LIVE TV
സംസ്ഥാനത്ത് സ്വർണ വിലയിൽ വമ്പൻ ഇടിവ്. പവന് 760 രൂപയുടെ കുറവോടെ 1,08,720 രൂപയിലും ഗ്രാമിന് 95 രൂപയുടെ കുറവോടെ 13,590 രൂപയിലുമാണ് വ്യാപാരം നടക്കുന്നത്. കഴിഞ്ഞ 4 ദിവസത്തിനിടെ സ്വർണ വിലയിൽ 2,320 രൂപയുടെ ഇടിവാണ് രേഖപ്പെടുത്തിയിരിക്കുന്നത്. ഒക്ടോബർ പത്തിനാണ് 1,11,040 എന്ന ഈ മാസത്തിലെ ഏറ്റവും ഉയർന്ന നില റിപ്പോർട്ട് ചെയ്തത്.
അതേസമയം, 18 കാരറ്റ് സ്വര്‍ണം പവന് 89,320 രൂപയും 14 കാരറ്റ് പവന് 8,700 രൂപയും 9 കാരറ്റ് പവന് 5,610 രൂപയുമാണ് ഇന്നത്തെ വില. വെള്ളിയുടെ വില ഗ്രാമിന് 235 എന്ന നിരക്കില്‍ തുടരുന്നു. രാജ്യാന്തര തലത്തിൽ സ്വർണ വില ട്രോയ് ഔൺസിന് 4,158 ഡോളർ നിലവാരത്തിലാണുള്ളത്.
ആഗോള വിപണിയിൽ സ്വർണവില കുറയാൻ പ്രധാന കാരണങ്ങൾ അമേരിക്കൻ ഡോളർ ശക്തമാകുന്നത്, പലിശനിരക്ക് ഉയരാനുള്ള സാധ്യത, അമേരിക്കയിലെ പണപ്പെരുപ്പ കണക്കുകൾക്കായി നിക്ഷേപകർ കാത്തിരിക്കുന്നത് എന്നിവയാണ്. നിക്ഷേപകർ ലാഭമെടുക്കാൻ സ്വർണം വിൽക്കുന്നതും വില താഴാൻ കാരണമാകാം. അന്താരാഷ്ട്ര വില കുറയുമ്പോൾ കേരളത്തിലെ സ്വർണ വിലയിലും പ്രതിഫലിക്കാം.
ജനുവരി 29ന് രേഖപ്പെടുത്തിയ 1,31,160 രൂപയാണ് സ്വര്‍ണ വിലയിലെ റെക്കോര്‍ഡ്. ഡിസംബര്‍ 23നാണ് സ്വര്‍ണം പവന് വില ആദ്യമായി ഒരു ലക്ഷം കടന്നത്.
അതേസമയം ആഗോള സാമ്പത്തിക പ്രതിസന്ധികൾക്കും ഭൗമരാഷ്ട്രീയ അനിശ്ചിതത്വങ്ങൾക്കുമിടയിൽ ലോകമെമ്പാടുമുള്ള കേന്ദ്ര ബാങ്കുകൾ സ്വർണ ശേഖരം വൻതോതിൽ വർദ്ധിപ്പിക്കുന്നത് തുടരുന്നു. വേൾഡ് ഗോൾഡ് കൗൺസിൽ പുറത്തുവിട്ട ഏറ്റവും പുതിയ കണക്കുകൾ പ്രകാരം, കഴിഞ്ഞ ഓഗസ്റ്റ് മാസത്തിൽ മാത്രം വിവിധ രാജ്യങ്ങളിലെ കേന്ദ്ര ബാങ്കുകൾ ആകെ 39 ടൺ സ്വർണമാണ് വാങ്ങിക്കൂട്ടിയത്. ഈ സ്വർണവേട്ടയിൽ 20 ടൺ ശേഖരിച്ചുകൊണ്ട് ചൈനയാണ് ആഗോളതലത്തിൽ വീണ്ടും മുൻപന്തിയിൽ എത്തിയിരിക്കുന്നത്.
ഇതോടെ ഈ വർഷം ഇതുവരെ കേന്ദ്ര ബാങ്കുകൾ സമാഹരിച്ച ആകെ സ്വർണത്തിന്റെ അളവ് 170 ടണ്ണായി ഉയർന്നു.
തുടർച്ചയായ 22-ാം മാസമാണ് ചൈനീസ് കേന്ദ്ര ബാങ്കായ പീപ്പിൾസ് ബാങ്ക് ഓഫ് ചൈന സ്വർണ ശേഖരം ഉയർത്തുന്നത്. ഈ വർഷം മാത്രം 80 ടൺ സ്വർണ്ണം വാങ്ങിയ ചൈനയുടെ പക്കൽ ഇപ്പോൾ ആകെ 2,387 ടൺ സ്വർണ്ണ ശേഖരമുണ്ട്, ഇത് അവരുടെ ആകെ കരുതൽ ധനത്തിന്റെ 9 ശതമാനത്തോളമാണ്.
ചൈനയ്ക്ക് പുറമെ ഉസ്ബെക്കിസ്ഥാൻ (8 ടൺ), പോളണ്ട് (8 ടൺ), കസാക്കിസ്ഥാൻ (7 ടൺ) എന്നിവരും ഓഗസ്റ്റിൽ വൻതോതിൽ സ്വർണം വാങ്ങി. ഈ വർഷത്തെ ആകെ കണക്കെടുത്താൽ 98 ടൺ വാങ്ങിയ പോളണ്ടാണ് സ്വർണ ശേഖരണത്തിൽ ഏറ്റവും മുന്നിലുള്ളത്. കഴിഞ്ഞ കുറച്ചു മാസങ്ങളായി സ്വർണം വിറ്റഴിച്ചിരുന്ന തുർക്കിയും ഓഗസ്റ്റിൽ 3 ടൺ വാങ്ങി തിരിച്ചുവരവ് നടത്തിയിട്ടുണ്ട്.
Content Highlights: Kerala Gold Price Falls for Second Consecutive Day; 22-Carat Gold Drops by ₹1,560 per Pavan in Two Days
