'കൊടി കീറിയവനെ കീറാനും ഞങ്ങള്‍ക്ക് അറിയാം'; ഞൊട്ട കോണ്‍ഗ്രസുകാര്‍ക്ക് ശക്തമായ താക്കീതെന്ന് സിപിഐഎം

പാര്‍ട്ടി കൊടി നശിപ്പിക്കുന്നവര്‍ക്കെതിരെ ശക്തമായ 'താക്കീതു'മായി സിപിഐഎം വയനാട് ജില്ലാ സെക്രട്ടറി പി ഗഗാറിന്‍. സിപിഐഎം കൊടി കീറിയാല്‍ ആ കീറിയവനെ കീറാനും തങ്ങള്‍ക്ക് അറിയാമെന്ന് ഗഗാറിന്‍ പറഞ്ഞു. കല്‍പ്പറ്റയില്‍ സംഘടിപ്പിച്ച പ്രതിഷേധ മാര്‍ച്ചിലാണ് ഗഗാറിന്‍ ഇക്കാര്യം പറഞ്ഞത്.

പി ഗഗാറിന്‍ പറഞ്ഞത്: ''കമ്യൂണിസ്റ്റ് പാര്‍ട്ടിയെ നിങ്ങള്‍ തിരിച്ചറിഞ്ഞിട്ടില്ല. നിങ്ങള്‍ ഞങ്ങളുടെ കൊടി കീറി. പകരം കീറാന്‍ അറിയാഞ്ഞിട്ടല്ല. കീറിയവനെ കീറാനും ഞങ്ങള്‍ക്ക് അറിയാം. പണ്ട് ലീഗും കുറെ കൊടി കീറല്‍ നടത്തിയതാണ്. പിന്നൊരു ദിവസം നോക്കുമ്പോള്‍ ലീഗിന്റെ കൊടിയുമില്ല, കൊടി മരവുമില്ല. അന്ന് നിര്‍ത്തിയതാണ് അവര്‍. ഇത് കോണ്‍ഗ്രസിന്റെ പൊട്ടന്‍മാര്‍ക്ക് മനസിലായിട്ടില്ലെങ്കില്‍, നന്നാക്കി മനസിലാക്കി കൊടുക്കാനുള്ള കെല്‍പ്പുള്ള പ്രസ്ഥാനം വയനാട്ടിലുണ്ടെന്ന് ഇവിടത്തെ ഞൊട്ട കോണ്‍ഗ്രസുകാര്‍ക്ക് ശക്തമായ താക്കീതായി പറയുകയാണ്. ഇതില്‍ യാതൊരു സംശയവും വേണ്ട.''

''സെമി കേഡര്‍മാര്‍ വിമാനത്തില്‍ കയറി മുഖ്യമന്ത്രിയെ ആക്രമിക്കാന്‍ പോയതാണ്. ഇപി ജയരാജന് 70 വയസ് കഴിഞ്ഞു. ഒറ്റ അടിയാണ്, രണ്ടെണ്ണമാണ് നിലത്ത്. ഇതാണ് സുധാകരാ നിന്റെ സെമികേഡര്‍. 70 വയസ് കഴിഞ്ഞ ഞങ്ങടെ കേന്ദ്രകമ്മിറ്റി അംഗം ഒന്ന് ആഞ്ഞടിച്ചപ്പോള്‍ നിലത്ത് വീണ കേഡറാണ് നിന്റെ കേഡറെന്ന് മനസിലാക്കിക്കോ.''

ടി സിദ്ദിഖ് എംഎല്‍എക്കെതിരെയും രൂക്ഷമായ വിമര്‍ശനമാണ് ഗഗാറിന്‍ നടത്തിയത്. സിപിഐഎമ്മിനെ രാഷ്ട്രീയം പഠിപ്പിക്കാന്‍ സിദ്ദിഖ് വരേണ്ടെന്നും മര്യാദയ്ക്ക് എംഎല്‍എയുടെ പണിയെടുത്ത് നടന്നാല്‍ മതിയെന്നും ഗഗാറിന്‍ പറഞ്ഞു. വയനാട്ടിലെ കോണ്‍ഗ്രസ് നേതൃത്വത്തെ ഇല്ലാതാക്കാനാണ് സിദ്ദിഖ് ശ്രമിക്കുന്നതെന്നും ഇക്കാര്യം കോണ്‍ഗ്രസുകാര്‍ മനസിലാക്കണമെന്നും ഗഗാറിന്‍ ആവശ്യപ്പെട്ടു.

പി ഗഗാറിന്‍ പറഞ്ഞത്: ''എല്ലാവരെയും അറസ്റ്റ് ചെയ്യണമെന്നാണ് ടി സിദ്ദിഖ് പറഞ്ഞത്. അല്ലെങ്കില്‍ സിദ്ദിഖ് എന്ത് ഞൊട്ട കാണിക്കാനാണ്. കോഴിക്കോട് നിന്ന് സിദ്ദിഖ് ഇവിടെ വന്നിട്ട് എംഎല്‍എയായി കമ്യൂണിസ്റ്റ് പാര്‍ട്ടിയെ പഠിപ്പിക്കാനാണോ നോക്കുന്നത്. ആരാണ് സിദ്ദിഖ് എന്ന് ഞങ്ങള്‍ക്ക് എല്ലാവര്‍ക്കും കൃത്യമായിട്ട് അറിയാം. മരുഭൂമിയിലെ കഥയെല്ലാം ഞങ്ങള്‍ക്ക് അറിയാം. ആ സിദ്ദിഖ് ഞങ്ങളെ രാഷ്ട്രീയം പഠിപ്പിക്കാന്‍ വരേണ്ട. മര്യാദയ്ക്ക് എംഎല്‍എയുടെ പണിയെടുത്ത് നടന്നോ. അതിനെ ഞങ്ങള്‍ പിന്തുണയ്ക്കും. എംഎല്‍എയുടെ പണിയെടുക്കാനും ഇതുവരെ പഠിച്ചിട്ടില്ല. അതും ഞങ്ങള്‍ പഠിപ്പിച്ച് തരാം. ഒരു കൊല്ലം കഴിഞ്ഞിട്ടും ഒരു ചുക്കും ചെയ്തിട്ടില്ല. എന്നിട്ട് ഞങ്ങളെ പഠിപ്പിക്കാന്‍ വരുകയാണ്. വയനാട്ടിലെ കോണ്‍ഗ്രസ് നേതൃത്വത്തെ ഇല്ലാതാക്കാനാണ് സിദ്ദിഖ് ശ്രമിക്കുന്നത്. ഇത് കോണ്‍ഗ്രസുകാര്‍ മനസിലാക്കിയാല്‍ നല്ലത്.''