LIVE TV
കൊച്ചി: റിപ്പോർട്ടർ ടിവിക്ക് എതിരായ യൂത്ത് കോൺഗ്രസ് അതിക്രമത്തിനെതിരെ രൂക്ഷമായി പ്രതികരിച്ച് സിപിഐ സംസ്ഥാന സെക്രട്ടറി ബിനോയ് വിശ്വം. വാർത്തകളോട് വിയോജിക്കാം, പക്ഷെ വാർത്തകൾ പ്രസിദ്ധീകരിച്ചതിന്റെ പേരിൽ ആക്രമണം നടത്തുന്നത് ശരിയല്ലെന്ന് ബിനോയ് വിശ്വം വ്യക്തമാക്കി. ആത്യന്തികമായി അത് ജനാധിപത്യ വ്യവസ്ഥകളുടെ അടിവേരിനെയും ബാധിക്കും. എല്ലാവർക്കുമിത് ബോധ്യമാകേണ്ട കാര്യമാണ്. വാർത്തകളിലെ തെറ്റുകളൊക്കെ തുറന്നുകാട്ടാം. പക്ഷേ മാധ്യമ പ്രവർത്തകരെയും ഓഫീസുകളെയും ആക്രമിക്കുന്നത് കാടത്തമാണ്. ജനാധിപത്യ സമൂഹത്തിന് ഇത് യോജിച്ചതല്ല. ഇത് നന്മയിലേക്കുള്ള പോക്കല്ല. ഇതിലൂടെ നേട്ടമുണ്ടാക്കുന്നത് ഫാസിസ്റ്റുകളാണ്. മുഖം നന്നല്ലാത്തതിന് കണ്ണാടി തല്ലിപ്പൊട്ടിച്ചിട്ട് കാര്യമില്ലെന്നും അദ്ദേഹം പരിഹസിച്ചു.
മുഖം നന്നാക്കാൻ നോക്കണം. അതാണ് വേണ്ടത്. മാധ്യമങ്ങളുടെ വായടപ്പിക്കാമെന്ന വ്യാമോഹം വേണ്ട. കമ്മ്യൂണിസ്റ്റ് പാർട്ടി എല്ലാ ശക്തിയോടെയും ഈ ആക്രമങ്ങളെ തള്ളിപ്പറയുന്നു. ഇത്തരത്തിൽ ആക്രമണം നേരിടുന്ന റിപ്പോർട്ടറിനോടും മറ്റ് മാധ്യമങ്ങളോടും കമ്മ്യൂണിസ്റ്റ് പാർട്ടി ഐക്യദാർഢ്യം പ്രഖ്യാപിക്കുന്നുവെന്നും ബിനോയ് വിശ്വം കൂട്ടിച്ചേർത്തു.
റിപ്പോർട്ടർ ടിവി തൃശൂർ ബ്യൂറോ രാവിലെയോടെയാണ് യൂത്ത് കോൺഗ്രസ് നേതാക്കൾ ആക്രമിച്ചത്. യൂത്ത് കോൺഗ്രസ് സംസ്ഥാന ജനറൽ സെക്രട്ടറി മിഥുൻ മോഹൻ, ജില്ലാ വൈസ് പ്രസിഡന്റ് വിഷ്ണു ചന്ദ്രൻ, തൃശൂർ അസംബ്ലി പ്രസിഡന്റ് കെ സുമേഷ്, വിൽവട്ടം മണ്ഡലം പ്രസിഡന്റ് സൗരാഗ്, നിഖിൽദേവ്, അമൽ ജയിംസ് എന്നിവരാണ് ഓഫീസ് ആക്രമിച്ചത്. മുദ്രാവാക്യം വിളിച്ചെത്തിയ പ്രവർത്തകർ ബ്യൂറോയിലെ കാറിന് മുകളിൽ യൂത്ത് കോൺഗ്രസിന്റെ കൊടി നാട്ടി.
