Get the latest news at
your fingertips!
Download our app now
LIVE TV
Search
സിദ്ധാർഥ് മൽഹോത്ര, ജാൻവി കപൂർ എന്നിവരെ കേന്ദ്ര കഥാപാത്രങ്ങളാക്കി തുഷാർ ജലോട്ട സംവിധാനം ചെയ്യുന്ന സിനിമയാണ് 'പരം സുന്ദരി'. ഒരു റൊമാന്റിക് കോമഡി ഴോണറിൽ പുറത്തിറങ്ങുന്ന സിനിമയുടെ ട്രെയിലറിന് വലിയ ട്രോളുകളാണ് ലഭിച്ചത്. ഇപ്പോഴിതാ സിനിമയിലെ പുതിയ ഗാനം ഇന്നലെ അണിയറപ്രവർത്തകർ പുറത്തുവിട്ടിരുന്നു. ഡേഞ്ചർ എന്നാരംഭിക്കുന്ന ഗാനത്തിനും വലിയ തോതിലുള്ള ട്രോളുകളും വിമർശനങ്ങളുമാണ് ലഭിക്കുന്നത്.
ഗാനത്തിലെ മലയാളം വരികൾക്കാണ് ട്രോളുകൾ നേരിടുന്നത്. 'ചുവപ്പ് നിറത്തിലെ സാരിയിൽ ഞങ്ങൾ എല്ലാം ഡേഞ്ചർ ആണല്ലോ' എന്ന മലയാളം വാരിയിലൂടെയാണ് ഗാനം ആരംഭിക്കുന്നത്. എന്നാൽ ഇത് ഇതേ ഹിന്ദി അർത്ഥമുള്ള വരികളുടെ മോശം ട്രാൻസ്‌ലേഷൻ എന്നാണ് സോഷ്യൽ മീഡിയ കണ്ടെത്തിയിരിക്കുന്നത്. ഗൂഗിൾ ട്രാൻസ്‌ലേറ്ററിൽ ഇട്ടാണോ വരികൾ ഉണ്ടാക്കിയതെന്നാണ് പലരും സോഷ്യൽ മീഡിയയിലൂടെ ചോദിക്കുന്നത്. കേരളത്തിനെ പശ്ചാത്തലമാക്കി ഒരു സിനിമ ചെയ്യുമ്പോൾ അതിലെ ഗാനങ്ങൾ എഴുത്തുമായി ഒരു മലയാളി എഴുത്തുകാരനെപ്പോലെ കിട്ടിയില്ലേ എന്നാണ് മറ്റു കമന്റുകൾ.
നേരത്തെ ട്രെയ്‌ലർ റിലീസിന് പിന്നാലെ ചിത്രത്തിലെ മലയാളം ഡയലോഗുകൾക്കും ജാൻവിയുടെ കഥാപാത്രത്തിനും ട്രോളുകൾ ലഭിച്ചിരുന്നു. ചിത്രത്തിൽ സിദ്ധാർഥ് നോർത്ത് ഇന്ത്യനായും ജാൻവി മലയാളിയുമായിട്ടാണ് എത്തുന്നത്. പരം എന്ന കഥാപാത്രമായി സിദ്ധാർഥ് എത്തുമ്പോൾ സുന്ദരി ആയിട്ടാണ് ജാൻവി എത്തുന്നത്. ട്രെയ്‌ലറിൽ ജാൻവി സ്വന്തം പേര് പറയുന്ന ഡയലോഗുകൾ വ്യക്തമല്ലെന്നും ഒരു മലയാളിയായി നടിയെ സങ്കൽപ്പിക്കാൻ കഴിയുന്നില്ലെന്നുമാണ് കമന്റുകൾ. ചെന്നൈ എക്സ്പ്രസിലെ മീനമ്മയ്ക്കും കേരള സ്റ്റോറിയിലെ ശാലിനി ഉണ്ണികൃഷ്ണനും ഒത്ത എതിരാളിയാകും ഈ സിനിമയിലെ ജാൻവിയുടെ സുന്ദരി എന്നാണ് മറ്റൊരു വിഭാഗം എക്സിൽ കുറിക്കുന്നത്. ചിത്രം ആഗസ്റ്റ് 29 ന് തിയേറ്ററിലെത്തും.
കേരളത്തിൽ മോഹൻലാൽ തമിഴിൽ രജനികാന്തും തെലുങ്കിൽ അല്ലു അർജുനും കന്നഡയിൽ യഷും ആണ് മറ്റു സൂപ്പർസ്റ്റാറുകൾ എന്നുമാണ് ട്രെയ്‌ലറിൽ ജാൻവിയുടെ കഥാപാത്രം പറയുന്നത്. ചിത്രത്തിലെ ആദ്യ ഗാനമായ 'പർദേശിയ' നേരത്തെ പുറത്തുവന്നിരുന്നു. ഒരു റൊമാന്റിക് മൂഡിൽ ഒരുക്കിയ ഗാനം പാടിയിരിക്കുന്നത് സോനു നിഗം, കൃഷ്ണകാലി സാഹ, സച്ചിൻ-ജിഗർ എന്നിവർ ചേർന്നാണ്. അമിതാഭ് ഭട്ടാചാര്യ ആണ് ഗാനത്തിനായി വരികൾ എഴുതിയിരിക്കുന്നത്. കേരളത്തിന്റെ പശ്ചാത്തലത്തിലാണ് ഗാനം ഒരുക്കിയിരിക്കുന്നത്. മികച്ച പ്രതികരണമാണ് ഗാനത്തിന് ലഭിക്കുന്നത്.
Content Highlights: Param sundari song gets trolled for bad malayalam lyrics
