LIVE TV
തിരുവനന്തപുരം: വിദ്യാഭ്യാസ സ്ഥാപനങ്ങള്ക്ക് വിശേഷ ദിവസങ്ങളില് നല്കുന്ന പൊതു അവധി റദ്ദാക്കണമെന്ന നിര്ദേശവുമായി ബാലാവകാശ കമ്മീഷന്. സ്വാതന്ത്ര്യദിനം, ഗാന്ധിജയന്തി ദിനം, റിപ്പബ്ലിക് ദിനം തുടങ്ങിയ ദിവങ്ങളില് നല്കുന്ന പൊതു അവധി റദ്ദാക്കാനും അറിവും വിജ്ഞാനവും സമ്പാദിക്കാനുള്ള ദിനങ്ങളാക്കി മാറ്റാനുമാണ് മനുഷ്യാവകാശ കമ്മീഷന്റെ നിര്ദേശം. കമ്മീഷന് ചെയര്പേഴ്സണ് കെ വി മനോജ് കുമാര്, അംഗങ്ങളായ കെ കെ ഷാജു, ഡോ. എഫ് വില്സണ്, എന്നിവരുടെ ഫുള് ബെഞ്ചാണ് ഇതുമായി ബന്ധപ്പെട്ട നിര്ദേശം പുറത്തിറക്കിയത്. സ്വാതന്ത്ര ദിനത്തില് ഇന്ത്യയുടെ സ്വാതന്ത്ര സമര ചരിത്രവും അതിനു ജീവത്യാഗം ചെയ്തവരെക്കുറിച്ച് പഠിക്കുകയും വേണമെന്ന ഉദ്ദേശത്തോടെയാണ് അവധി റദ്ദാക്കിയതെന്ന് ഉദ്യോഗസ്ഥര് പറഞ്ഞു.
റിപ്പബ്ലിക് ദിനത്തിലും ഭരണഘടനാ ദിനത്തിലും രാജ്യത്തിന്റെ ഭരണഘടനയെക്കുറിച്ചും അതിന്റെ പ്രധാന്യത്തെക്കുറിച്ചും വിദ്യാര്ത്ഥികള് പഠിക്കണം. ഗാന്ധി ജയന്തി ദിനത്തില് പരിസ്ഥിതി സംരക്ഷണത്തിന്റെയും പരിസര ശുചിത്വത്തിന്റെയും പ്രാധാന്യം ഉള്ക്കൊള്ളുന്ന പ്രവര്ത്തനങ്ങള് എല്ലാ സ്കൂളുകളിലും സംഘടിപ്പിക്കണമെന്ന് കമ്മീഷന് നിര്ദേശം നല്കിയിട്ടുണ്ട്.
ഓണം, ക്രിസ്തുമസ്, പെരുന്നാള് തുടങ്ങിയ ആഘോഷദിവസങ്ങളില് പ്രത്യേക പരിപാടികളും പദ്ധതികളും നടപ്പിലാക്കാനും നിര്ദേശമുണ്ട്. മനുഷ്യര് തമ്മിലുള്ള സഹകരണം, പരസ്പര ബഹുമാനം, ഐക്യം, അഖണ്ഡത, സമത്വം തുടങ്ങിയ മൂല്യങ്ങള് കുട്ടികളിലേക്ക് പകര്ന്ന് നല്കാനാണ് ഇത്തരം പരിപാടികള് സംഘടിപ്പിക്കേണ്ടത് എന്നും ബാലാവകാശ കമ്മീഷന് വ്യക്തമാക്കി. എല്ലാവര്ക്കും തുല്യ നീതിയും പരിഗണനയും സംരക്ഷണവും ലഭിക്കുന്ന നവലോകം സൃഷ്ടിക്കാനാകുന്ന ഓണസന്ദേശം കുട്ടികളിലെത്തിക്കണം. ദിനാചരണങ്ങള്, കലാകായിക മത്സരങ്ങള് എന്നിവയില് കുട്ടികളുടെ നേതൃപരമായ പങ്കാളിത്തം ഉറപ്പാക്കാനും നിര്ദേശമുണ്ട്.
Content Highlight; Child Rights Commission Orders Schools Not to Cancel Holidays on National Days Including Independence Day
