേയനായ എഡിറ്റർ ഷമീർ മുഹമ്മദ് ആണ്.
Content Highlights: Hanan Shah's video from the puja ceremony of the movie Kattalan is gaining attention
