LIVE TV
ഈജിപ്ഷ്യൻ ഇതിഹാസ താരം മുഹമ്മദ് സലാഹ് സീസണൊടുവിൽ ലിവർപൂൾ വിടും. തന്റെ സോഷ്യൽ മീഡിയ അക്കൗണ്ടുകളിൽ പങ്കുവെച്ച വീഡിയോ സന്ദേശത്തിലൂടെയാണ് ആൻഫീൽഡിന്റെ പടിയിറങ്ങുമെന്ന കാര്യം 33കാരനായ താരം സ്ഥിരീകരിച്ചത്. ഈ സീസണിന്റെ അവസാനത്തോടെ കരാർ അവസാനിക്കുമ്പോൾ ലിവർപൂൾ വിടുമെന്നാണ് താരം അറിയിച്ചത്.
'നിർഭാഗ്യവശാൽ ആ ദിവസം വന്നിരിക്കുന്നു. ഇത് എന്റെ വിടവാങ്ങലിന്റെ ആദ്യ ഭാഗമാണ്. സീസൺ അവസാനത്തോടെ ഞാൻ ലിവർപൂൾ വിടും'. സലാ വീഡിയോയിലൂടെ പറഞ്ഞു. സലായുടെ പ്രഖ്യാപനത്തെ ലിവർപൂൾ ഔദ്യോഗിക പ്രസ്താവനയിലൂടെ പിന്തുണക്കുകയും ചെയ്തു. പിന്തുണക്കാരോടുള്ള 'ബഹുമാനവും നന്ദിയും കാരണം' സലാഹ് ആദ്യ അവസരത്തിൽ തന്നെ പരസ്യമായി സംസാരിക്കാൻ തിരഞ്ഞെടുത്തുവെന്ന് ക്ലബ് അറിയിച്ചു.
2017 ൽ എഎസ് റോമയിൽ നിന്ന് ഏകദേശം 50 മില്യൺ ഡോളറിനാണ് സലാ ലിവർപൂളിൽ എത്തിയത്. അദ്ദേഹത്തിന് ഇനി എത്രത്തോളം സ്വാധീനം ചെലുത്താനാകുമെന്ന് പ്രവചിക്കാൻ പോലും കഴിയുമായിരുന്നില്ല. 435 മത്സരങ്ങളിൽ നിന്ന് 255 ഗോളുകൾ നേടിയ അദ്ദേഹം ക്ലബ്ബിന്റെ ചരിത്രത്തിലെ ഏറ്റവും മികച്ച കളിക്കാരിൽ ഒരാളായി മാറി. ഇതോടെ ലിവർപൂളിന്റെ എക്കാലത്തെയും മികച്ച സ്കോറർമാരുടെ പട്ടികയിൽ റോജർ ഹണ്ടിനും (285) ഇയാൻ റഷിനും (346) പിന്നിൽ മൂന്നാം സ്ഥാനത്താണ് സലാ.
ആൻഫീൽഡിലെ ഒമ്പത് വർഷത്തിനിടയിൽ, ക്ലബ്ബിന് എട്ട് പ്രധാന ട്രോഫികൾ നേടാൻ അദ്ദേഹം സഹായിച്ചു. അതിൽ രണ്ട് പ്രീമിയർ ലീഗ് കിരീടങ്ങൾ, ചാമ്പ്യൻസ് ലീഗ്, എഫ്എ കപ്പ്, രണ്ട് ലീഗ് കപ്പുകൾ, ക്ലബ് ലോകകപ്പ്, യുവേഫ സൂപ്പർ കപ്പ് എന്നിവ ഉൾപ്പെടുന്നു.
Content Highlights: Mohamed Salah to leave Liverpool at the end of the season
