പോളണ്ടിൽ റഷ്യൻ മിസൈൽ പതിച്ചു, ബോധപൂർവമായ പ്രകോപനമെന്ന് പോളിഷ് പ്രധാനമന്ത്രി; നാറ്റോ മേഖലയിൽ അതീവ ജാഗ്രത

ഒരു നാറ്റോ അംഗരാജ്യത്തിന് നേരെയുണ്ടാകുന്ന ആക്രമണം സഖ്യത്തിലെ 32 രാജ്യങ്ങൾക്കും നേരെയുള്ള ആക്രമണമായി കണക്കാക്കുന്ന 'ആർട്ടിക്കിൾ 5' പ്രകാരമുള്ള കൂട്ടായ പ്രതിരോധ സംവിധാനം പോളണ്ട് ഇപ്പോൾ ആവശ്യപ്പെടാൻ സാധ്യതയില്ലെന്നാണ് വിലയിരുത്തൽ

വാർസോ: യുക്രെയ്നിന് നേരെ റഷ്യ നടത്തിയ വ്യോമാക്രമണത്തിനിടെ, മിസൈലുകളും ഡ്രോണും നാറ്റോ സഖ്യകക്ഷിയായ പോളണ്ടിൽ പതിച്ചു. വെള്ളിയാഴ്ച പുലർച്ചെ തെക്കുകിഴക്കൻ പോളണ്ടിൽ രണ്ട് മിസൈലുകളും ഒരു ഡ്രോണുമാണ് പതിച്ചതെന്ന് പോളിഷ് പ്രതിരോധ മന്ത്രി വ്ലാഡിസ്ലാവ് കോസിനിയാക് കാമിഷ് സ്ഥിരീകരിച്ചു. മിസൈൽ പതിക്കുന്നതിൻ്റെ സിസിടിവി ദൃശ്യങ്ങളും പുറത്തുവന്നിട്ടുണ്ട്.

11 യൂറോപ്യൻ രാജ്യങ്ങളിലെ സൈനികർ പങ്കെടുക്കുന്ന സംയുക്ത സൈനികാഭ്യാസം നടക്കുന്ന മേഖലയ്ക്ക് വെറും 35 കിലോമീറ്റർ അകലെയാണ് മിസൈൽ പതിച്ചതെന്നത് സംഭവത്തിൻ്റെ ഗൗരവം വർധിപ്പിക്കുന്നു. ആർക്കും പരിക്കുകളില്ലെങ്കിലും, ഇത് റഷ്യയുടെ 'ബോധപൂർവമായ പ്രകോപനമാണെന്ന്' പോളിഷ് പ്രധാനമന്ത്രി ഡൊണൾഡ് ടസ്ക് ആരോപിച്ചു.

നവംബർ 20ന് രാത്രി യുക്രെയ്‌നിന് നേരെ റഷ്യ നടത്തിയ ഏറ്റവും വലിയ ആക്രമണത്തിനിടെയാണ് മിസൈലുകൾ അതിർത്തി കടന്ന് പോളണ്ടിലെത്തിയതെന്നാണ് റിപ്പോർട്ടുകള്‍. നാന്നൂറിലധികം ഡ്രോണുകളും 27 ബാലിസ്റ്റിക് മിസൈലുകൾ ഉൾപ്പെടെ 110 മിസൈലുകളാണ് റഷ്യ യുക്രെയ്‌നിലേക്ക് തൊടുത്തതെന്ന് പ്രസിഡന്റ് വൊളോഡിമിർ സെലെൻസ്‌കി പറഞ്ഞു. ആക്രമണത്തിൽ എട്ട് പേർ കൊല്ലപ്പെടുകയും ഇരുപതിലധികം പേർക്ക് പരിക്കേൽക്കുകയും ചെയ്തു.

പോളണ്ടിലെ നോവി ലിപോവീക്, റുഡ്നിക് നാഡ് സാനെം എന്നിവിടങ്ങളിലാണ് മിസൈലുകൾ പതിച്ചത്. രാജ്യാതിർത്തിയില്‍ നിന്നും 50 കിലോമീറ്റർ ഉള്ളിലായി ഒരു Kh-101 ക്രൂയിസ് മിസൈലും മൊളോഡിക് എന്ന സ്ഥലത്ത് ഒരു ഡ്രോണും പതിച്ചിട്ടുണ്ട്.

