'സേന'യെ വിറപ്പിച്ച് കെഎല്‍ രാഹുല്‍; ഇന്ത്യക്കാരന്റെ ചരിത്ര റെക്കോഡ്

എല്ലാ സേനാ രാജ്യങ്ങളിലും ടെസ്റ്റ് സെഞ്ചുറി നേടുന്ന ആദ്യ ഇന്ത്യന്‍ ഓപ്പണറായി കെ.എല്‍. രാഹുല്‍ ചരിത്രം കുറിച്ചു

വെല്ലിംഗ്ടണിലെ ബേസിന്‍ റിസര്‍വില്‍ ന്യൂസിലന്‍ഡിനെതിരെ നടക്കുന്ന ഒന്നാം ടെസ്റ്റില്‍ തന്റെ 13-ാമത് ടെസ്റ്റ് സെഞ്ചുറി തികച്ചതോടെ, നാല് സേനാ രാജ്യങ്ങളിലും (ദക്ഷിണാഫ്രിക്ക, ഇംഗ്ലണ്ട്, ന്യൂസിലന്‍ഡ്, ഓസ്ട്രേലിയ) ടെസ്റ്റ് സെഞ്ചുറി നേടുന്ന ആദ്യ ഇന്ത്യന്‍ ഓപ്പണര്‍ എന്ന ചരിത്രനേട്ടം കെ.എല്‍. രാഹുല്‍ ശനിയാഴ്ച സ്വന്തമാക്കി. 207 പന്തുകളില്‍ നിന്നാണ് രാഹുല്‍ ഈ നാഴികക്കല്ല് പിന്നിട്ടത്. ഇതോടെ നാല് സേനാ രാജ്യങ്ങളിലും ടെസ്റ്റ് സെഞ്ചുറി നേടിയ ഏഷ്യന്‍ ബാറ്റര്‍മാരുടെ എലൈറ്റ് പട്ടികയിലും രാഹുല്‍ ഇടംപിടിച്ചു.

മുഹമ്മദ് അസ്ഹറുദ്ദീന്‍, സച്ചിന്‍ തെണ്ടുല്‍ക്കര്‍, സയീദ് അന്‍വര്‍, രാഹുല്‍ ദ്രാവിഡ്, യൂനിസ് ഖാന്‍, കുമാര്‍ സംഗക്കാര, വിരാട് കോഹ്ലി എന്നിവര്‍ക്കൊപ്പം ഈ നേട്ടം കൈവരിക്കുന്ന എട്ടാമത്തെ ഏഷ്യന്‍ ബാറ്ററായി 34-കാരനായ രാഹുല്‍ മാറി. ഈ അപൂര്‍വ നേട്ടം സ്വന്തമാക്കുന്ന അഞ്ചാമത്തെ ഇന്ത്യന്‍ താരവുമാണ് അദ്ദേഹം.

ഈ പട്ടികയില്‍, ഓപ്പണറായി ഇറങ്ങി നാല് സേനാ രാജ്യങ്ങളിലും ടെസ്റ്റ് സെഞ്ചുറി നേടിയ ഒരേയൊരു താരങ്ങള്‍ രാഹുലും മുന്‍ പാകിസ്താന്‍ ഓപ്പണര്‍ സയീദ് അന്‍വറും മാത്രമാണ് എന്നതാണ് ശ്രദ്ധേയം. ന്യൂസീലന്‍ഡിലെ തന്റെ കന്നി ടെസ്റ്റ് സെഞ്ചുറിയോടെ നാല് രാജ്യങ്ങളിലെയും സെഞ്ചുറി നേട്ടം രാഹുല്‍ പൂര്‍ത്തിയാക്കി. നേരത്തെ ഓസ്ട്രേലിയ, ഇംഗ്ലണ്ട്, ദക്ഷിണാഫ്രിക്ക എന്നിവിടങ്ങളില്‍ സെഞ്ചുറി നേടിയിരുന്ന രാഹുലിന്റെ പട്ടികയിലേക്ക് ഏറ്റവും ഒടുവിലായി ന്യൂസിലന്‍ഡും ഇടംപിടിച്ചു. ഈ സെഞ്ചുറിയോടെ രാഹുലിന്റെ ആകെ ടെസ്റ്റ് സെഞ്ചുറികളുടെ എണ്ണം 13 ആയി ഉയര്‍ന്നു; ഇതില്‍ 10 എണ്ണം വിദേശ മണ്ണിലും മൂന്നെണ്ണം നാട്ടിലുമാണ്. വിദേശ സാഹചര്യങ്ങളില്‍ സ്ഥിരതയാര്‍ന്ന പ്രകടനം കാഴ്ചവെക്കുന്ന ബാറ്റര്‍ എന്ന അദ്ദേഹത്തിന്റെ മികവിന് അടിവരയിടുന്നതാണ് ഈ കണക്കുകള്‍.

