Get the latest news at
your fingertips!
Download our app now
LIVE TV
Search
തിരുവനന്തപുരം: മഹാത്മാ അയ്യങ്കാളിയുടെ ജന്മവാര്‍ഷികത്തില്‍ അനുസ്മരിച്ച് മുഖ്യമന്ത്രി പിണറായി വിജയന്‍. ആധുനിക കേരളത്തിന് അടിത്തറ പാകുന്നതില്‍ അയ്യങ്കാളിയും അദ്ദേഹം നേതൃത്വം നല്‍കിയ പോരാട്ടങ്ങളും വഹിച്ച പങ്ക് നിസ്തുലമാണെന്ന് മുഖ്യമന്ത്രി ഫേസ്ബുക്ക് പോസ്റ്റില്‍ കുറിച്ചു. അവര്‍ണരെന്ന് മുദ്രയടിക്കപ്പെട്ട ഒരു ജനത നേരിട്ട അനീതികള്‍ക്കെതിരെ അദ്ദേഹം നേതൃത്വം നല്‍കിയ ഐതിഹാസികമായ സമരങ്ങള്‍ കേരള ചരിത്രത്തിന്റെ ഗതിയെത്തന്നെ മാറ്റിയെഴുതിയെന്നും പിണറായി വിജയന്‍ പറഞ്ഞു.
'സഞ്ചാര സ്വാതന്ത്ര്യവും വിദ്യാഭ്യാസത്തിനുള്ള അവസരവും മാന്യമായ കൂലിയും നിഷേധിക്കപ്പെട്ട തിരുവിതാംകൂറിലെ അടിച്ചമര്‍ത്തപ്പെട്ട ജനതയ്ക്ക് ജാതി-ജന്മി-നാടുവാഴി വ്യവസ്ഥയ്‌ക്കെതിരെ പോരാടാന്‍ അയ്യങ്കാളി ഊര്‍ജ്ജം നല്‍കി. സഞ്ചാരസ്വാതന്ത്ര്യ നിഷേധത്തിനെതിരെ അയ്യങ്കാളി നടത്തിയ വില്ലുവണ്ടിയാത്ര കേരളത്തിന്റെ പില്‍ക്കാല സാമൂഹ്യ ജീവിതത്തില്‍ ഏറെ അനുരണനം സൃഷ്ടിച്ച സംഭവമാണ്', പിണറായി വിജയന്‍ പറഞ്ഞു.
ജാതീയമായ ഉച്ചനീചത്വങ്ങളെ ചോദ്യം ചെയ്തുകൊണ്ട് അയ്യങ്കാളി നേതൃത്വം നല്‍കിയ കല്ലുമാല സമരമുള്‍പ്പെടെ അക്കാലത്തെ സവര്‍ണ്ണ മേധാവിത്വത്തിന് വലിയ പ്രഹരമാണേല്‍പ്പിച്ചതെന്ന് പിണറായി വിജയന്‍ പറഞ്ഞു. ദളിത് കുട്ടികള്‍ക്ക് സ്കൂളില് പ്രവേശനം നിഷേധിച്ചതിനെതിരെയും കര്‍ഷകത്തൊഴിലാളികള്‍ക്ക് വേതനവര്‍ധനവിന് വേണ്ടിയും അയ്യങ്കാളിയുടെ നേതൃത്വത്തില്‍ നടന്ന കര്‍ഷകത്തൊഴിലാളി പണിമുടക്ക് ഇന്ത്യന്‍ ചരിത്രത്തിലെ ആദ്യ തൊഴില്‍സമരമായാണ് അടയാളപ്പെടുത്തപ്പെടുന്നതെന്നും അദ്ദേഹം കൂട്ടിച്ചേര്‍ത്തു.
'ജന്മിത്വവും ജാതിസമ്പ്രദായവും അനാചാരങ്ങളും തീര്‍ത്ത അന്ധകാരത്തിനുമേല്‍ നവോത്ഥാനത്തിന്റെ വെളിച്ചം വിതറി കേരളത്തെ ആധുനികതയിലേയ്ക്ക് ആനയിച്ചവരില്‍ പ്രധാനിയാണ് അയ്യങ്കാളി. കേരളം ഇന്നോളം നേടിയ സാമൂഹിക പുരോഗതിക്ക് അയ്യങ്കാളി നേതൃത്വം നല്‍കിയ അവകാശ സമരങ്ങളുടെ പിന്‍ബലമുണ്ട്. ഈ നേട്ടങ്ങള്‍ സംരക്ഷിക്കാനും സാമുദായിക ഭിന്നതകളെയും സാമൂഹിക അസമത്വത്തെയും മറികടന്ന് തുല്യതയിലൂന്നിയ സമൂഹമായി കേരളത്തെ മാറ്റിയെടുക്കാനും അയ്യങ്കാളിയുടെ സമരസ്മരണ നമുക്ക് ഊര്‍ജ്ജം പകരും. ഏവര്‍ക്കും അയ്യങ്കാളി ജയന്തി ആശംസകള്‍', മുഖ്യമന്ത്രി പിണറായി വിജയന്‍ പറഞ്ഞു.
Content Highlights: Pinarayi Vijayan on Ayyankali birth anniversary