BREAKING: Poland issues air raid alerts following reports of a Russian missile entering its airspace. Footage shows explosion. https://t.co/Fl3ptd0jcg

യുക്രെയ്ൻ യുദ്ധത്തിന് ശേഷമുള്ള സമാധാന ദൗത്യങ്ങൾക്കായി യൂറോപ്യൻ സൈന്യത്തെ സജ്ജമാക്കാൻ നവംബർ ഒന്‍പത് മുതൽ തെക്കുകിഴക്കൻ പോളണ്ടിൽ രണ്ടാഴ്ച നീളുന്ന സൈനികാഭ്യാസം നടന്നുവരികയാണ്. ഇതിനോടനുബന്ധിച്ച് തന്നെയാണ് റഷ്യൻ മിസൈലുകൾ ഇവിടെ പതിച്ചതെന്ന് പോളണ്ട് ആരോപിച്ചു.

യുദ്ധം അവസാനിപ്പിക്കാനുള്ള സമാധാന ചർച്ചകൾക്ക് അമേരിക്ക മുൻകൈയെടുക്കുന്ന നിർണായക ഘട്ടത്തിലാണ് ഈ സംഭവം. ചർച്ചകളിൽ യൂറോപ്യൻ രാജ്യങ്ങളെ സമ്മർദ്ദത്തിലാക്കാനും ഭയപ്പെടുത്താനുമാണ് റഷ്യ ശ്രമിക്കുന്നതെന്നും ആരോപണമുണ്ട്. റഷ്യയെയും ക്രിമിയയെയും ബന്ധിപ്പിക്കുന്ന കെർച്ച് പാലത്തിന് നേരെ യുക്രെയ്ൻ അടുത്തിടെ നടത്തിയ ആക്രമണത്തിന് കടുത്ത തിരിച്ചടി നൽകുമെന്ന് റഷ്യൻ പ്രസിഡന്‍റ് പുടിൻ നേരത്തെ മുന്നറിയിപ്പ് നൽകിയിരുന്നു.

പോളിഷ് അതിർത്തിയില്‍ മിസെെലുകള്‍ പതിച്ച സംഭവത്തെ 'ഗുരുതരമായ വ്യോമാതിർത്തി ലംഘനം' എന്നാണ് നാറ്റോ സെക്രട്ടറി ജനറൽ മാർക്ക് റുട്ടെ വിശേഷിപ്പിച്ചത്. സംഭവം ഒരിക്കലും അംഗീകരിക്കാനാകില്ലെന്ന് ബ്രിട്ടീഷ് പ്രധാനമന്ത്രി ആൻഡി ബേൺഹാമും ജർമൻ വിദേശകാര്യ മന്ത്രാലയവും വ്യക്തമാക്കി. എന്നാൽ, പുടിൻ 'അബദ്ധത്തിൽ' ചെറിയ മിസൈലുകളും ഡ്രോണുകളും പോളണ്ടിൽ ഇട്ടതാണെന്നായിരുന്നു യുഎസ് പ്രസിഡന്‍റ് ഡോണാൾഡ് ട്രംപ് പ്രതികരിച്ചത്.

ഒരു നാറ്റോ അംഗരാജ്യത്തിന് നേരെയുണ്ടാകുന്ന ആക്രമണം സഖ്യത്തിലെ 32 രാജ്യങ്ങൾക്കും നേരെയുള്ള ആക്രമണമായി കണക്കാക്കുന്ന 'ആർട്ടിക്കിൾ 5' പ്രകാരമുള്ള കൂട്ടായ പ്രതിരോധ സംവിധാനം പോളണ്ട് ഇപ്പോൾ ആവശ്യപ്പെടാൻ സാധ്യതയില്ലെന്നാണ് വിലയിരുത്തൽ നേരിട്ടുള്ള ഒരു യുദ്ധത്തിലേക്ക് കാര്യങ്ങൾ നീങ്ങാൻ നാറ്റോ ആഗ്രഹിക്കുന്നില്ല. പകരം വ്യോമ പ്രതിരോധ സംവിധാനങ്ങൾ കൂടുതൽ ശക്തിപ്പെടുത്താൻ പോളണ്ട് നാറ്റോയോട് ആവശ്യപ്പെട്ടിട്ടുണ്ട്.

Content Highlights: Two missiles and a drone reportedly landed in southeastern Poland during a Russian air assault on Ukraine. Warsaw has raised security concerns, while NATO closely monitors the incident.

To advertise here,contact us