LIVE TV
രാജ്യത്തെ തൊഴിലില്ലായ്മ നിരക്കിൽ ഗണ്യമായ കുറവ്. രാജ്യത്തെ യുവാക്കൾക്കിടയിലെ തൊഴിലില്ലായ്മ നിരക്ക് 2022ലെ 10.9 ശതമാനത്തിൽ നിന്ന് 2025ൽ 9.9 ശതമാനമായി കുറഞ്ഞതായി കേന്ദ്ര സർക്കാരിന്റെ ഏറ്റവും പുതിയ കണക്കുകൾ.
യുവ തൊഴിലില്ലായ്മ നിരക്ക് തുടർച്ചയായി കുറയുന്നത് രാജ്യത്തെ തൊഴിൽ വിപണിയിലെ മെച്ചപ്പെടലിന്റെ സൂചനയായാണ് വിലയിരുത്തുന്നത്. അതേസമയം, കണക്കുകൾക്കു പിന്നിലെ ചിത്രം പൂർണമായും ആശ്വാസകരമല്ല. പ്രത്യേകിച്ച് നഗരമേഖലയിലെ യുവാക്കൾക്കും യുവതികൾക്കും തൊഴിൽ ലഭിക്കുന്നതിൽ ഇപ്പോഴും വെല്ലുവിളികൾ തുടരുകയാണ്.
ഗ്രാമീണ മേഖലയെ അപേക്ഷിച്ച് നഗരങ്ങളിലാണ് യുവ തൊഴിലില്ലായ്മ നിരക്ക് ഉയർന്നുനിൽക്കുന്നത്. 2022ൽ നഗരങ്ങളിലെ യുവ തൊഴിലില്ലായ്മ 16.8 ശതമാനമായിരുന്നെങ്കിൽ 2025ൽ ഇത് 13.6 ശതമാനമായി കുറഞ്ഞു. ഗ്രാമീണ മേഖലയിൽ നിരക്ക് 8–9 ശതമാനത്തിനിടയിൽ തുടരുകയാണ്.
നഗരങ്ങളിലെ തൊഴിൽ വിപണിയിലേക്ക് ഓരോ വർഷവും വലിയ തോതിൽ പുതിയ ഉദ്യോഗാർഥികൾ എത്തുന്ന സാഹചര്യത്തിൽ, ലഭ്യമായ തൊഴിലവസരങ്ങളും തൊഴിൽ അന്വേഷകരുടെ കഴിവുകളും തമ്മിലുള്ള പൊരുത്തക്കേട് പ്രധാന വെല്ലുവിളിയായി തുടരുന്നു.
യുവ തൊഴിലില്ലായ്മയിലെ മൊത്തത്തിലുള്ള ഇടിവിനിടയിലും യുവതികളുടെ കണക്കിൽ അത്ര വലിയ പുരോഗതിയില്ല. 2022ൽ 11.6 ശതമാനമായിരുന്ന യുവതികളുടെ തൊഴിലില്ലായ്മ 2024ൽ 11.1 ശതമാനമായെങ്കിലും 2025ൽ വീണ്ടും 11.3 ശതമാനമായി ഉയർന്നു.
അതേസമയം, രാജ്യത്തെ വനിതാ തൊഴിൽപങ്കാളിത്ത നിരക്ക് (LFPR) ഗണ്യമായി ഉയർന്നിട്ടുണ്ട്. 2022ലെ 33.9 ശതമാനത്തിൽ നിന്ന് 2025ൽ ഇത് 40 ശതമാനമായി ഉയർന്നു. ജോലി ചെയ്യുകയോ ജോലി അന്വേഷിക്കുകയോ ചെയ്യുന്ന സ്ത്രീകളുടെ പങ്കാളിത്തം വർധിക്കുന്നുവെന്നതാണ് ഇതിലൂടെ വ്യക്തമാകുന്നത്.
