

കൊച്ചി: 'ഭര്തൃമതിയായ ഇരയുടെ ത്വര കൊള്ളാം'; അതിജീവിതയെ അധിക്ഷേപിച്ച് മഹിളാ കോണ്ഗ്രസ് നേതാവ്
പത്തനംതിട്ട: പാലക്കാട് എംഎല്എ രാഹുല് മാങ്കൂട്ടത്തിലിനെതിരെ പരാതി നല്കിയ യുവതിയെ അധിക്ഷേപിച്ച് പത്തനംതിട്ട മഹിളാ കോണ്ഗ്രസ് ജില്ലാ ജനറല് സെക്രട്ടറി ബിന്ദു ബിനുവിന്റെ ഫേസ്ബുക്ക് പോസ്റ്റുകൾ. അതിജീവിതയെ അപമാനിക്കുന്ന തരത്തില് രണ്ട് പോസ്റ്റുകളാണ് ഇവര് ഫേസ്ബുക്കില് പങ്കുവച്ചിരിക്കുന്നത്. ആദ്യം ഭര്തൃമതിയായ ഇരയുടെ ത്വര കൊള്ളാം എന്ന പോസ്റ്റായിരുന്നു ഇവരുടെ വാളില് പ്രത്യക്ഷപ്പെട്ടത്. ഇതിന് പിന്നാലെയാണ് അതിജീവിതയെ അധിക്ഷേപിക്കുന്ന രണ്ടാമത്തെ പോസ്റ്റും ഇവരിട്ടത്.
സുന്ദരന്മാരായ ചെറുപ്പക്കാരോട് ചേര്ന്ന് നില്ക്കുമ്പോള് കാമം തോന്നാത്ത കുടുംബത്തില് പിറന്ന ഏത് പെണ്ണിനും ഏതൊരുത്തനോടൊപ്പവും ധൈര്യപൂര്വ്വം ഏത് സാഹചര്യത്തിലും ഇങ്ങനെ നില്ക്കാം എന്ന ക്യാപ്ഷനോടെ രാഹുലിനൊപ്പമുള്ള ചിത്രമാണ് ഇവർ ഇതിന് പിന്നാലെ പങ്കുവച്ചത്. പോസ്റ്റുകള് താഴെയായി നിരവധി കമന്റുകളുമുണ്ട്. ഈ പോസ്റ്റുകള്ക്ക് പിന്നാലെ ഒരു അവിഹിത ഗര്ഭത്തിനും ശബരിമലയിലെ സ്വര്ണക്കൊള്ളയെ മറയ്ക്കാന് കഴിയില്ലെന്നൊരു പോസ്റ്റും ഇവര് പങ്കുവച്ചിട്ടുണ്ട്.
അതേസമയം നിരപരാധിത്വം തെളിയിക്കുന്നത് വരെ രാഹുല് മാങ്കൂട്ടത്തില് എംഎല്എയെ കോണ്ഗ്രസില് തിരിച്ചെടുക്കില്ലെന്ന് മുതിര്ന്ന കോണ്ഗ്രസ് നേതാവ് കെ മുരളീധരന് വ്യക്തമാക്കി. രാഹുല് മാങ്കൂട്ടത്തിലിന്റെ പ്രവൃത്തിയെ ന്യായീകരിക്കാന് പാര്ട്ടിയോ പാര്ട്ടി മുഖപത്രമോ തയ്യാറല്ലെന്നും തിരുത്തേണ്ട സ്ഥലത്ത് പാര്ട്ടി തിരുത്തുമെന്നും കെ മുരളീധരന് പറഞ്ഞു. പാപം ചെയ്യാത്തവര് കല്ലെറിയട്ടെ എന്ന് വീക്ഷണം മുഖപ്രസംഗത്തില് പറഞ്ഞത് സിപിഐഎമ്മിനെയും എല്ഡിഎഫിനെയും ഉദ്ദേശിച്ചാണെന്നും മുരളീധരന് വ്യക്തമാക്കി. ശബരിമലയിലെ സ്വര്ണക്കൊളള മറച്ചുവയ്ക്കാന് വേണ്ടി രാഹുല് വിഷയം ഉയര്ത്തിക്കാണിച്ചാല് അതേ രീതിയില് പ്രതിരോധിക്കാന് കോണ്ഗ്രസും യുഡിഎഫും രംഗത്തുണ്ടാകുമെന്നും അദ്ദേഹം പറഞ്ഞു.
Content Highlights: Pathanamthitta Mahila Congress District Secretary insults Survivor and supports Rahul Mamkootathil