LIVE TV
എംപ്ലോയീസ് പ്രൊവൈഡന്റ് ഫണ്ട് ഓർഗനൈസേഷന്റെ (ഇപിഫ്ഒ) പുതിയ ഫ്രെയിംവർക്ക് പ്രകാരം പിഎഫ് ഭാഗികമായി പിൻവലിക്കുന്നതിനുള്ള നിയമങ്ങളിൽ വലിയ ഇളവുകൾ പ്രഖ്യാപിച്ചു.
അടിയന്തര ആവശ്യങ്ങൾക്കായി വരിക്കാർക്ക് അവരുടെ ആകെ പിഎഫ് ബാലൻസിന്റെ 75% വരെ പിൻവലിക്കാൻ സാധിക്കും. ബാക്കി 25% ഭാവി സുരക്ഷിതത്വത്തിനായി അക്കൗണ്ടിൽ നിലനിർത്തും.
പുതിയ നിയമപ്രകാരം ജീവനക്കാരന്റെ വിഹിതം, തൊഴിലുടമയുടെ വിഹിതം, പലിശ എന്നിവയുൾപ്പെടെയുള്ള ആകെ തുക കണക്കാക്കിയാണ് 75% അനുവദിക്കുന്നത്. അതുകൊണ്ട് തന്നെ മുൻപത്തേക്കാൾ വലിയ തുക വരിക്കാർക്ക് ലഭ്യമാകും. പിഎഫ് അഡ്വാൻസ് പിൻവലിക്കുന്നതിനുള്ള കുറഞ്ഞ അംഗത്വ കാലാവധി 12 മാസമായി ഏകീകരിച്ചു. മുൻപ് ഇത് വിവിധ ആവശ്യങ്ങൾക്ക് 7 വർഷം വരെയായിരുന്നു.
മുൻപുണ്ടായിരുന്ന പതിമൂന്നു വ്യത്യസ്ത പിൻവലിക്കൽ വിഭാഗങ്ങൾക്ക് പകരം ലളിതമായ മൂന്ന് കാറ്റഗറികളാക്കി ഇവയെ മാറ്റിയിരിക്കുന്നു. ചികിത്സ, ഉന്നത വിദ്യാഭ്യാസം, വിവാഹം എന്നിവ ഇതിൽ ഉൾപ്പെടുന്നു. വിദ്യാഭ്യാസ ആവശ്യങ്ങൾക്കായി 10 തവണയും, വിവാഹത്തിനായി 5 തവണയും വരെ തുക പിൻവലിക്കാം. വീട് വാങ്ങൽ, നിർമ്മാണം, അറ്റകുറ്റപ്പണികൾ, ഭവന വായ്പ തിരിച്ചടവ് എന്നിവയ്ക്കായി തുക വിനിയോഗിക്കാം. പ്രത്യേക കാരണങ്ങൾ ഒന്നും ബോധിപ്പിക്കാതെ തന്നെ വരിക്കാർക്ക് തങ്ങളുടെ ബാലൻസിന്റെ 75% വരെ ഈ വിഭാഗത്തിൽ പിൻവലിക്കാവുന്നതാണ്.
ജോലി രാജിവെക്കുകയോ നഷ്ടപ്പെടുകയോ ചെയ്താൽ, ഉദ്യോഗസ്ഥർക്ക് ഉടൻ തന്നെ 75% തുക പിൻവലിക്കാം. എന്നാൽ ബാക്കി വരുന്ന 25% തുക പിൻവലിക്കാൻ തുടർച്ചയായി 12 മാസം തൊഴിലില്ലാതെ തുടരേണ്ടതുണ്ട്. മുൻപ് രണ്ട് മാസത്തെ തൊഴിലില്ലായ്മയ്ക്ക് ശേഷം മുഴുവൻ തുകയും പിൻവലിക്കാമായിരുന്നു. കൂടുതൽ വിവരങ്ങൾ അറിയാനും അപേക്ഷിക്കാനും ഔദ്യോഗിക ഇപിഫ്ഒ മെമ്പർ പോർട്ടൽ സന്ദർശിക്കാവുന്നതാണ്.
Content Highlights:
EPFO simplifies partial PF withdrawal rules. Members can withdraw up to 75% of their total PF balance for eligible needs. Employee contribution, employer contribution and interest are included in the calculation. Minimum membership period for PF advances is now standardised to 12 months. 13 withdrawal categories have been simplified into three broad categories. Up to 10 withdrawals are allowed for education and up to 5 for marriage. After job loss or resignation, 75% can be withdrawn immediately, while the remaining 25% requires 12 months of unemployment.