ഇന്ത്യയിലെ യുവ തൊഴിലില്ലായ്മ നിരക്ക് ആഗോള ശരാശരിയേക്കാൾ താഴെയാണ്. 2025ൽ 15–24 പ്രായക്കാരുടെ ആഗോള യുവ തൊഴിലില്ലായ്മ നിരക്ക് 12.6 ശതമാനമായിരുന്നപ്പോൾ ഇന്ത്യയിലെ നിരക്ക് 9.9 ശതമാനമാണ്.
എന്നാൽ തൊഴിലില്ലായ്മ നിരക്ക് കുറയുന്നത് മാത്രം തൊഴിൽ വിപണിയുടെ പൂർണ ചിത്രം നൽകുന്നില്ല. ലഭിക്കുന്ന ജോലികളുടെ നിലവാരം, ശമ്പളം, തൊഴിൽ സുരക്ഷ, കഴിവിനനുസരിച്ചുള്ള അവസരങ്ങൾ എന്നിവയും പ്രധാനമാണ്.
2025ൽ രാജ്യത്തെ ആകെ തൊഴിൽ ചെയ്യുന്നവരുടെ ശരാശരി എണ്ണം 61.6 കോടിയായിരുന്നു. ഇതിൽ 41.6 കോടി പുരുഷന്മാരും 20 കോടി സ്ത്രീകളുമാണ്. അതേസമയം, തൊഴിൽ മേഖലയിൽ കൃഷിയുടെ വിഹിതം 2024ലെ 44.8 ശതമാനത്തിൽ നിന്ന് 2025ൽ 43 ശതമാനമായി കുറഞ്ഞു. നിർമാണ മേഖലയിലെ തൊഴിൽ വിഹിതം 12.1 ശതമാനമായും വ്യാപാരം, ഹോട്ടൽ, റസ്റ്ററന്റ് മേഖലകളിലെ വിഹിതം 12.9 ശതമാനമായും ഉയർന്നു.
ഇതോടെ രാജ്യത്തെ തൊഴിൽ വിപണി പരമ്പരാഗത കൃഷി അധിഷ്ഠിത തൊഴിലുകളിൽനിന്ന് കൂടുതൽ വൈവിധ്യമാർന്ന മേഖലകളിലേക്ക് മാറുന്നതിന്റെ സൂചനകളും പുറത്തുവരുന്നുണ്ട്.
യുവ തൊഴിലില്ലായ്മ 10 ശതമാനത്തിന് താഴെയെത്തിയത് ആശ്വാസം നൽകുന്ന കണക്കാണെങ്കിലും, തൊഴിൽ ലഭിക്കുന്ന യുവാക്കളുടെ എണ്ണം മാത്രമല്ല, അവർക്ക് ലഭിക്കുന്ന ജോലിയുടെ ഗുണനിലവാരവും ഇനി നിർണായകമാകും. പ്രത്യേകിച്ച് നഗരങ്ങളിലെ ഉയർന്ന യുവ തൊഴിലില്ലായ്മയും യുവതികളുടെ തൊഴിലില്ലായ്മയിലെ മന്ദഗതിയിലുള്ള പുരോഗതിയും പരിഹരിക്കാനായാൽ മാത്രമേ തൊഴിൽ വിപണിയിലെ ഈ നേട്ടം കൂടുതൽ ശക്തമാകൂ.
2022ലെ 10.9 ശതമാനത്തിൽ നിന്ന് 2025ൽ 9.9 ശതമാനത്തിലേക്കുള്ള ഇടിവ് ഒരു നല്ല സൂചനയാണ്. എന്നാൽ രാജ്യത്തെ യുവതലമുറയുടെ തൊഴിൽ പ്രതീക്ഷകൾ യാഥാർഥ്യമാകണമെങ്കിൽ കൂടുതൽ തൊഴിലവസരങ്ങൾക്കൊപ്പം കൂടുതൽ മികച്ച തൊഴിലവസരങ്ങളും സൃഷ്ടിക്കേണ്ടതുണ്ട്.
Content Highlights: Govt says youth unemployment rate declined to 9.9% in 2025 from 10.9% in 2022
