LIVE TV
ബോക്സ് ഓഫീസിൽ കളക്ഷൻ മുന്നേറ്റവുമായി മോഹൻലാൽ-സത്യൻ അന്തിക്കാട് ചിത്രം ഹൃദയപൂർവ്വം. മികച്ച പ്രതികരണമാണ് സിനിമയ്ക്ക് എങ്ങും ലഭിക്കുന്നത്. സിനിമയുടെ തിരക്കഥയ്ക്കും മോഹൻലാലിന്റെ പ്രകടനത്തിനും വലിയ കയ്യടികളാണ് ലഭിക്കുന്നത്. ചിത്രത്തിന്റെ വിജയത്തിനോടനുബന്ധിച്ച് സിനിമയിലെ താരങ്ങൾ ഇന്നലെ പ്രേക്ഷകരെ കാണാനായി തിയേറ്ററിൽ എത്തിയിരുന്നു. തിയേറ്ററിനുള്ളിൽ വെച്ച് സംഗീത് പ്രതാപിനെ പുകഴ്ത്തുന്ന ആരാധകന്റെ വീഡിയോയാണ് ഇപ്പോൾ സോഷ്യൽ മീഡിയയിൽ ശ്രദ്ധനേടുന്നത്.
'എടാ മോനെ നീ പടം തൂക്കി'യെന്നാണ് ആരാധകൻ സംഗീതിനോട് വിളിച്ച് പറയുന്നത്. നിറ ചിരിയോടെയാണ് നടൻ പ്രശംസ ഏറ്റവു വാങ്ങിയത്. ആരാധകനോട് നന്ദിയും സംഗീത് പറയുന്നുണ്ട്. സംഗീത് പ്രതാപും മാളവിക മോഹനനും കൊച്ചിയിലെ വനിത വിനീത തിയേറ്ററിൽ ആയിരുന്നു എത്തിയിരുന്നത്. തിയേറ്ററിനുള്ളിൽ വെച്ച് ഇവർ പ്രേക്ഷകരോട് സംസാരിക്കവെ മോഹൻലാൽ വീഡിയോ കോളിൽ എത്തിയിരുന്നു. വലിയ കയ്യടികളോടെയാണ് വീഡിയോ കോളിനെ പ്രേക്ഷകർ വരവേറ്റത്.
മൂന്ന് ദിവസങ്ങൾ പിന്നിടുമ്പോൾ 25.01 കോടിയാണ് സിനിമയുടെ ആഗോള കളക്ഷൻ. ആദ്യ ദിനം 8.42 കോടി നേടി സിനിമയ്ക്ക് തുടർന്നുള്ള ദിവസങ്ങളിലും വലിയ നേട്ടമുണ്ടാക്കാനായി. രണ്ടാം ദിനം 7.93 കോടിയും മൂന്നാം ദിവസം 8.66 കോടിയും ഹൃദയപൂർവം നേടി. ആദ്യ വീക്കെൻഡ് അവസാനിക്കുമ്പോൾ ചിത്രം 30 കോടിയ്ക്കും മുകളിൽ നേടുമെന്നാണ് ട്രേഡ് അനലിസ്റ്റുകളുടെ കണക്കുകൂട്ടൽ. അതേസമയം, ചിത്രം കാണാനെത്തിയ പ്രേക്ഷകരുടെ വീഡിയോകൾ വൈറലാണ്.
ചെറുപ്പക്കാർ മുതൽ പ്രായമായവർ വരെ തിയേറ്ററിലേക്ക് എത്തുന്ന കാഴ്ചയാണ് കാണാൻ സാധിക്കുന്നത്. മികച്ച അഭിപ്രായങ്ങളാണ് സിനിമയ്ക്ക് ലഭിക്കുന്നത്. ചിത്രത്തിൽ മോഹൻലാൽ-സംഗീത് പ്രതാപ് കോമ്പോ കലക്കിയെന്നാണ് പ്രതികരണങ്ങൾ. സംഗീതിന്റെ പ്രകടനത്തിന് വലിയ സ്വീകാര്യത ലഭിക്കുന്നുണ്ട്. തമാശകൾ എല്ലാം വർക്ക് ആയെന്നും ഒരു പക്കാ ഫീൽ ഗുഡ് സിനിമയാണ് ഹൃദയപൂർവ്വം എന്നാണ് അഭിപ്രായങ്ങൾ.
Content Highlights: Fan praises Sangeet's performance in hridayapoorvam movie