സമീപവര്‍ഷങ്ങളിലെ ഏറ്റവും മികച്ച ടെസ്റ്റ് ഓപ്പണര്‍മാരുടെ നിരയിലേക്കും ഈ സെഞ്ചുറി രാഹുലിനെ ഉയര്‍ത്തി. 2021-ന് ശേഷം ഓപ്പണര്‍ എന്ന നിലയില്‍ ഏഴ് ടെസ്റ്റ് സെഞ്ചുറികള്‍ നേടിയ രാഹുല്‍, ബെന്‍ ഡക്കറ്റ്, യശസ്വി ജയ്സ്വാള്‍, ദിമുത് കരുണരത്നെ എന്നിവര്‍ക്കൊപ്പം ഈ കാലയളവില്‍ ഏറ്റവും കൂടുതല്‍ സെഞ്ചുറികള്‍ നേടിയ ഓപ്പണര്‍മാരുടെ പട്ടികയില്‍ ഒന്നാമതെത്തി. നിലവില്‍ നടക്കുന്ന 2025-27 ലോക ടെസ്റ്റ് ചാമ്പ്യന്‍ഷിപ്പ് സൈക്കിളില്‍ നാല് സെഞ്ചുറികളുമായി ടോം ലാഥം, ട്രാവിസ് ഹെഡ് എന്നിവര്‍ക്കൊപ്പം ഏറ്റവും കൂടുതല്‍ സെഞ്ചുറി നേടിയ ഓപ്പണര്‍മാരില്‍ ഒരാളായും രാഹുല്‍ മാറി.

ഇന്ത്യന്‍ ഓപ്പണര്‍മാരില്‍ 12 ടെസ്റ്റ് സെഞ്ചുറികളുമായി രാഹുല്‍ മുരളി വിജയ്ക്കൊപ്പമെത്തി. 33 സെഞ്ചുറികളുമായി സുനില്‍ ഗവാസ്‌കറാണ് പട്ടികയില്‍ ഒന്നാമത്. 22 സെഞ്ചുറികളുമായി വീരേന്ദര്‍ സെവാഗ് രണ്ടാമതും, ഒന്‍പത് സെഞ്ചുറികള്‍ വീതമുള്ള ഗൗതം ഗംഭീറും രോഹിത് ശര്‍മ്മയും തൊട്ടുപിന്നിലുമുണ്ട്.

നാല് സേനാ രാജ്യങ്ങളിലും അര്‍ദ്ധസെഞ്ചുറിയിലധികം സ്‌കോര്‍ (50+) നേടുന്ന ആദ്യ ഇന്ത്യന്‍ ഓപ്പണര്‍ എന്ന നേട്ടം സ്വന്തമാക്കിയതിന് പിന്നാലെയാണ് രാഹുലിന്റെ ഈ സെഞ്ചുറി നേട്ടം. ന്യൂസിലന്‍ഡിനെതിരെ രണ്ടാം ദിനം പുറത്താകാതെ അര്‍ധസെഞ്ചുറി നേടിയ അദ്ദേഹം ശനിയാഴ്ച അത് ചരിത്രപരമായ സെഞ്ചുറിയാക്കി മാറ്റുകയായിരുന്നു.

52 റണ്‍സുമായി മൂന്നാം ദിനം ബാറ്റിംഗ് പുനരാരംഭിച്ച രാഹുല്‍, അര്‍ദ്ധസെഞ്ചുറി നേടിയ ദേവ്ദത്ത് പടിക്കലിനൊപ്പം ചേര്‍ന്ന് ഇന്നിംഗ്‌സ് തുടര്‍ന്നു. തലേദിവസം യശസ്വി ജയ്സ്വാള്‍ പുറത്തായതിന് ശേഷം രണ്ടാം വിക്കറ്റില്‍ മികച്ച കൂട്ടുകെട്ട് പടുത്തുയര്‍ത്തിയ ഇരുവരും ഇന്ത്യയുടെ നില ഭദ്രമാക്കി. ന്യൂസിലന്‍ഡിന്റെ ഒന്നാം ഇന്നിംഗ്‌സ് സ്‌കോറായ 368 റണ്‍സിന് മറുപടിയായി ബാറ്റ് ചെയ്യുന്ന ഇന്ത്യയ്ക്ക് രാഹുലിന്റെ സെഞ്ചുറി വലിയ കരുത്തായി. മൂന്നാം ദിനം ലഞ്ചിന് പിരിയുമ്പോള്‍ രാഹുല്‍ 93 റണ്‍സുമായും പടിക്കല്‍ 53 റണ്‍സുമായും ക്രീസിലുണ്ടായിരുന്ന ഇന്ത്യ 239/1 എന്ന നിലയിലായിരുന്നു; ഇടവേളയ്ക്ക് ശേഷം രാഹുല്‍ തന്റെ സെഞ്ചുറി പൂര്‍ത്തിയാക്കി. ഇന്ത്യയിലെയും ഏഷ്യയിലെയും ഏറ്റവും മികച്ച ബാറ്റര്‍മാര്‍ ഉള്‍പ്പെടുന്ന എക്‌സ്‌ക്ലൂസീവ് സേനാ സെഞ്ചുറി ക്ലബ്ബില്‍ ഇടംപിടിച്ചതോടെ, വിദേശ ടെസ്റ്റ് ക്രിക്കറ്റിലെ രാഹുലിന്റെ ശ്രദ്ധേയമായ റെക്കോര്‍ഡിന് ഈ നാഴികക്കല്ല് കൂടുതല്‍ തിളക്കമേകി.

content highlights: KL Rahul Rattles SENA Nations, Scripts Historic Record for an Indian Batter

To advertise here,contact us