Get the latest news at
your fingertips!
Download our app now
LIVE TV
Search
എറണാകുളം: പയ്യന്നൂരിലെ എല്‍ഡിഎഫ് സ്ഥാനാര്‍ത്ഥി വി കെ നിഷാദ് ഹൈക്കോടതിയില്‍. പൊലീസിനെ ബോംബ് എറിഞ്ഞ കേസിലെ ശിക്ഷാവിധി തടയണം എന്നാവശ്യപ്പെട്ടാണ് കോടതിയെ സമീപിച്ചത്. ഹര്‍ജിയില്‍ ഹൈക്കോടതി പ്രോസിക്യൂഷന് നോട്ടീസ് അയച്ചു. ഡിസംബര്‍ എട്ടിനകം മറുപടി നല്‍കാന്‍ ഹൈക്കോടതിയുടെ നിര്‍ദ്ദേശിച്ചിരിക്കുന്നത്. ശിക്ഷാവിധി തടയണം എന്ന ആവശ്യത്തില്‍ ഹൈക്കോടതി ഡിസംബര്‍ എട്ടിന് തീരുമാനം എടുക്കും. 20 വര്‍ഷം തടവുശിക്ഷയെ തുടര്‍ന്ന് വി കെ നിഷാദ് ജയിലിലാണ്.
കഴിഞ്ഞ ദിവസം കേസില്‍ ശിക്ഷിക്കപ്പെട്ട വി കെ നിഷാദിന്റെ സ്ഥാനാര്‍ത്ഥിത്വത്തെ ന്യായീകരിച്ച് ഡിവൈഎഫ്ഐ സംസ്ഥാന സെക്രട്ടറി വികെ സനോജ് രംഗത്തെത്തിയിരുന്നു. രാഷ്ട്രീയ പ്രവര്‍ത്തകരാകുമ്പോള്‍ പല കേസുകളും ഉണ്ടാകും അതിനെ കാര്യമായി എടുക്കേണ്ടതില്ലെന്നായിരുന്നു ജയിലിലായ സ്ഥാനാര്‍ത്ഥിയെ കുറിച്ച് ഡിവൈഎഫ്ഐ നേതാവിന്റെ പ്രതികരണം. പയ്യന്നൂര്‍ നഗരസഭ 46-ാം വാര്‍ഡിലാണ് വി കെ നിഷാദ് മത്സരിക്കുന്നത്. സ്ഥാനാര്‍ത്ഥിക്കായുള്ള പ്രചരണം കൊഴുപ്പിച്ചിരിക്കുകയാണ് ഡിവൈഎഫ്ഐ. നിഷാദിനായി വിവിധ സംഘങ്ങളായി വീടുകള്‍ കയറി വോട്ടഭ്യര്‍ത്ഥിക്കുകയാണ് ഡിവൈഎഫ്ഐ.
ഇരുപത് വര്‍ഷത്തേക്കാണ് നിഷാദിനെ കോടതി ശിക്ഷിച്ചിരിക്കുന്നത്. ഈ സാഹചര്യത്തിലും നിഷാദിനെ സ്ഥാനാര്‍ത്ഥിയാക്കാനായിരുന്നു പാര്‍ട്ടി തീരുമാനം. കേസില്‍ വിധി വരുമെന്ന് അറിയാമായിരുന്നതിനാല്‍ ഡമ്മി സ്ഥാനാര്‍ത്ഥിയെ നിര്‍ത്തിയെങ്കിലും ജയിലിലായിട്ടും നിഷാദ് തന്നെ മത്സരിക്കട്ടെ എന്ന തീരുമാനത്തിലെത്തുകയായിരുന്നു. പത്രിക നല്‍കിയ സമയത്ത് വിധി വരാത്തതിനാല്‍ മത്സരിക്കാന്‍ തടസമില്ലായിരുന്നു. കൊലപാതകവും കൊലപാതക ശ്രമവും ഉള്‍പ്പെടെ 19 കേസില്‍ പ്രതിയായ നിഷാദ് കഴിഞ്ഞ അഞ്ചുവര്‍ഷമായി മറ്റൊരു വാര്‍ഡില്‍ കൗണ്‍സിലറായിരുന്നു.
ശിക്ഷ സ്റ്റേ ചെയ്തില്ലെങ്കില്‍ തെരഞ്ഞെടുപ്പില്‍ വിജയിച്ചാല്‍ സ്ഥാനം രാജിവയ്ക്കേണ്ടി വരും. സ്റ്റേ ലഭിക്കുമെന്ന പ്രതീക്ഷയിലാണ് മത്സരിക്കുന്നത്. തെരഞ്ഞെടുപ്പില്‍ വിജയിച്ചാല്‍ പ്രതിസന്ധിയുണ്ടാകില്ലെന്നും നിയമപരമായി അതിനെ നേരിടുമെന്നുമാണ് ഡിവൈഎഫ്ഐ സംസ്ഥാന സെക്രട്ടറി പറഞ്ഞിരിക്കുന്നത്.
Content Highlights: Jailed LDF Candidate approached Kerala High Court on Bomb Hurling case
