'മറ്റേത് കളിക്കാരെയും പോലെ തന്നെ...'; രോഹിത്തിനെയും കോഹ്‌ലിയെയും നേരിടുന്നതിനെ കുറിച്ച് ബാവുമ

ഇന്ത്യയുടെ സൂപ്പർ താരങ്ങളായ രോഹിത് ശർമയെയും വിരാട് കോഹ്‌ലിയെയും നേരിടുന്നതിലെ ആവേശം പങ്കുവെച്ച് ദക്ഷിണാഫ്രിക്കൻ ക്യാപ്റ്റൻ ടെംബ ബാവുമ. നാളെ നടക്കുന്ന ഇന്ത്യ-ദക്ഷിണാഫ്രിക്ക ആദ്യ ഏകദിന മത്സരത്തിന് മുന്നോടിയായി സംസാരിക്കവേയായിരുന്നു ബാവുമയുടെ പ്രതികരണം. രോഹിത്തിനെയും കോഹ്‌ലിയെയും മറ്റേത് കളിക്കാരെയും പോലെ നേരിടുമെന്നും ബാവുമ പറഞ്ഞു.

'ഇത് വളരെ ആവേശകരമാണെന്നാണ് എനിക്ക് തോന്നുന്നത്. രണ്ട് ഇതിഹാസങ്ങളും തിരിച്ചുവന്ന് കുറച്ചുകാലം ഇന്ത്യൻ മണ്ണിൽ കളിക്കുന്നത് കാണുന്നത് ആരാധകർക്കും വലിയ ആവേശമാണ്. ആ രണ്ട് വലിയ താരങ്ങൾക്കൊപ്പം കളിക്കുമ്പോൾ ലഭിക്കുന്ന ഒരു വ്യത്യസ്തമായ ഊർജ്ജത്തിന്റെ ഭാഗമാകുന്നതിൽ ഞങ്ങളും ആവേശഭരിതരാണ്. അതിന് വേണ്ടി വളരെ ആകാംക്ഷയോടെയാണ് ഞങ്ങൾ കാത്തിരിക്കുന്നത്', സ്റ്റാർ സ്പോർട്സിനോട് സംസാരിക്കവേ ബാവുമ പറഞ്ഞു.

പരിചയസമ്പന്നരായ ബാറ്റിംഗ് ജോഡിയെ പരാജയപ്പെടുത്താൻ ദക്ഷിണാഫ്രിക്കയ്ക്ക് എന്തെല്ലാം പദ്ധതികളാണുള്ളതെന്നായിരുന്നു അടുത്ത ചോദ്യം. 'മറ്റേതൊരു കളിക്കാരെയും പോലെ ഞങ്ങൾ‌ രോഹിത്തിനെയും വിരാടിനെയും നേരിടും. അവരുടെ ചുറ്റുപാടിലാണ് ഞങ്ങൾ മത്സരങ്ങൾക്കുള്ള തയ്യാറെടുപ്പുകൾ നടത്തുന്നത്. ഏത് തന്ത്രവും ഞങ്ങൾ കണ്ടെത്തും. എന്നാൽ അവർക്കൊപ്പം കളിക്കുമ്പോഴുള്ള ഊർജ്ജം അൽപ്പം വ്യത്യസ്തമായിരിക്കുമെന്ന് ഞങ്ങൾക്കറിയാം, പക്ഷേ അത് ആവേശകരവുമാണ്', ബാവുമ കൂട്ടിച്ചേർത്തു.

ഞായറാഴ്ച റാഞ്ചിയിലാണ് ഇന്ത്യയും ദക്ഷിണാഫ്രിക്കയും തമ്മിലുള്ള ഏകദിന പരമ്പരയ്ക്ക് തുടക്കമാവുന്നത്. മൂന്ന് മത്സരങ്ങളാണ് പരമ്പയിലുള്ളത്. പരമ്പയിലെ ആദ്യ മത്സരം ഞായറാഴ്ച ഉച്ചയ്ക്ക് 1.30ന് റാഞ്ചിയിലെ ജെഎസ്‌സിഎ ഇൻ്റർനാഷണൽ സ്റ്റേഡിയം കോംപ്ലക്സിൽ നടക്കും. ഡിസംബർ മൂന്നിന് റായ്പൂരിൽ രണ്ടാം ഏകദിനവും ആറിന് വിശാഖപട്ടണത്ത് മൂന്നാം മത്സരവും നടക്കും.

ദക്ഷിണാഫ്രിക്കയ്ക്കെതിരായ ടെ‌സ്റ്റ് പരമ്പര വൈറ്റ് വാഷ് പരാജയം വഴങ്ങിയ ഇന്ത്യ ഏകദിന പരമ്പരയിലൂടെ തിരിച്ചുവരവ് ലക്ഷ്യമിട്ടാണ് റാഞ്ചിയിൽ ഇറങ്ങുന്നത്. അതേസമയം ഇന്ത്യൻ മണ്ണിൽ ടെസ്റ്റ് പരമ്പര നേടി ചരിത്രം കുറിച്ചതിൻ്റെ ആത്മവിശ്വാസത്തിലാണ് ദക്ഷിണാഫ്രിക്ക ഏകദിന പരമ്പരയ്ക്ക് ഇറങ്ങുന്നത്.

Content Highlights: IND vs SA: Temba Bavuma On Strategy Against Virat Kohli, Rohit Sharma In ODIs