Get the latest news at
your fingertips!
Download our app now
LIVE TV
Search
കോഴിക്കോട്: റിപ്പോർട്ടർ ടിവിയുടെ മാധ്യമ സംഘത്തിന് നേരെ കോഴിക്കോട് കോൺഗ്രസ് പ്രവർത്തകരുടെ കയ്യേറ്റ ശ്രമം. മേപ്പയൂരിലും പേരാമ്പ്രയിലുമാണ് കോൺഗ്രസ് പ്രവർത്തകർ റിപ്പോർട്ടർ മാധ്യമ സംഘത്തെ കയ്യേറ്റം ചെയ്യാൻ ശ്രമിച്ചത്. പേരാമ്പ്രയിൽ റിപ്പോർട്ടർ ടിവിയുടെ വാഹനം അടിച്ച് നശിപ്പിക്കാനും ശ്രമമുണ്ടായി.
ഇന്ന് വടകരയില്‍ ഷാഫി പറമ്പില്‍ എംപിക്കെതിരെ ഡിവൈഎഫ്‌ഐ വലിയരീതിയില്‍ പ്രതിധേഷം നടത്തിയിരുന്നു. വടകര ടൗണ്‍ ഹാളില്‍ നിന്ന് പരിപാടി കഴിഞ്ഞ് മടങ്ങുന്നതിനിടെയായിരുന്നു സംഭവം. കാറില്‍ നിന്ന് ഇറങ്ങിയ ഷാഫി പറമ്പിലും ഡിവൈഎഫ്‌ഐ പ്രവര്‍ത്തകരും തമ്മില്‍ വാക്കേറ്റമുണ്ടായിരുന്നു. വന്‍ പൊലീസ് സംഘമെത്തിയാണ് സംഘര്‍ഷത്തിലേയ്ക്ക് പോകാന്‍ ഇടയുണ്ടായിരുന്ന സാഹചര്യത്തെ തണുപ്പിച്ചത്. ഇതിന് ശേഷം മേപ്പയൂരിലും പേരാമ്പ്രയിലും ഷാഫിയുടേതായി രണ്ട് പരിപാടികള്‍ നടക്കാനുണ്ടായിരുന്നു. ഈ പരിപാടികള്‍ റിപ്പോര്‍ട്ട് ചെയ്യാനെത്തിയപ്പോഴായിരുന്നു റിപ്പോര്‍ട്ടര്‍ സംഘത്തിന് നേരെ കയ്യേറ്റശ്രമം നടന്നത്.
പരിപാടി റിപ്പോര്‍ട്ട് ചെയ്യുന്നതിനായി റിപ്പോര്‍ട്ടർ ടിവിയുടെ കോഴിക്കോട് റിപ്പോര്‍ട്ടര്‍ അഭിജിത്തായിരുന്നു എത്തിയത്. അഭിജിത്തിനൊപ്പം ക്യാമറാമാന്‍ ഖുബൈര്‍ ഫൈസി, ഡ്രൈവര്‍ അഖില്‍ എന്നിവരുമുണ്ടായിരുന്നു. മേപ്പയൂരിലെ പരിപാടി റിപ്പോര്‍ട്ട് ചെയ്യാനായിരുന്നു സംഘം ആദ്യം എത്തിയത്. റിപ്പോര്‍ട്ടറും മറ്റൊരു ചാനലും മാത്രമായിരുന്നു റിപ്പോര്‍ട്ടിംഗിന് എത്തിയത്. ഷാഫി പറമ്പില്‍ എത്തിയ സമയത്ത് പ്രതികരണം തേടുന്നതിനായി അഭിജിത്തും ഖുബൈറും ശ്രമിച്ചപ്പോള്‍ കോണ്‍ഗ്രസ് പ്രവര്‍ത്തകര്‍ തടയുകയും അവിടേയ്ക്ക് പോകാന്‍ പറ്റില്ലെന്ന് പറഞ്ഞ് അസഭ്യം പറയുകയുമായിരുന്നു. ഇതിന് ശേഷം റിപ്പോര്‍ട്ടര്‍ സംഘം പേരാമ്പ്രയിലെ പരിപാടി റിപ്പോര്‍ട്ട് ചെയ്യുന്നതിനായി എത്തി. ഇവിടെയും സമാന സാഹചര്യമായിരുന്നു. റിപ്പോര്‍ട്ടറിന്റെ ഡ്രൈവര്‍ അഖിലിനോട് കോണ്‍ഗ്രസ് പ്രവര്‍ത്തകര്‍ അസഭ്യവര്‍ഷം നടത്തി. ഇതുമായി ബന്ധപ്പെട്ട് അവിടെയുണ്ടായിരുന്ന കോണ്‍ഗ്രസ് നേതാക്കളോട് പരാതിപ്പെട്ടു. പിന്നാലെ പേരാമ്പ്ര ബസ് സ്റ്റാന്‍ഡ് പരിസരത്തേയ്ക്ക് മാറി നില്‍ക്കാനുള്ള ശ്രമത്തിനിടെ റിപ്പോർട്ടർ സംഘത്തിൻ്റെ കാറിന് ചുറ്റും ആളുകള്‍ കൂടുകയും വാഹനത്തിലും ഗ്ലാസിലുമെല്ലാം ശക്തിയായി അടിക്കുയുമായിരുന്നു. തുടര്‍ന്ന് പൊലീസ് ഇടപെട്ട് റിപ്പോര്‍ട്ടര്‍ സംഘത്തെ ബസ് സ്റ്റാന്‍ഡ് പരിസരത്തേയ്ക്ക് മാറ്റി നിര്‍ത്തി.
അക്രമികള്‍ക്കെതിരെ കർശന നടപടി വേണമെന്ന് ആവശ്യപ്പെട്ട് സംസ്ഥാന പൊലീസ് മേധാവിക്ക് റിപ്പോര്‍ട്ടര്‍ ടിവി പരാതി നല്‍കും. നിർഭയമാധ്യമ പ്രവർത്തനം നടത്തുന്നതിന് ആവശ്യമായ സുരക്ഷയൊരുക്കണമെന്നും പരാതിയിൽ ഡിജിപിയോട് ആവശ്യപ്പെടും.
Content Highlights: Kozhikode Congress workers attempt to attack Reporter TV's media team