മുകളിലെ ഓഫീസിലേക്കുള്ള പടികളിലും വാതിലിലും കരി ഓയിൽ ഒഴിച്ചു. വാതിലിൽ റിപ്പോർട്ടറിനെതിരെ നോട്ടീസ് പതിച്ചു. റിപ്പോർട്ടർ ചാനലിനെ അധിക്ഷേപിക്കുന്ന വാചകങ്ങളാണ് നോട്ടീസിലുള്ളത്. സംഭവത്തിൽ റിപ്പോർട്ടർ ടിവി മുഖ്യമന്ത്രിക്ക് പരാതി നൽകി. മാധ്യമ സ്വാതന്ത്ര്യത്തിന് മേലുള്ള കടന്നുകയറ്റമെന്നും പ്രതികളെ ഉടൻ അറസ്റ്റ് ചെയ്യണമെന്നും സർക്കാരിനോട് റിപ്പോട്ടർ ടിവി ആവശ്യപ്പെട്ടു.
മാധ്യമങ്ങൾക്കെതിരെ നടക്കുന്ന അതിക്രമങ്ങളെ അപലപിക്കുന്നുവെന്നും ശക്തമായ നടപടിയും നിലപാടും വേണമെന്നും ധനമന്ത്രി കെ എൻ ബാലഗോപാൽ മാധ്യമങ്ങളോട് പറഞ്ഞു. മാധ്യമം ഒരു കാര്യം പറഞ്ഞാൽ ആക്രമിച്ചും ഭീഷണിപ്പെടുത്തിയും പുറകോട്ട് കൊണ്ടുപോകാൻ കഴിയില്ല. പഴമുറം കൊണ്ട് സൂര്യനെ തടുക്കാൻ കഴിയില്ല. വാർത്തകൾ അങ്ങനെയൊന്നും തടഞ്ഞു വെക്കാൻ കഴിയില്ലെന്നും കെ എൻ ബാലഗോപാൽ പറഞ്ഞു. ഏതെങ്കിലും ഭാഗത്തുനിന്ന് അത്തരത്തിൽ അതിക്രമമുണ്ടായപ്പോഴെല്ലാം ഇടതുപക്ഷം അപലപിച്ചിട്ടുണ്ടെന്നും അദ്ദേഹം കൂട്ടിച്ചേർത്തു.
യൂത്ത് കോൺഗ്രസ് പ്രവർത്തകർ പേ ഇളകിയ സംഘത്തെപ്പോലെ പെരുമാറുകയാണെന്ന് ഡിവൈഎഫ്ഐ സംസ്ഥാന പ്രസിഡന്റ് വി വസീഫ് റിപ്പോർട്ടറിനോട് പ്രതികരിച്ചു. കോൺഗ്രസ് ഇത്രയധികം ജീർണിച്ച ഒരു സംഘടനയാണെന്ന് ബോധ്യമാകുന്ന തരത്തിലുള്ള അനുഭവങ്ങളാണ് കഴിഞ്ഞ കുറച്ച് ദിവസങ്ങളായി വന്നുകൊണ്ടിരിക്കുന്നത്. രാഹുൽ മാങ്കൂട്ടത്തിലിനെതിരായി ഉയർന്നുവന്ന ആരോപണം മാധ്യമ അജണ്ടയാണെന്ന് വരുത്തിത്തീർക്കാനാണ് ശ്രമം നടക്കുന്നത്. സ്വതന്ത്ര മാധ്യമത്തെ സംഘപരിവാറുകാർ എങ്ങനെയാണോ ഭയക്കുന്നത്, അവരെങ്ങനെയാണോ നേരിടുന്നത് ആ കോൺഗ്രസ് നേതൃത്വത്തെ നേരിടാൻ, നിലയ്ക്ക് നിർത്താൻ ഡിവൈഎഫ്ഐ ഇറങ്ങും. നിഷ്പക്ഷമായ മാധ്യമ പ്രവർത്തനത്തെ, സത്യസന്ധമായ മാധ്യമ പ്രവർത്തനത്തെ കേരളത്തിനകത്ത് മുന്നോട്ട് കൊണ്ടുപോകാനാവശ്യമായ എല്ലാ പിന്തുണയും ഡിവൈഎഫ്ഐയുടെ ഭാഗത്തുനിന്നുമുണ്ടാകുമെന്നും അദ്ദേഹം വ്യക്തമാക്കി.
Content Highlights: binoy viswam against youth congress attack on reporter office
